«Ներքին բախումների վտանգ կա»․ ընտրություններ Արցախում
Նախագահի ընտրություն Արցախում
Շաբաթ օրը՝ սեպտեմբերի 9-ին Արցախի Ազգային ժողովը նախագահ է ընտրելու։ Խորհրդարանի հինգ ուժերից չորսը՝ «Ազատ հայրենիք-ՔՄԴ»-ն, «Արդարություն»-ը, Դաշնակցությունն ու Արցախի ժողովրդավարական կուսակցությունը առաջադրել են պետնախարար Սամվել Շահրամանյանի թեկնածությունը։ Նրանց ձայները բավարար են հենց առաջին փուլով նախագահ ընտրելու համար։
Նյութի հրապարակման պահին հայտարարություն տարածեց Արցախի Ազգային ժողովի նախագահի պաշտոնակատար Գագիկ Բաղունցը՝ տեղեկացնելով, որ «Միասնական հայրենիք» խմբակցությունն իր հերթին առաջադրել էր իր առաջնորդի, Սամվել Բաբայանի թեկնածությունը։
«Դիմումը և դրան կից ներկայացված փաստաթղթերը հետ են վերադարձվել՝ վերջին տասը տարում միայն Արցախի Հանրապետության քաղաքացի հանդիսանալու, վերջին տասը տարում Արցախի Հանրապետությունում մշտապես բնակվելու մասին տեղեկանքը չներկայացնելու պատճառով»,- նշել է Բաղունցը։
ՊԲ նախկին հրամանատար Սամվել Բաբայանը հայտարարել է, որ իր ղեկավարած քաղաքական ուժը քվեարկությանը չի մասնակցելու, «կանխորոշված ընտրությանն» ընդդիմանալու համար մտադիր են ընտրության օրը Ստեփանակերտում ակցիա իրականացնել։
Քաղաքագետ Տիգրան Գրիգորյանի խոսքով՝ կա քաղաքական կոնսենսուս, և ամենայն հավանականությամբ Սամվել Շահրամանյանը կընտրվի։ Ասում է՝ կայացվել է ճգնաժամի մեջ գտվող երկիրը համատեղ ուժերով, այլ ոչ թե միանձնյա կառավարելու որոշում, ինչի համար էլ ընտրվել է Շահրամանյանը, ով «քաղաքական դեմք» չէ։ Գրիգորյանի դիտարկմամբ՝ նա ներկայացնում է այն ոչ ֆորմալ քաղաքական դաշինքը, որը ժամանակին կոնսոլիդացրել է Ռուբեն Վարդանյանը (նախկին պետնախարար), դաշինք, որի անդամ են նաև նախկին նախագահներն ու ԱԺ երեք ընդդիմադիր խմբակցությունները։
Այս պահին հայտնի բոլոր մանրամասները, ինչպես նաև փորձագիտական կարծիք
Նախագահի միակ թեկնածուն
Սամվել Շահրամանյանն Արցախի պետնախարարի պաշտոնում նշանակվել է օրեր առաջ՝ օգոստոսի 31-ին։ Դա պաշտոնաթող նախագահ Արայիկ Հարությունյանի վերջին որոշումներից մեկն էր։ Հարությունյանը դեռ հրաժարական չէր ներկայացրել, բայց մամուլում արդեն լուրեր էին պպտվում, որ հենց Շահրամանյանն է լինելու Արցախի հաջորդ նախագահը։
2023 թ․-ի հունվարից Շահրամանյանն Արցախի ԱԽ քարտուղարն էր։ Ըստ տարբեր աղբյուրների՝ նա Արցախի նախկին նախագահ Բակո Սահակյանի մտերիմներից է։ Սահակյանի պաշտոնավարման շրջանում Սամվել Շահրամանյանը զբաղեցրել է Արցախի ազգային անվտանգության ծառայության տնօրենի պաշտոնը։
«Կարևորագույն քննություն է»․ զսպվածության կոչ նախկին նախագահից
Արցախի նախկին նախագահ Արայիկ Հարությունյանը պատգամավորներին կոչ է արել նախագահի ընտրության հարցում «առաջնորդվել իրենց խղճով և չտրվել տարաբնույթ նեղ խմբային ազդեցությունների»:
Շեշտել է՝ որևէ կերպ չի կարող և չի ուզում ներգործություն ունենալ իշխող «Ազատ հայրենիք-ՔՄԴ» խմբակցության դիրքորոշման ձևավորման վրա։ Հիշեցրել է՝ «Ազատ հայրենիք» կուսակցության հետ որևէ առնչություն չունի, կուսակցական գործունեությունը դադարեցրել է 2020 թ․-ի Ղարաբաղյան երկրորդ պատերազմից անմիջապես հետո։
«Ո՛չ ես, ո՛չ էլ մեկ այլ կողմնակի անձ իրավունք չունենք միջամտելու այդ գործընթացին»,- հայտարարել է նա։
Նախկին նախագահը բոլոր քաղաքական ու հանրային գործիչներին հորդորել է զսպվածություն ցուցաբերել․
«Սա մեր պետական ու քաղաքական համակարգերի կարևորագույն քննությունն է, որը պետք է անցնենք պատվով ու անցնցում»։
«Խմբակ, որը պայքարում է Հայաստանում իշխանությունը փոխելու համար»
«Միասնական հայրենիք»-ի առաջնորդ Սամվել Բաբայանը նախագահի թեկնածության ընտրության մասին հայտարարել է․
«3 հոգի նկուղում չեն կարող որոշում կայացնել։ Ենթադրություն չէ, Արցախում մի ամբողջ գիշեր Արայիկ Հարությունյան, Բակո Սահակյան, Արկադի Ղուկասյան միասին անց են կացրել, այդ որոշումը կայացրել»,- հայտարարել է նա։
«Ազատության» եթերում Բաբայանն ասել է, որ բոլոր քվեարկողները պատասխանատվություն են կրելու սեփական ժողովրդի ճակատագրի հետ խաղալու համար, «պետք է հազար անգամ մտածեն, մի անգամ կտրեն, հակառակ դեպքում շատ դաժան է լինելու»։
«Մենք չգիտենք վաղն ինչ է լինելու, Արցախում ստեղծում ենք մի խմբակ, որը պայքարում է Հայաստանի իշխանությանը փոխելու համար։ Հայաստանի իշխանությունը թող փոխվի՝ դուրս գան ազգով, ժողովրդով էդ իշխանությունը փոխեն, Ղարաբաղն ինչի՞ եք դնում հարվածի տակ»,- նկատել է նա։
Փորձագիտական կարծիք
Քաղաքագետ Տիգրան Գրիգորյանի դիտարկմամբ՝ նախկին նախագահները, նախկին պետնախարար Ռուբեն Վարդանյանն ու նրանց շրջապատը որոշել են «համատեղ ջանքերով փորձել հասկանալ իրավիճակն ու հասնել ինչ-որ լուծումների»։
«Սամվել Շահրամանյանն ինքնուրույն ֆիգուր չէ, պարզապես ներկայացնելու է այդ խումբը, լինելու է այդ խմբի ներկայացուցիչը նախագահի աթոռին»,- Civilnet-ի եթերում հայտարարել է նա։
Նախագահի թեկնածուին բնորոշել է որպես «կուլիսային դեմք», որը երբեք հրապարակային գործունեությամբ չի զբաղվել․
«Եթե ազատ և արդար համաժողովրդական ընտրություններ լինեին, և նա չունենար նշված խմբի աջակցությունը, որևէ պաշտոնում ընտրվելու շանսերը գրեթե զրոյական կլինեին»։
Ասում է՝ եթե առաջադրվեր կայացած պետական գործիչ, նոր նախագահը երկիրը կկառավարեր միանձնյա՝ հաշվի առնելով այն, որ նախագահի ինստիտուտն օժտված է բավականին լայն լիազորություններով։ Այս փուլում, ըստ նրա, նպատակը դա չէ։
«Այս պարագայում կարծես այնպիսին գործիչ է պետք, որ հեշտ վերահսկելի լինի, հնարավոր լինի որոշումների կայացման կոլեկտիվ գործընթաց իրականացնել»,- նկատել է նա։
Անդրադառնալով «Միասնական հայրենիքի» կողմից հայտարարված հավաքին՝ նշել է, որ կան նաև այլ՝ փոքր ուժեր, որոնք հակված են մասնակցել այդ բողոքի ակցիային։
«Ներքին բախումների լուրջ վտանգներ կան։ Մոտակա օրերին բավականին լարված իրավիճակ է լինելու Արցախում»,- իր խոսքն ամփոփել է քաղաքագետը։
Հետևեք մեզ — Facebook | Youtube | Telegram
Նախագահի ընտրություն Արցախում
