Մոսկվայում համաձայնեցվել է Կասպից ծովի իրավական կարգավիճակի մասին կոնվենցիայի տեքստը

Քսան տարվա համառ վեճերից հետո հինգ մերձկասպյան երկիր մոտ է Կասպից ծովի իրավական կարգավիճակի մասին ամփոփիչ կոնվենցիայի ստորագրմանը:

Այս մասին հայտարարել է Ռուսաստանի ԱԳՆ ղեկավար Սերգեյ Լավրովը մերձկասպյան երկրների արտգործնախարարների 7-րդ նիստն ամփոփող մամուլի ասուլիսին, որը կայացել է Մոսկվայում:

«Փաստացի, փաստաթղթի տեքստն արդեն պատրաստ է», — Լավրովին է մեջբերում ՌԻԱ Նովոստին:

Ռուսաստանի ԱԳ նախարարը նշել է, որ փաստաթուղթը պլանավորվում է ստորագրել 5-րդ կասպյան գագաթնաժողովին, որը կկայանա Ղազախստանում հաջորդ տարի:

«Մենք ավարտել ենք գրեթե 20-ամյա աշխատանքը Կասպից ծովի իրավական կարգավիճակի մասին կոնվենցիայի վրա: Այդ տեքստը կներկայացվի մեր պետությունների ղեկավարների ստորագրմանը, և մենք հույս ունենք, որ նրանք կհաստատեն այն», — հայտարարել է Լավրովը: