Վրաստանի իշխող ուժի նախագահի թեկնածուն նախկին ֆուտբոլիստ Միխեիլ Կավելաշվիլին է
Միխեիլ Կավելաշվիլին՝ Վրաստանի նախագահի թեկնածու
Իշխող «Վրացական երազանք» կուսակցությունը Վրաստանի նախագահի թեկնածու է առաջադրել նախկին ֆուտբոլիստ Միխեիլ Կավելաշվիլիին: Կուսակցության հիմնադիր և պատվավոր նախագահ, օլիգարխ Բիձինա Իվանիշվիլին նրան հանրությանն է ներկայացրել նոյեմբերի 27-ին։
Միխեիլ Կավելաշվիլին տարբեր տարիների խաղացել է թբիլիսյան «Դինամո», բրիտանական «Մանչեստեր Սիթի», շվեյցարական «Գրասհոպեր» և այլ եվրոպական ակումբներում:
Նախորդ գումարման խորհրդարանում նա «Վրացական երազանք» կուսակցության պատգամավոր էր, ներկայացնում էր Թբիլիսիի Նաձալադևի շրջանը: Դրանից առաջ աշխատում էր Հանրային հեռուստաընկերությունում՝ որպես ֆուտբոլային մեկնաբան:
Ինչ վերաբերում է Կավելաշվիլիի ստացած կրթությանը, խորհրդարանի պաշտոնական էջում այդ բաժինը դատարկ է:
Սալոմե Զուրաբիշվիլին կլինի Վրաստանի վերջին նախագահը, ով ընտրվել է ուղիղ քվեարկությամբ: Այսուհետ նախագահին կընտրի ընտրողների հատուկ կոլեգիան: Նախագահի պաշտոնավարման ժամկետը կրճատվում է՝ վեց տարվա փոխարեն կլինի հինգ տարի:
Կոլեգիան ունի 300 անդամ, այդ թվում՝
- խորհրդարանի բոլոր 150 անդամները,
- Աբխազիայի ինքնավար հանրապետության Գերագույն խորհրդի բոլոր 20 պատգամավորները,
- Աջարիայի ինքնավար հանրապետության գերագույն խորհրդի բոլոր 21 պատգամավորները,
- տեղական ինքնակառավարման մարմինների 109 ներկայացուցիչներ:
Նախագահ ընտրելու համար անհրաժեշտ է կոլեգիայի անդամների 2/3-ի համաձայնությունը, այսինքն՝ 200 անդամի դրական քվեարկությունը: Եթե ոչ մի թեկնածու չհավաքի 200 ձայն, կկազմակերպվի երկրորդ փուլ, որին կմասնակցեն լավագույն արդյունք գրանցած երկու թեկնածուները: Նախագահ կդառնա նա, ով կստանա ձայների առավելագույն քանակը:
Նախագահի թեկնածուներին ընտրում է նույն ընտրողների կոլեգիան: Յուրաքանչյուր թեկնածուին պետք է աջակցություն հայտնած լինի կոլեգիայի առնվազն 30 անդամ: Ընդ որում, յուրաքանչյուր անդամ կարող է աջակցել միայն մեկ թեկնածուի: Այսինքն՝ ոչ մի պատգամավոր չի կարող ներգրավված լինել 30-հոգանոց մի քանի խմբում:
Իշխող «Վրացական երազանք» կուսակցությունը նախագահական ընտրությունները նշանակել է դեկտեմբերի 14-ին, իսկ երդմնակալության արարողությունը ծրագրված է դեկտեմբերի 29-ին:
«Հաջողակ ֆուտբոլիստ, ով երկար տարիներ բարձր է պահել Վրաստանի պատիվը»․ ինչպե՞ս Իվանիշվիլին ներկայացրեց Կավելաշվիլիի թեկնածությունը
«Միխեիլ Կավելաշվիլիին հանրությանը ներկայացնելու կարիք առանձնապես չկա: Նա հաջողակ ֆուտբոլիստ է, ով երկար տարիներ բարձր է պահել Վրաստանի պատիվը: Միշան Վրաստանի ֆուտբոլի հավաքականի փորձառու խաղացող էր: Նա մի քանի երկրների բազմակի չեմպիոն է:
Նրա ֆուտբոլային կարիերան կապված է Թբիլիսիի «Դինամո», Վլադիկավկազի «Ալանիա» ակումբի, «Մանչեստեր Սիթիի» և Շվեյցարիայի առաջատար ֆուտբոլային ակումբների հետ:
Իր քաղաքական գործունեության մեկնարկից առաջ Կավելաշվիլին միշտ անզիջում կերպով արտահայտում էր իր սկզբունքային դիրքորոշումը երկրի համար կարևոր բոլոր հարցերի վերաբերյալ։
Նա իր բնույթով, եթե կցանկանաք՝ իր հաբիտուսով [արտաքին տեսք], վրացական տղամարդու լավագույն մարմնավորումն է: Նա հրաշալի ամուսին է և չորս երեխաների հայր»,- ասել է Բիձինա Իվանիշվիլին:
Միխեիլ Կավելաշվիլին շնորհակալություն է հայտնել Բիձինա Իվանիշվիլիին և ասել, որ «հպարտ և երջանիկ է»:
«Կսկսեմ պարոն Բիձինա Իվանիշվիլիին շնորհակալություն հայտնելով: Նա արժանի և բացառիկ մարդ է: Հպարտ և երջանիկ եմ, որ նման բարդ ու պատասխանատու ժամանակաշրջանում կարող եմ մեր երկիրը պաշտպանել նրա հետ միասին: Մեծ շնորհակալություն նման վստահության համար: Հատուկ շնորհակալություն իմ ընկերներին և քաղաքական մեծամասնության բոլոր ներկայացուցիչներին»,- ասել է Կավելաշվիլին:
