«Զանգեզուրի միջանցքը» ՀՀ տարածք է, և վերջ»․ Գերմանիայի Բունդեսթագի ներկայացուցիչը Երևանում
Միխայել Ռոթի այցը Երևան
Գերմանիան լիովին աջակցում է պաշտոնական Երևանի դիրքորոշմանը տարածաշրջանի հաղորդակցության ուղիների բացման հարցում։ Հայաստանյան այցի շրջանակներում նման արձանագրում է արել Բունդեսթագի արտաքին հարաբերությունների հանձնաժողովի նախագահ Միխայել Ռոթը։
«Այն տարածքը, որտեղով, ոմանց պնդմամբ, պետք է անցնի այսպես կոչված «Զանգեզուրի միջանցքը», Հայաստանի տարածք է, և վերջ։ Հայկական կողմը հայտարարել է, որ ինքնուրույնաբար կարող է ապահովել այդ ճանապարհի անվտանգ ու անխափան երթևեկությունը։ Այդ տարածքի վրա միանշանակ տարածվում է Հայաստանի սուվերենությունն ու իրավազորությունը»,- հայտարարել է նա։
Մամուլի ասուլիսի ժամանակ Միխայել Ռոթը հիշեցրել է՝ ՀՀ էր եկել նաև մեկ տարի առաջ՝ Լեռնային Ղարաբաղի էթնիկ զտման և արցախցիների բռնի տեղահանության շրջանում։ Նշել է, որ բազմիցս դատապարտել է տեղի ունեցածն ու հանդես եկել հայ գերիների շուտափույթ վերադարձի պահանջով։ Խոսելով ԼՂ-ի հայերի հնարավոր վերադարձի մասին՝ Ռոթն ընդգծել է՝ «չարժե մարդկանց գոտեպնդել այնպիսի խոստումներով, որոնք հետո իրականություն չեն դառնալու»։
Երևանյան այցի շրջանակներում Ռոթը հանդիպել է վարչապետի, նախագահի, ինչպես նաև խորհրդարանի փոխնախագահի հետ։ ՀՀ-ում Գերմանիայի դեսպանատանը կազմակերպված մամուլի ասուլիսի ժամանակ հանդես է եկել հայտարարություններով։
Ի՞նչ է քննարկել Ռոթը հայ գործընկերների հետ
Վարչապետի աշխատակազմի փոխանցմամբ՝ Փաշինյան-Ռոթ հանդիպման ընթացքում անդրադարձ է կատարվել Հայաստան-Ադրբեջան խաղաղության պայմանագրի շուրջ քննարկումներին, այդ թվում՝ սահմանազատման գործընթացին և Երևանի առաջարկած «Խաղաղության խաչմերուկ» նախագծին, որն ուղղված է տարածաշրջանային տրանսպորտային հաղորդուղիների ապաշրջափակմանը: Կառավարության ղեկավարը գերմանացի հյուրին է ներկայացրել հայկական կողմի «սկզբունքային դիրքորոշումները»։
Կողմերը մտքեր են փոխանակել նաև տարածաշրջանային, միջազգային նշանակության այլ հարցերի շուրջ: Մանրամասներ, սակայն, չեն հաղորդվում։
Հաղորդագրությունում նշվում է, որ զրուցակիցները քննարկել են Հայաստան-Եվրոպական Միություն հարաբերություններին, ՀՀ-ում իրականացվող ժողովրդավարական բարեփոխումների ընթացքին վերաբերող հարցեր:
«Հայաստանի կառավարության համար ժողովրդավարության զարգացումը և ժողովրդավարական բարեփոխումներն ունեն ռազմավարական նշանակություն, և այդ ուղղությամբ քայլերը կրելու են հետևողական բնույթ»,- շեշտել է Փաշինյանը։
Գերմանիայի Բունդեսթագի արտաքին հարաբերությունների հանձնաժողովի նախագահը հանդիպել է նաև ԱԺ փոխնախագահ Ռուբեն Ռուբինյանի հետ, որը հայ-թուրքական կարգավորման գործընթացում Հայաստանի հատուկ ներկայացուցիչն է։ Խորհրդարանի կայքից տեղեկանում ենք, որ «հանձնաժողովի նախագահի խնդրանքով» Ռուբինյանը ներկայացրել է տարածաշրջանում տիրող անվտանգային իրավիճակը, խոսել առկա մարտահրավերների մասին․
«Անդրադարձ է կատարվել Հայաստան-Թուրքիա հարաբերությունների կարգավորման գործընթացին»։
Միխայել Ռոթը Հայաստան-Գերմանիա և Հայաստան Եվրամիություն բազմաշերտ համագործակցության օրակարգային հարցերի վերաբերյալ քննարկում է ունեցել նաև ՀՀ նախագահ Վահագն Խաչատուրյանի հետ։ Հանդիպման ավարտին նախագահը Ռոթին պարգևատրել է Բարեկամության շքանշանով՝ Հայաստանի և Գերմանիայի միջև բարեկամական կապերի ամրապնդման և զարգացման, համամարդկային արժեքների պաշտպանության գործում ներդրած նշանակալի ավանդի համար:
«ՀՀ հարևաններից ամենաբարդն ու ագրեսիվը Ադրբեջանն է»
Գերմանիայի Բունդեսթագի արտաքին հարաբերությունների հանձնաժողովի նախագահի փոխանցմամբ՝ Հայաստանն ապրում է շատ բարդ հարևանության պայմաններում, ինչը մեծ մարտահրավեր է։
«Նրա հարևաններից ամենաբարդն ու ագրեսիվն Ադրբեջանն է։ Մենք գիտակցում ենք, որ արժանապատվության վիրավորանքից հետո շատ դժվար է մի երկրի համար վերստին բանակցությունների սեղանի շուրջ նստել հարևան Ադրբեջանի հետ։ Բայց մենք շարունակելու ենք մեծ նվիրումով աջակցել Հայաստանին՝ կարևորելով նրա դերը Հարավային Կովկասում»,- նկատել է նա։
Ռոթը շեշտել է՝ խաղաղությունը կարող է հիմնված լինել միայն միջազգային իրավունքով ամրագրված խաղաղության պայմանագրի վրա, որով «հնարավոր կլինի ապահովել տարածքային ամբողջականությունը»։
Գերմանացի պաշտոնյան հույս է հայտնել, որ Բաքուն ճկուն կգտնվի, որպեսզի խաղաղության պայմանագրով իսկապես իրական հենք ստեղծվի տարածաշրջանային խաղաղության և կայունության համար։
Ասում է՝ գերմանական կողմի նպատակն է, որ ՀՀ-ն խարիսխ դառնա Հարավային Կովկասում խաղաղության, կայունության, ժողովրդավարության և ազատությունների համար։
«Եվրոպական ընտանիքին մերձենալը ձեր սուվերեն որոշումն է»
Գերմանացի խորհրդարանականն ընդգծել է, որ Հայաստան է եկել նորից քաջալերելու կառավարության, Ազգային ժողովի ընկերներին և կարևորելու «բարեփոխումների ճանապարհը, որը տանում է դեպի ազատություն, ժողովրդավարություն, հիմնարար իրավունքների պաշտպանություն»․
«Մարդիկ Հայաստանում ցանկանում են ապրել այնպես, ինչպես Եվրամիությունում։ Մասնավորապես՝ ազատության, արժանապատվության, ինքնուրույն որոշումներ կայացնելու և հատկապես ժողովրդավարության արժեքներով»։
Ռոթի գնահատմամբ՝ Հայաստանի՝ ԵՄ-ին մերձենալու գործընթացում արդեն իսկ առաջընթաց է գրանցվել։ Մատնանշել է հատկապես վիզաների ազատականացման շուրջ ՀՀ հետ երկխոսության մեկնարկը։
Էժանագին պրոպագանդա է որակել կարծիքները, թե «Եվրոպան ստիպում է այս կամ այն երկրին ավելի մերձենալ իրեն՝ հակադրվելով Ռուսաստանին»։
Նրա խոսքով՝ ԵՄ-ում գերիշխում է այն մոտեցումը, որ անհրաժեշտ է բացել հնարավորություններն Արևելյան Եվրոպայի երկրների, այդ թվում՝ Ուկրաինայի և Մոլդովայի, նաև Վրաստանի և Հայաստանի համար։
«Ինքս շատ ուրախ կլինեմ, եթե Հայաստանն ավելի մերձենա եվրոպական ընտանիքին։ Բայց դա ձեր ինքնուրույն, սուվերեն որոշումն է։ Իհարկե, հասկանում եմ, որ կան հստակ ակնկալիքներ ու սպասումներ ԵՄ-ից։ Սակայն պետք է վստահության մթնոլորտն ավելի ամրապնդել՝ խոսքերից անցնելով գործի։ ԵՄ-ում անվտանգության քաղաքականության տեսանկյունից հանդես ենք գալիս մեր հարաբերությունները խորացնելու և ամրապնդելու օգտին»,- հայտարարել է նա։
«Եվրամիությունը պետք է ավելին անի Հայաստանի համար»
Հայաստանի վարչապետի հետ հանդիպումից հետո Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը X-ի իր միկրոբլոգում գրել է․
«ժողովրդավարությունն ու ազատությունն անվտանգության կարիք ունեն։ Եվ Եվրոպական միությունը վերջապես պետք է ավելին անի Հայաստանի և Հարավային Կովկասի համար»։
Գերմանացի պաշտոնյան շնորհակալություն է հայտնել վարչապետ Նիկոլ Փաշինյանին «քաջության և վճռականության» համար։
«Նա [Փաշինյանը] դեմ է ռուսական իմպերիալիզմին և Ադրբեջանի հետ քրտնաջան աշխատում է խաղաղության պայմանագրի վրա, որը կապահովի երկու երկրների տարածքային ամբողջականությունը»,- գրել է Ռոթը։
Հետևեք մեզ — Facebook | Youtube | Telegram
Միխայել Ռոթի այցը Երևան
