«Եկեղեցին «կանաչ լույս» է վառում Վրաստանում լրագրողների նկատմամբ նոր բռնությունների համար»․ կարծիքներ
Միանձնուհու նկատմամբ բռնության մեղավորը ԶԼՄ-ներն են
«Որոշ լրատվամիջոցների, ինչպես նաև «աստվածաբանների» կամ «փորձագետների» զանգվածային և կազմակերպված հակաեկեղեցական արշավը մեծ ազդեցություն է թողնում բնակչության մի մասի վրա»,- նոյեմբերի 27-ին հայտարարել է Վրաց ուղղափառ եկեղեցու հանրային կապերի ծառայության ղեկավար Անդրիա Ջագմաիձեն: Մեկնաբանությունը կապված է Շիդա Քարթլիի շրջանի Խաշուրի թաղամասի Ցխրամուխա վանքի վրա կատարված հրեշավոր հարձակման հետ։ Միանձնուհիներին ծեծի էին ենթարկել, 70-ամյա կնոջը՝ բռնաբարել։
Ջագմաիձեի խոսքով՝ այն, ինչ տեղի է ունեցել Ցխրամուխի վանքում, «վերակենդանացնում է եկեղեցու պատմության ամենածանր հիշողությունները»։ Ջագմաիձեի խոսքով՝ դժվար է այս չլսված դեպքն անվանել այլ կերպ, քան ազգային ողբերգություն։
Նոյեմբերի 26-ին Սուրամի-Խաշուրի թեմին պատկանող Ցխրամուխի գյուղի մենաստանում 70-ամյա կնոջը կողոպտելու և բռնաբարելու մեղադրանքով երկու անձ է ձերբակալվել։ Այս մասին հայտնում են ՆԳՆ-ից։
Interpressnews-ի փոխանցմամբ՝ երկու հոգի ներխուժել են մենաստան։ Մենաստանի ղեկավարն ու մյուս միանձնուհիները դիմադրել են, սակայն ֆիզիկական բռնության են ենթարկվել։ Միանձնուհիներից մեկը բազմաթիվ վնասվածքներով տեղափոխվել է հիվանդանոց։
Խմբակային կողոպուտի և բռնաբարության փաստերի քննությունն իրականացվում է Վրաստանի Քրեական օրենսգրքի 179-րդ հոդվածի 2-րդ մասի և Վրաստանի Քրեական օրենսգրքի 137-րդ հոդվածի 3-րդ մասի համաձայն։ Գործակալության տվյալներով՝ հանցագործությունը պատժվում է մինչև 13 տարվա ազատազրկմամբ։
«Ինչո՞ւ են նրանք եկել այնտեղ։ Մարդկանց գործողություններին նախորդում է մոտիվացիան։ Սրբությունը վիրավորելը խեղաթյուրված գաղափարախոսություն է, որը ապասրբազանացման միջոցով վերացնում է բոլոր արգելքները և սրբապղծում այն, ինչը պետք է լինի մարդկանց հոգևոր կյանքի սնունդը»,— իր ֆեյսբուքյան էջում գրել է Անդրիա Ջագմաիձեն։
«Սա որոշ լրատվամիջոցների («Մտավարի արխի», «Պիրվելի» հեռուստաընկերություն, «Ֆորմուլա»), ինչպես նաև «աստվածաբանների» կամ «փորձագետների» թաքնված և լավ կազմակերպված արշավ է եկեղեցու դեմ։ Նրանք կարծում են, որ մեր երկրի փրկությունը, նրա տնտեսական վերականգնումը և քաղաքական հաղթանակները պետք է ձեռք բերվեն ուղղափառ եկեղեցու ամբողջական վերակազմավորման կամ նույնիսկ լուծարման միջոցով»,— հավելում է Ջագմաիձեն։
Պատրիարքարանի հանրային կապերի ծառայության ղեկավարը պնդում է, որ վանքի վրա հարձակումը հրահրվել է լրագրողների գործողություններով։
Հիշեցնում է 2021 թվականին լրագրողների «ներխուժումը» Մարտվիլիի պատրիարքարանի նստավայր և «զրպարտչական արշավը ԶԼՄ-ներում» Բոդբե (երկուսն էլ՝ Կախեթիի շրջանում) մենաստանի միանձնուհիների դեմ։ Պնդում է, որ «Մտավարի արխի» հեռուստաընկերությունը միանձնուհիներին մեղադրել է «սպանության կազմակերպման մեջ»։
Ջագմաիձեն ասում է, որ Մարտվիլիի նստավայր ներխուժումը կարող է լինել հետագա իրադարձությունների «փորձ».
«Այսքան տեղեկությունից հետո ի՞նչ կարող է լինել գողի գլխում, ով առանց այդ էլ չի ամաչում մարդկանցից։ Եթե նա տեսնում է, որ թույլատրելի է մշտապես մեղադրել եկեղեցուն օկուպանտ երկրի քաղաքականություն վարելու մեջ։ Եթե տեսնում է, որ լրագրողին թույլատրելի է, գտնվելով Մցխեթիի Սվետիցխովելի տաճարի բակում, հոգևորականներին անվանել «ավազակներ» («Պիրվելի» հեռուստաընկերություն)։ Եթե թույլատրելի է խափանել պատարագը (Մարտվիլիի եկեղեցում «Մտավարի Արխիի» լրագրողի կողմից) և Պատրիարքին հայտարարել երկրի թշնամի։
Աստծուց չվախեցող գողն արդյունքում ի՞նչը թույլատրելի կհամարի։ Հենց այն, ինչ տեղի ունեցավ Խաշուրիի վանքում»։
Ջագմաիձեի խոսքով՝ քրիստոնեական եկեղեցին նվաստացնելու փորձերը հանգեցնում են ընտանեկան ավանդույթների ոչնչացմանը, ինչը դրսևորվում է, մասնավորապես, բազմաթիվ ընտանեկան կոնֆլիկտներում։
«Մեր աչքի առաջ նախապատրաստվում է այն, ինչ տեղի է ունեցել եկեղեցու հալածանքների ամենադժվար փուլերում»,— գրում է Ջագմաիձեն։
- Հրաժարում պատվաստումներից, հոմոֆոբիա, ռուսամետություն․ արդյո՞ք եկեղեցին խոչընդոտում է Վրաստանի արևմտամետ ուղղվածությանը
- Վրաստան․ հատուկ ծառայությունները հետևում են եկեղեցու առաջնորդներին և նույնիսկ միանձնուհիներին
- Կորոնավիրուսն ու «Վերջին օրերի եկեղեցին»։ Ինչո՞ւ վրաց եկեղեցին չի չեղարկում պատարագները տաճարներում
Լրագրողների և իրավապաշտպանների վրդովմունքը
«Լրատվամիջոցներին մեղադրել միանձնուհու բռնաբարության մեջ՝ անզուսպ սուտ է։ Այս անամոթ շահարկումն ամբողջությամբ կեղծում է իրականությունը։ Իսկ հետո դժվար կլինի հասկանալ, թե ով ի վերջո օգտագործեց ողբերգությունը սեփական շահերի համար»,— ասում է «Tabula» ամսագրի խմբագիր Լևան Սուտիձեն։
«Այս հայտարարությունը հնչում է 2021 թվականի հուլիսի 5-ից [Թբիլիսիում լրագրողների նկատմամբ զանգվածային բռնություններից] հետո։ Ոչ մի արտահայտություն իրականությանը չի համապատասխանում, տրամաբանությունը խախտված է։ Այս ամենը վկայում է միայն մեկ բանի մասին. եկեղեցին գլխիվայր շուռ է տալիս բոլոր փաստերը և պատրաստ է մեղադրել ցանկացածին, ով իրեն չի սիրում կամ նյարդայնացնում է»,— գրում է Լևան Սուտիձեն։
2021 թվականի հուլիսի 5-ին Tbilisi Pride Week.-ի շրջանակներում Թբիլիսիում պետք է անցկացվեր Արժանապատվության երթ։ Վրաց ուղղափառ եկեղեցու պատրիարքարանը, սակայն, կոչ էր արել իր կողմնակիցներին դուրս գալ փողոց և պաշտպանել երկիրը «այլասերված կենսակերպից»: Հոմոֆոբ խմբավորումները ջարդուփշուր էին արել ընդդիմության վրանները, որոնք ամիսներ շարունակ դրված էին խորհրդարանի առջև, ինչից հետո հարձակվել էին իրադարձությունները լուսաբանող լրագրողների վրա: Տուժել էին լրատվամիջոցների մոտ 55 ներկայացուցիչներ։ Նրանցից մեկը՝ օպերատոր Լեքսո Լաշկարավան, երեք օր անց մահացել էր։
Հոգևորականները բացահայտ կերպով բռնության կոչ էին արել ներկաներին։ «Դուք պարտավոր եք բռնություն գործադրել հանուն հայրենիքի»,- դիմելով հավաքվածներին՝ ասել էր վարդապետ Սպիրիդոնը։
Փիլիսոփա Լևան Գամբաշիձեն պատրիարքարանի խոսնակ Անդրիա Ջագմաիձեին անվանել է «գողերի և ավազակների, բարոյականությունից զուրկ Ռուսաստանի գործակալների ներկայացուցիչ», իր ֆեյսբուքյան էջում գրում է.
«Միանձնուհին բռնաբարվել է, իսկ ներկայացուցիչը գողերի ու ավազակների, բարոյալքված ռուս գործակալների, ովքեր ռուսական ՊԱԿ-ի հետ միասին ծրագրել և իրականացրել են հուլիսի 5-ին [2021] Վրաստանի նորագույն պատմության ամենաանհավանական հրապարակային պատիժներից մեկը, ասում է, որ ընդդիմադիր լրատվամիջոցներն են մեղավոր։ Դու հիվանդ ես, հայրիկ»։
«Նրանք քողարկում են հանցագործներին։ Նրանք վրացական եկեղեցին վերածել են մարդասպանների, գողերի, ավազակների և բռնաբարողների ոհմակի»,— ասում է կանանց իրավունքների պաշտպան, ակտիվիստ Իդա Բախտուրիձեն։
Վրաստանի Ավետարանական բապտիստական եկեղեցու եպիսկոպոս և կանանց իրավունքների ակտիվիստ Ռուսուդան Գոցիրիձեն նույնպես արձագանքել է Facebook-ում.
«Կանանց նկատմամբ բռնություն է եղել, որը երբեք չի եղել Վրաստանում։ Բռնաբարողները հարձակվել են միանձնուհիների վրա. […] Ես նախանձում եմ նրանց, ովքեր հանգստություն են պահպանում՝ իմանալով այս հրեշավոր պատմության մասին: P.S. Վերջին յոթ տարիների ընթացքում գենդերային բռնության հետևանքով Վրաստանում մահացել է 187 կին, նրանց գրեթե կեսը սպանվել է ընտանիքի անդամների կողմից»,— գրել է Գոցիրիձեն։
«Մտավարի Արխի» լրագրող Բեկա Կորշիա.
«Եկեղեցական Անդրիա Ջագմաիձեի այսօրվա հայտարարությունը, թե միանձնուհու նկատմամբ դաժան բռնությունը ընդդիմադիր լրատվամիջոցների քարոզչության արդյունք է, չափազանց վտանգավոր և անհանգստացնող է։ Եկեղեցին «կանաչ լույս» է վառում հուլիսի 5-ին լրագրողների նկատմամբ բռնությունների կրկնության համար։ Ռուսաստանից, Իրանից և Սաուդյան Արաբիայից բացի որևէ երկիր չունի այդքան դառնացած կղերական էլիտա»:
«Դրոա» կուսակցության առաջնորդ Էլենե Խոշտարիան ասում է, որ Ջագմաիձեն, որպես «պատրիարքության ձայն», միշտ եղել է պատրիարքարանի բռնությունների և մաֆիոզ շահերի ներկայացուցիչը:
«Մյուս անգամ ի՞նչ են ասելու, իրենց շահերից ելնելով ինչպե՞ս են օգտվելու ինչ-որ մեկի դժբախտությունից և ի՞նչ նպատակ են հետապնդելու։ Այս մարդկանց համար չկա Աստված, չկա հավատ, չկա կարեկցանք, պատասխանատվություն և չկա նաև ոչինչ ազգային։
Մի խոսքով, որքան շուտ բացահայտվի այս մարդկանց մասին ավելի շատ ճշմարտություն, այնքան շուտ այս չարիքը կթուլանա, և հնարավոր է՝ նրանք չհամարձակվեն այլ բաներ անել»,— գրում է Էլենե Խոշտարիան։
Միանձնուհու նկատմամբ բռնության մեղավորը ԶԼՄ-ներն են
