Շիրակի թեմի առաջնորդը մեղավոր ճանաչվեց իշխանազավթման կոչ հնչեցնելու մեջ
Մեղադրական վերդիկտ Միքայել Սրբազանի գործով
Հայ Առաքելական եկեղեցու Շիրակի թեմի առաջնորդը մեղավոր ճանաչվեց իշխանազավթման կոչ հնչեցնելու մեջ։ Նա կշարունակի մնալ կալանքի տակ։ Քիչ առաջ դատարանը հրապարակեց մեղադրական վերդիկտը։
Միքայել արքեպիսկոպոս Աջապահյանն իրեն մեղավոր չի ճանաչում։ Պնդում է՝ տեղի է ունենում «աբսուրդ, ապօրինի, շինծու գործընթաց»։ Փաստաբանական թիմի համոզմամբ՝ մեղադրանքը չապացուցված է, գործ ունենք «քաղաքական հետապնդման» հետ։ Շեշտում են՝ դատարանը խտրական մոտեցում է ցուցաբերում հոգևորականի նկատմամբ՝ քաղաքական դրդապատճառներից ելնելով, ինչը պայմանավորված է «վարչապետ Նիկոլ Փաշինյանի նախաձեռնած հակաեկեղեցական շարժմամբ»։
«Լավատեսություն չունեմ։ Կանխատեսում եմ, որ դատավորը մեղավոր է ճանաչելու Միքայել Սրբազանին և այնպիսի վճիռ է կայացնելու, որ մինչև ընտրություններ [2026 թ․-ի խորհրդարանական] Սրբազանին պահեն փակի տակ»,- նախօրեին լրագրողների հետ զրույցում նշել էր փաստաբան Արա Զոհրաբյանը։
Դատական բոլոր նիստերի ընթացքում պաշտպանական կողմը պնդել է՝ արքեպիսկոպոսն իշխանազավթման կոչ չի հնչեցրել, պարզապես «արտահայտել է իր կարծիքը՝ վերլուծելով երկրում ստեղծված իրավիճակը»։
ՀՀ Քրեական օրենսգրքի 422-րդ հոդվածը իշխանազավթման հրապարակային կոչ հնչեցնելու համար նախատեսում է տարբեր պատիժներ՝ տուգանքից մինչև 5 տարվա ազատազրկում։ Պատժի տեսակն ու չափը կորոշվեն լրացուցիչ նիստերի ընթացքում, ինչից հետո էլ կհրապարակվի դատավճիռը։ Լրացուցիչ նիստ է նշանակվել սեպտեմբերի 29-ին։
Շիրակի թեմի առաջնորդը կալանավորվել էր գրեթե երեք ամիս առաջ՝ հունիսի 28-ին։ Հունիսի 27-ին իրավապահները ներխուժել էին թեմի առաջնորդարան, ապա Աջապահյանին այնտեղ չգտնելով՝ ուղևորվել էին Մայր Աթոռ։ Մի քանի ժամվա ընթացքում նրանց չէր հաջողվել կալանավորել հոգևորականին։ Խոչընդոտել էին Էջմիածնում հավաքված քաղաքացիները։ Աջապահյանը, սակայն, նույն օրը Քննչական կոմիտե ներկայանալու որշում էր կայացրել։
Միքայել արքեպիսկոպոս Աջապահյանի կալանավորումը տեղի էր ունեցել եկեղեցական վերնախավի և իշխանություն հակասությունների ֆոնին։ Մայր Աթոռ Սուրբ Էջմիածինը խստորեն դատապարտել էր բարձրաստիճան հոգևորականի ձերբակալությունը՝ նշելով, որ կայացված որոշումն «ուղղակի հետևանքն է վարչապետի և իշխանության բարձրաստիճան մյուս պաշտոնյաների եկեղեցահալած քաղաքականության և եկեղեցականների դեմ թշնամանքի ու ատելության խոսքի»:
Դատավարությունն ընթացավ շատ արագ։ Գործն ավարտական փուլ հասավ ընդամենը 1 ամսում՝ 10 դատական նիստերից հետո։
Այս պահին հայտնի բոլոր մանրամասները
- Նոր ուժ հին դեմքերո՞վ․ գործարար Սամվել Կարապետյանի քաղաքական հայտը
- Կոմպրոմատային շանտա՞ժ, թե՞ ուղերձ կաթողիկոսին. Փաշինյանի գրառումների հետքերով
- Գյումրին մերժե՞ց Փաշինյանին․ ավագանու ընտրությունների արդյունքները
Մի հարցազրույցի պատմություն․ ինչի՞ համար էր կալանավորվել հոգևորականը
Քրեական գործը հարուցվել է 2024 թ․-ի փետրվարի 3-ին հոգևորականի տված հարցազրույցի հիման վրա։
Վերոնշյալ հարցազրույցում արքեպիսկոպոսն ասել էր, թե ինքն իշխանություն փոխելու 3 ճանապարհ գիտի՝ ընտրություն, հեղաշրջում և ժողովրդական ապստամբություն։
Հոգևորականը խոսել էր ռազմական հեղաշրջում իրականացնելու անհրաժեշտության մասին և նշել, որ հարցը քննարկել է նաև նախկին նախագահներ Սերժ Սարգսյանի ու Ռոբերտ Քոչարյանի հետ։
«Ասի՝ լավ, Դուք, պարոն նախագահ Քոչարյան, տասը տարի նախագահ եք եղել, էդքան տարի էլ Ղարաբաղի նախագահ, Դուք կողմնակից, գաղափարակից ոչ մի գեներալ չունե՞ք ոչ բանակում, ոչ ոստիկանությունում, ոչ ԱԱԾ-ում, որ գան, Ձեր կողքը կանգնեն և հեղաշրջում իրականացնեն»,- հայտարարել էր Աջապահյանը։
Հանցակազմ չկար, հետո գտնվեց
Դեռևս նախորդ տարվա ապրիլին «Իրազեկ քաղաքացիների միավորում» ՀԿ-ն Աջապահյանի նույն հարցազրույցի հիման վրա ռազմական հեղաշրջման կոչի հատկանիշներով հանցագործության մասին հաղորդում էր ներկայացրել Գլխավոր դատախազություն։ ՀԿ ծրագրերի համակարգող Դանիել Իոաննիսյանի փոխանցմամբ՝ գերատեսչությունից նշել էին, որ հարցազրույցում չկա այնպիսի «գործողություն, որին ողջամտորեն կարող է տրվել ՀՀ Քրեական օրենսգրքով նախատեսված արարքին համապատասխանելու նախնական իրավական գնահատական»։
«Այն ժամանակ մեզ մերժեցին` պնդելով, որ հանցակազմ չկա։ Հիմա ասում են՝ հանցակազմ կա։ Դատաիրավական մարմինների անկախության այս մակարդակով հեռու չենք գնա։ Իսկ Աջապահյանի նկատմամբ քրեական հետապնդումը պետք է լիներ այն ժամանակ, երբ ինքն արել էր այդ արարքը, ոչ թե հիմա, երբ իշխանությունն ընկել է որոշ եկեղեցականների հետևից»,- դեռևս հունիսին արձանագրել էր Իոաննիսյանը։
Ինչպե՞ս ստացվեց, որ ամիսներ անց իրավապահ մարմինները հանցակազմ գտան Աջապահյանի արած հայտարարություններում։ Ասում են՝ «էական նշանակություն ունի, թե անձը երբ և որ իրադրությունում է նման հայտարարություն կատարում»։
Քննչական կոմիտեի նախագահ Արթուր Պողոսյանն ուշադրություն էր հրավիրել այն հանգամանքի վրա, որ հոգևորականը կրկնել է «հեղաշրջման կոչը» նաև 2025 թ,-ի հունիսի 21-ին։ Դա տեղի է ունեցել Հայաստանում պետական հեղաշրջման փորձի բացահայտման ֆոնին և մի իրադրությունում, երբ «նախաքննական մարմնի տրամադրության տակ կային տվյալներ, որ գործընթացում պետք է ներգրավվեն նաև որոշ հոգևորականներ»։
«Բնականաբար, ի՞նչ պիտի անեինք։ Որպես պետական մարմին՝ պետք է սա որպես առիթ դիտարկեինք և նախաձեռնեինք քրեական վարույթ»,- նկատել էր Պողոսյանը։
Ի՞նչ պատիժ է նախատեսում օրենքը
ՀՀ Քրեական օրենսգրքի (հոդված 422․ 2) համաձայն՝ եթե իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչը կատարվել է հրապարակայնորեն, այսինքն՝ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով, ապա նախատեսվում են պատժի հետևյալ տեսակները՝
- տուգանք՝ [նվազագույն ամսական աշխատավարձի] քսանապատիկից հիսնապատիկի չափով,
- հանրային աշխատանքներ՝ 150-270 ժամ տևողությամբ,
- ազատության սահմանափակում՝ 1-3 տարի ժամկետով,
- կարճաժամկետ ազատազրկում՝ 1-2 ամիս ժամկետով,
- ազատազրկում՝ 2-5 տարի ժամկետով:
«Ուրախ եմ, որ մեղադրյալի աթոռին եմ»․ եզրափակիչ խոսք
Միքայել արքեպիսկոպոս Աջապահյանը նախօրեին նիստերի դահլիճում հանդես էր եկել եզրափակիչ խոսքով։ Նշել էր՝ մի շարք անպատասխան հարցեր ունի, այդ թվում՝ ինչո՞ւ իր հայտարարությունների մասին իշխանությունները հիշեցին հենց հունիսին, ինչո՞ւ «շոու» կազմակերպեցին Էջմիածնում, ինչո՞ւ խուզարկություն իրականացրին թեմի առաջնորդարանում առանց իրեն ծանուցելու և առանց իր փաստաբանի ներկայության, ինչո՞ւ դատավարությունը չիրականացրին Շիրակի մարզում։
«Ինչո՞ւ չեն հարցաքննվել վկաներ, այդ թվում՝ նախկին նախագահներն ու լրագրողներ [տվյալ հարցազրույցին մասնակցած]»,- հարցրել է նա։
Հոգևորականի խոսքով՝ իր հանդեպ մեղադրանքներ են հնչում նաև նիստերի դահլիճից դուրս, մասնավորապես՝ այն մասին, թե ինչու ներողություն չի խնդրում․
«Ինչո՞ւ չեմ ասում՝ վայ, ներեցեք, մեղմ վերաբերվեք, տարիքս մեծ է, հիվանդություններ ունեմ, վաստակ ունեմ, սխալ եմ ասել․․․ Որովհետև սխալ բան չեմ ասել։ Ինչ ասել եմ, լավ եմ արել, ոչ մի կոչ էլ չի եղել»։
Շեշտել է՝ իր համար պատիվ է լինել հենց մեղադրյալի աթոռին, քանի որ չէր ցանկանա լինել ոչ պաշտպանական կողմի փոխարեն, ոչ էլ մեղադրող, և հատկապես՝ իշխանությունների փոխարեն, որոնք «զրոյացրել են և՛ 1992-94թթ. իմ եղբայրների ձեռքբերումները, և՛ 2020թ.-ի 18 տարեկան տղաների՝ իմ զավակների նահատակությունը»։
«Ես ամենաշահեկան տեղում եմ։ Ուրախ եմ, որ մեղադրյալի աթոռին եմ այս հանգամանքներում և այս պայմաններում։ Այս իշխանության պայմաններում մեղադրյալ լինելը, նաև քաղաքական պատճառներով, միայն պատիվ է և ուրախություն, երջանկություն»,- ամփոփել է Շիրակի թեմի առաջնորդը։
Հետևեք մեզ — Facebook | Youtube
Մեղադրական վերդիկտ Միքայել Սրբազանի գործով
