Մեծ Բրիտանիայում տեղի ունեցած քիմիական գրոհի մեջ կասկածվում է երկու ռուսաստանցի

Բրիտանիայի ոստիկանությունը նշել է երկու ռուսաստանցիների անունները, որոնց կասկածում է այս տարվա մարտին ռուսական հատուկ ծառայությունների նախկին աշխատակից Սերգեյ Սկրիպալի  և նրա դստեր թունավորման մեջ, հաղորդում է Բի-Բի-Սին:

«Բավականաչափ հիմքեր կան Ռուսաստանի քաղաքացի Ալեքսանդր Պետրովին և Ռուսլան Բոշիրովին մեղադրանք ներկայացնելու համար, այդ թվում՝ Սոլսբերիում թունավոր գազի օգնությամբ սպանություն կատարելու նպատակով դավադրության համար», — ասված է ոստիկանության հայտարարությունում:

Հարցի պատմությունը

Ռուսաստանի Գլխավոր հետախուզական վարչության նախկին գնդապետ Սերգեյ Սկրիպալն ու նրա դուստր Յուլյան անգիտակից վիճակում հայտնաբերվել էին մարտի 4-ին Սոլսբերի քաղաքի պուրակի նստարանին: Փորձագետները պարզել էին, որ նրանք թունավորվել են Ռուսաստանում մշակված «Նովիչոկ» նյարդապարալիտիկ նյութից:

Դրանից անմիջապես հետո Թերեզա Մեյը Մոսկվայից բացատրություններ էր պահանջել կատարվածի վերաբերյալ:

Սկրիպալների թունավորումը Բրիտանիայի և Ռուսաստանի միջև հարաբերությունների լուրջ սրացման էր հանգեցրել. Լոնդոնը վտարել էր 23 ռուս դիվանագետի, Մոսկվան նույն կերպ էր պատասխանել: Շուտով տասնյակ երկրներ Բրիտանիային աջակցելու համար հայտարարել էին ռուս դիվանագետներին իրենց երկրից վտարելու մասին:

Ամենախիստ պատժամիջոցները կիրառել էր ԱՄՆ-ն. դրանք վերաբերում են Ռուսաստանին ժամանակակից տեխնոլոգիաներ մատակարարելուն և ռուսական բանկերի ֆինանսավորմանը:

Հունիսի 30-ին Սոլսբերիից ոչ հեռու Էյմսբերի քաղաքում հոսպիտալացվեց 44-ամյա Դոն Սթերջեսը, որը նյարդապարալիտիկ նյութի չափաբաժին էր ստացել: Նա մահացավ հուլիսի 8-ին: Նրա ընկերը՝ 45-ամյա Չարլի Ռոուլին, նույնպես թունավորվել էր, սակայն նա կենդանի է մնացել:

Նախօրեին Քիմիական զենքի արգելման կազմակերպությունը հայտարարել է, որ Դոն Սթերջեսը նույնպես մահացել է «Նովիչոկից»:

Ովքե՞ր են թունավորողները

Ինչպես նշվում է ոստիկանության հաղորդագրությունում, մարտի 2-ին երկու ռուսաստանցի է Լոնդոն ժամանել Մոսկվայից և կանգ առել City Stay Hotel հյուրանոցում: Հաջորդ առավոտյան նրանք գնացքով Սոլսբերի են մեկնել և Լոնդոն վերադարձել նույն օրը երեկոյան:

Մարտի 4-ին կասկածյալները կրկին նույն երթուղով Սոլսբերի են մեկնել, որտեղ նրանց ֆիքսել են Սկրիպալների տան մոտ գտնվող տեսանկարահանման սարքերը: Քննիչները ենթադրում են, որ նրանք «Նովիչոկ» նյարդապարալիտիկ նյութով թունավորել են մուտքի դռան բռնակը:

Նույն օրը երեկոյան նրանք Լոնդոն են վերադարձել և Մոսկվա մեկնել:

Ուղիղ մեկ ամիս անց՝ մայիսի 4-ին, հյուրանոցի սենյակը, որում մնացել են ռուսաստանցիները, հետազոտվել է քիմիական պաշտպանության մասնագետների կողմից, որոնք այնտեղ հայտնաբերել են «Նովիչոկի» նմուշներ մարդու առողջության համար վտանգ չներկայացնող քանակով:

Արձագանքը

Ինչպես հաղորդում է Բրիտանիայի թագավորական դատախազությունը, ռուսաստանցիների կալանքի համար եվրոպական թույլտվություն է տրվել, սակայն նրանց արտահանձնման հարցում չի լինելու:

«Մենք Ռուսաստանին չենք դիմելու այդ քաղաքացիներին արտահանձնելու խնդրանքով, քանի որ ռուսական սահմանադրությունը թույլ չի տալիս արտահանձնել իր երկրի քաղաքացիներին», — բացատրել է դատախազության ներկայացուցիչը:

Ռուսաստանի ԱԳՆ պաշտոնական ներկայացուցիչ Մարիա Զախարովան կոչ է արել Լոնդոնին զերծ մնալ «հանրային մեղադրանքներից և տեղեկատվական մանիպուլյացիաներից»:

«Լրատվամիջոցներում հրապարակված անուններն, ինչպես նաև լուսանկարները, մեզ ոչինչ չեն ասում», — նշել է Զախարովան:

Քիմիական զենքի արգելման կազմակերպությում Ռուսաստանի մշտական ներկայացուցիչ Ալեքսանդր Շչուլգինը Լոնդոնի հրապարակած տվյալները սադրանք է անվանել: