«Եթե կրիպտոարժույթի մայնինգի հարցը չլուծվի, Աբխազիան կխարխափի խավարում». կարծիք
Մայնինգը Աբխազիան թողել է առանց լույսի
Ինգուր ՀԷԿ-ի ամբարտակում ջրի մակարդակի կտրուկ անկման և Ռուսաստանից էլեկտրաէներգիա գնելու միջոցների անբավարարության պայմաններում Աբխազիան ապրում է վերջին տարիների ամենալուրջ էներգետիկ ճգնաժամը։
Ցերեկային ժամերին հանրապետությունում լույսը միացնում են ընդհանուր առմամբ 4 ժամ 40 րոպե։ Գիշերվա համար էլեկտրաէներգիան դեռևս կա․ այն գնում են Ռուսաստանից փոքր խմբաքանակներով՝ երկու-երեք օրվա համար։ Եվ վերջին այդպիսի «մասնաբաժնի» վրա ծախսվել է այն ամենը, ինչ դեռ մնացել էր պետական գանձարանում։
Պատճառներից մեկը, որը Աբխազիային հասցրել է այսպիսի վիճակի, կրիպտոարժույթի մայնինգն է։ Իշխանությունները սկզբում օրինականացրին այն, սակայն հետագայում այլևս չկարողացան արգելել. ապօրինի մայնինգի պատճառով հանրապետության էլեկտրաէներգիայի սպառումն աճել է մեկուկես անգամ։
Կրիպտոարժույթի մայնինգը ենթադրում է այնպիսի գործողությունների իրականացում, որոնց արդյունքում կրիպտոարժույթի ձեռքբերման գործարքն ստուգվում և գրանցվում է բլոկչեյնում կամ թողարկվում է նոր կրիպտոարժույթ: Բլոկչեյնը թվային ապակենտրոնացված հանրայնորեն հասանելի ռեգիստր է, որտեղ մայնինգով զբաղվող անհատները ժամանակագրական հաջորդականությամբ գրանցում են կրիպտոարժույթի հետ կապված բոլոր գործարքները:
Օրերս վրդովված կանանց մի խումբ այցելել էր էներգետիկայի նախարար Ջանսուխ Նանբային և կարծիք հայտնել նախարարի աշխատանքի վերաբերյալ։ Աբխազիայում JAMnews-ի խմբագիր, «Չեգեմսկայա պրավդայի» խմբագիր Ինալ Հաշիգը սա համարում է վկայություն այն բանի, որ սպառվում են ոչ միայն ֆինանսական միջոցներն ու էլեկտրաէներգիայի պաշարները, այլև ժողովրդի համբերությունը:
Մեկնաբանություն
Ինալ Հաշիգ. «Այն գումարներով, որ Աբխազիան միայն այս տարի վճարել է Ռուսաստանից էլեկտրաէներգիայի ձեռքբերման համար, հնարավոր էր վերականգնել Ինգուր գետի վրա գտնվող երեք ՀԷԿ-երից առնվազն մեկը և այդ կերպ զգալիորեն կրճատել առաջացած պակասուրդը։
Սակայն կառավարությունն այդ ՀԷԿ-երի հետ կապված իր պլաններն ուներ։
Կա՛մ նրանք ուզում էին դրանք մայնինգի համար տրամադրել, կա՛մ չէին կարողանում գտնել վարձակալ, որը բյուջեին ամենաքիչ վարձավճարը կառաջարկեր։ Իսկ այդ դեպքում հայտարարված և իրական արժեքի տարբերությունը կգնար ուղիղ պաշտոնյայի անձնական գրպանը։
Արդյունքում ունենք այն, ինչ ունենք և ինչին արժանի ենք։
Այժմ «Չերնոմորէներգոյի» ղեկավարը հայտարարում է, որ մայնինգը կլանում է 350 միլիոն կՎտ/ժ։ Դա առաջացած պակասուրդի կեսից ավելին է։ Այլ կերպ ասած՝ իշխանությունների անփութության պատճառով մայնինգը «գողանում է» ամեն օր հանրապետության կողմից սպառվող էլեկտրաէներգիայի ինը ժամը։
Եվ եթե մայնինգի դեմ պայքարի շրջանակներում իրական գործողություններ չձեռնարկվեն, Աբխազիան պարզապես կխարխափի խավարում։
Անկասկած, բոլոր խոշոր մայնինգ ֆերմաների մասին տեղեկատվությունն առկա է թե՛ ուժային կառույցների, թե՛ էներգետիկների մոտ։ Մնում է փոքր բան՝ փակել այդ ֆերմաները։
Իսկ եթե ՆԳՆ-ի և Պետանվտանգության ծառայության ղեկավարները նշում են, որ ոչինչ չգիտեն խոշոր ֆերմաների մասին, ուրեմն գործ ունենք այս կամ այն տեսակի գործարքի հետ։ Բոլոր դեպքերում նրանք պարզապես պետք է հրաժարական տան, իսկ ազատված տեղերում նշանակվեն անձինք, ովքեր կլուծեն մայնինգ ֆերմաները փակելու խնդիրը։
Ուսերը թոթվել և անզոր ձևանալ այլևս չի ստացվի»։
