ՄԱԿ-ը չի ընդունում Աբխազիայում և Հարավային Օսիայում անցկացրած ընտրությունները

Աբխազիայի և Հարավային Օսիայի անցակետերի փակումն ու դրանց զինված ուժերի միավորումը ռուսականի հետ, Ցխինվալի հանրաքվեն քննարկվել է երկուշաբթի ՄԱԿ Անվտանգության խորհրդի փակ նիստում:

Վրաստանի հետ կապված այս հարցերը օրակարգում ներառվել են Ուկրաինայի նախաձեռնությամբ: Այդ երկիրն, ի տարբերություն Վրաստանի, ՄԱԿ Անվտանգության խորհրդի անդամ է: Ուկրաինան համարում է, որ թվարկված գործողությունները կապված են վրացական տարածքների օկուպացիան «օրինականացնելու» Ռուսաստանի փորձերի հետ:

«Քանի դեռ Ուկրաինան Անվտանգության խորհրդի անդամ է, վրացական թեման չի մոռացվելու», — հայտարարել է ՄԱԿ-ում Ուկրաինայի մշտական ներկայացուցիչ Վլադիմիր Իլչենկոն: Նրա խոսքով՝ Անվտանգության խորհրդի անդամների մեծ մասը համարում է, որ Աբխազիայի և Հարավային Օսիայի իրականացրած վերջին գործողություններն անհանգստություն են առաջացնում և մարդու իրավունքների համար վտանգ են ստեղծում տարածաշրջանում:

Իլչենկոն զուգահեռ է անցկացրել Ղրիմի հետ և այն եզրահանգման է եկել, որ Աբխազիայի և Հարավային Օսիայի հակամարտությունն, ի հեճուկս տարածված կարծիքի, սառեցված չէ:

«Անվտանգության խորհրդի անդամների մեծ մասը Ռուսաստանի գործողությունների վերաբերյալ մեկնաբանություններով է հանդես եկել, և Անվտանգության խորհրդի բոլոր անդամները, մեկից բացի, աջակցում են Վրաստանի տարածքային ամբողջականությանն ու ինքնիշխանությանը»:

Ուկրաինայի պատվիրակությունն Անվտանգության խորհրդից պահանջել է մամուլի համար հատուկ հայտարարություն անել Աբխազիայի և Հարավային Օսիայի հետ կապված իրավիճակի վերաբերյալ, սակայն այդ նախաձեռնությունն արգելափակել է Ռուսաստանը:

Եվ դա հաստատում է նաև ՄԱԿ-ում Մեծ Բրիտանիայի մշտական ներկայացուցիչ Մեթյու Ռայքրոֆթը. «Ես մեր անհանգստությունն եմ հայտնել Վրաստանում տեղի ունեցող իրադարձությունների կապակցությամբ, այդ թվում՝ Աբխազիայի հետ վարչական սահմանին վրացական ուղղությամբ անցակետերի փակման վերաբերյալ, ինչը խախտում է տեղի բնակչության ազատ տեղաշարժվելու իրավունքը: Մենք չենք ճանաչում մարտի 12-ին Աբխազիայում կայացած խորհրդարանական ընտրությունները: Մենք չենք ճանաչում նաև Հարավային Օսիայում անցկացված նախագահական ընտրություններն ու երկրի անվանումը փոխելու հանրաքվեն», – «Ամերկայի ձայնին» հայտարարել է բրիտանացի դեսպանն Անվտանգության խորհրդի նիստի ավարտից հետո:

Ռուսական պատվիրակությունը չի կիսում Անվտանգության խորհրդի մյուս անդամների դիտարկումները:

«Բոլորը պետք է սովորեն նրան, որ Աբխազիան և Հարավային Օսիան անկախ երկրներ են», – հայտարարել է ՄԱԿ-ում Ռուսաստանի դեսպանի ժամանակավոր պաշտոնակատար Պյոտր Իլյիչևը:

– Վերջին մի քանի շաբաթվա ընթացքում Մոսկվան լրավցուցիչ զինվորական տեխնիկա է մտցրել Աբխազիա և Հարավային Օսիա, ինչպես նաև Հարավային Օսիայի զինվորական ստորաբաժանումները միավորել է իր զինվորական համակարգին: Դրա հետ մեկտեղ փակվել են Աբխազիայի վարչական սահմանի անցակետերը, ինչը խոչընդոտում է քաղաքացիների տեղաշարժը:

– Ապրիլի 9-ին Հարավային Օսիայում նախագահական ընտրություններ կկայանան և միաժամանակ հանրաքվե կանցկացվի Հարավային Օսիան Ալանիայի Պետություն վերանվանելու վերաբերյալ: Ըստ պաշտոնական տվյալների՝ 2017թ-ի դրությամբ Հարավային Օսիայում 55 հազար մարդ է ապրում, որոնցից 39 հազարը ձայնի իրավունք ունի: