60 զոհ՝ երեք ամսում․ ՃՏՊ-ների մտահոգիչ պատկեր Հայաստանում
ՃՏՊ-ների մտահոգիչ պատկեր Հայաստանում
2025 թվականի առաջին եռամսյակում Հայաստանում 988 ճանապարհատրանսպորտային պատահար է գրանցվել։ Զոհվել է 60 մարդ, վիրավորվել՝ 1391-ը։
«Եթե շատ կոպիտ վիճակագրություն ներկայացնենք, ապա ստացվում է՝ 10 տարվա ընթացքում խաղաղ պայմաններում մոտ 3 միլիոն բնակչություն ունեցող երկրում մենք ունենում ենք ավելի քան 3600 զոհ և մոտ 70 հազար վիրավոր»,- հայտարարել է ԱԺ պատգամավոր, իշխող «Քաղաքացիական պայմանագիր» կուսակցության ներկայացուցիչ Արմեն Խաչատրյանը։
Պատգամավորի փոխանցմամբ՝ այդ շուրջ 70 հազար վիրավորներից 2-3 հազարը, իրենց հերթին, ձեռք են բերում ցմահ հաշմանդամություն։
Ազգային ժողովում այսօր «Ճանապարհային երթևեկության անվտանգությունը ՀՀ-ում» թեմայով լսումներ էին հրավիրվել։ Պատգամավորները կարծում են՝ նման քննարկումների արդյունքում հնարավոր կլինի վերհանել ոլորտում առկա խնդիրները, դրանց համար առաջարկել համակարգային լուծումներ։
«Այս լսումների արդյունքում շատ հնարավոր է սկսենք մտածել տվյալ ոլորտի ռազմավարություն ունենալու շուրջ»,- արձանագրել է ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։
- Էկոպարեկային ծառայություն Հայաստանում. բնության պահպանություն 24/7 ռեժիմով
- Հայաստանում կկրկնապատկվի շահումով խաղերի ոլորտի պետական տուրքը
- ՀՀ-ն տարածաշրջանի առաջատարն է ժողովրդավարության հարցում՝ չնայած հետընթացին. զեկույց
Նախորդ տարի ՃՏՊ-ների զոհ է դարձել 333 մարդ
Պատգամավոր Արմեն Խաչատրյանի փոխանցմամբ՝ միայն 2024 թվականին Հայաստանում տեղի է ունեցել 4314 ճանապարհատրանսպորտային պատահար։ Զոհվել է 333 մարդ, վիրավորվել՝ 6116-ը։ Այս վիճակագրության մեջ, սակայն, ներառված չեն գույքային վնասով պատահարները։
«Միայն 2024 թ․-ի ընթացքում գրանցվել է մոտ 72 հազար գույքային վնասով ՃՏՊ։ Նույն տարում ապահովագրական ընկերությունները փոխհատուցել են ավելի քան 20 միլիարդ դրամ»,- նշել է Խաչատրյանը։
Նրա համոզմամբ՝ միջազգային համեմատության մեջ Հայաստանի ցուցանիշները լավագույն դեպքում միջին են, ինչը «մտահոգիչ է և անբավարար»։
2023 թվականին Հայաստանում ճանապարհատրանսպորտային պատահարներից զոհվել է 379 մարդ։
Միջոցառումներ ձեռնարկվում են, արդյունքները բավարար չեն
ԱԺ Պաշտպանության և անվտանգության հարցերի հանձնաժողովի նախագահ Անդրանիկ Քոչարյանը լսումների ժամանակ հայտարարել է․
«Տարեկան կտրվածքով յուրաքանչյուր օր ՃՏՊ զոհ է դառնում միջինում մեկ մարդ, վիրավորվում՝ 16 մարդ»։
Պատգամավորի խոսքով՝ ձեռնարկվում են միջոցառումներ ենթակառուցվածքների և երթևեկության կառավարման բարելավման ուղղությամբ, սակայն արդյունքները բավարար չեն։ Շեշտում է՝ դեռ չի հաջողվել առավելագույնս չեզոքացնել բացասական հետևանքները։
Ասում է՝ պատահարների պատճառների շարքում են ինչպես ոլորտի կառավարման ու ենթակառուցվածքային բացերը, այնպես էլ երթևեկության մասնակիցների անբավարար տեղեկացվածությունն ու պատասխանատվության պակասը։
Քոչարյանը կարևորում է երթևեկության մշակույթի ձևավորումը՝ սկսած հանրակրթական հաստատություններից, ինչպես նաև երթևեկության անվտանգության ապահովման հարցում հասարակության առավել պատասխանատու վարքագծի ձևավորումը։
«Առանց հանրային տրանսպորտի անհնար է հասնել երթևեկության անվտանգության»
Քննարկումների ընթացքում անդրադարձ է կատարվել նաև վերջին տարիներին հանրապետությունում տրանսպորտային միջոցների քանակի զգալի աճին։ Իշխող թիմի ներկայացուցիչ Արմեն Խաչատրյանը հայտարարել է՝ երկրի բնակչությունը չնչին չափով է ավելանում, այնինչ անձնական մեքենաների քանակը վերջին մի քանի տարիների ընթացքում կրկնապատկվել է․
«Ինչո՞ւ է ավելանում տրանսպորտային միջոցների քանակը ՀՀ-ում։ Որովհետև չկա պատշաճ, կանխատեսելի, հարմարավետ հասարակական տրանսպորտ»։
Շեշտում է՝ եթե երկրում չլինի կանխատեսելի, հարմարավետ և անվտանգ հասարակական տրանսպորտ, ապա երթևեկության անվտանգության ցանկալի մակարդակին հասնելը պարզապես անհնար կլինի։
Ըստ Խաչատրյանի՝ հանրային տրանսպորտի բարեփոխումները պետք է ուղղված լինեն բոլոր քաղաքացիների սպասարկմանը ՝ անկախ սոցիալական վիճակից։ Ասում է՝ պատգամավորներն ու նախարարները նույնպես պետք է օգտվեն հանրային տրանսպորտից․
«Բարեփոխումները սկսվել են Երևանից։ Բայց դրանց արդյունքը պետք է լինի հետևյալը․ մարդը պետք է վստահ լինի, որ օրինակ՝ ժամը 09։00-ին նստելով ավտոբուս՝ ժամը 9։40-ին կլինի նպատակակետում»։
Միասնական ռազմավարության մշակման կարիք կա
Ազգային ժողովի պատգամավորների համոզմամբ՝ ճանապարհային երթևեկության անվտանգության ապահովման համար Հայաստանը պետք է իրականացնի համակարգված կառավարում։ Խնդրահարույց են համարում այն, որ պետական տարբեր կառույցների գործողությունների մեջ սինխրոնություն չկա։
«Տարածքային կառավարման և ենթակառուցվածքների նախարարությունն առանձին է իրականացնում քաղաքականություն, ՆԳՆ-ն՝ առանձին, ՏԻՄ-երն էլ, իրենց հերթին՝ առանձին։ Արդյունքում չկա միասնական մոտեցում»,- շեշտել է պատգամավոր Արմեն Խաչատրյանը։
Նրա դիտարկմամբ՝ նման կարևոր հարցում պետությունը պետք է ունենա կենտրոնացված քաղաքականություն։ Եվ դրա համար անհրաժեշտ է նաև ստեղծել համապատասխան իրավական դաշտ։
«Պետք է ընդունել ճանապարհային երթևեկության անվտանգության ռազմավարություն, որի համաձայն էլ կիրականացվի միասնական, համապարփակ պետական քաղաքականություն»,- մանրամասնել է նա և հավելել՝ միայն փաստաթղթի ընդունումից հետո կհստակեցվեն այս ոլորտում պետական քաղաքականության հիմնական ուղղություններն ու պատասխանատու մարմինները։։
«Անհրաժեշտության դեպքում պետք է քննարկել նաև վերգերատեսչական մարմնի ստեղծման հարցը, որը կհամակարգի բոլոր մարմինների աշխատանքը և կիրագործի միասնական քաղաքականություն»,- ամփոփել է նա։
Տարածքային կառավարման և ենթակառուցվածքների փոխնախարարի խոսքով՝ վերջին տարիներին միջգերատեսչական համագործակցության զգալի առաջընթաց է գրանցվել։
«Վարչապետի որոշմամբ և փոխվարչապետ Տիգրան Խաչատրյանի գլխավորությամբ ձևավորվել է համապատասխան միջգերատեսչական հանձնաժողով։ Սա ուղղված է համագործակցության խորացմանը և բարեփոխումների օրակարգի ձևավորմանը»,- նկատել է փոխնախարար Քրիստինե Ղալեչյանը։
Նրա խոսքով՝ միջգերատեսչական համագործակցության արդյունքում արդեն հասցրել են համատեղ միջոցառումներ իրականացնել Ներքին գործերի և ԿԳՄՍ նախարարությունների, Քաղաքաշինության կոմիտեի, ինչպես նաև մի շարք ՀԿ-ների հետ։
Հետևեք մեզ — Facebook | Youtube | Telegram
ՃՏՊ-ների մտահոգիչ պատկեր Հայաստանում
