Նոր ԿԸՀ, կրկնակի ընտրություններ. ճգնաժամից դուրս գալու Զուրաբիշվիլիի ծրագիրը
Ճգնաժամից դուրս գալու Զուրաբիշվիլիի ծրագիրը
Վրաստանի նախագահ Սալոմե Զուրաբիշվիլին հատուկ ճեպազրույցի ժամանակ հայտարարել է, որ քաղաքական ճգնաժամից դուրս գալու համար անհրաժեշտ է նշանակել խորհրդարանական կրկնակի ընտրություններ՝ նախապես փոփոխելով ընտրական օրենսգիրքը և ձևավորելով նոր Կենտրոնական ընտրական հանձնաժողով, ինչպես նաև հատուկ դատարան՝ ընտրական վեճերի քննության համար։ Զուրաբիշվիլիի կարծիքով՝ այդ ամենը պետք է արվի միջազգային գործընկերների աջակցությամբ և մասնակցությամբ։
Բացի այդ, նախագահը Սահմանադրական դատարան կներկայացնի հայց ընտրությունների գաղտնիության և թափանցիկության խախտման վերաբերյալ։ Ընդ որում, նախագահը շեշտում է, որ չի հավատում արդար վճռի, քանի որ «այս երկրում այլևս ոչ մի հաստատություն անկախ չէ», սակայն այս հայցը կլինի նշան, որ ոչ մի իրավական վեճ չպետք է մնա առանց քննարկման։
Ընդդիմության առաջնորդներից Գիորգի Վաշաձեի խոսքով՝ ընդդիմությունն ամբողջությամբ կիսում է նախագահի դիրքորոշումը։
«Այս ընտրությունները չեն ճանաչվել ո՛չ երկրի ներսում, ո՛չ նրա սահմաններից դուրս, ո՛չ ընդդիմության, ո՛չ նախագահի կողմից, և այսօր Վրաստանը կառավարում են ինքնակոչները։ Ուստի մեր պայքարը կլինի մինչև վերջ, որպեսզի դուք՝ վրաց ժողովուրդը, հաղթեք»,- ավելի վաղ Թբիլիսիի պետական համալսարանի դիմաց կայացած բողոքի ակցիայի ժամանակ հայտարարել էր Վաշաձեն։
Հիշեցնենք, որ հոկտեմբերի 26-ին Վրաստանում տեղի են ունեցել խորհրդարանական ընտրություններ, որոնց արդյունքում, ըստ ԿԸՀ-ի տվյալների, իշխող «Վրացական երազանք» կուսակցությունը ստացել է ձայների 54 տոկոսը։ Սա 12 տոկոսով ավելի է, քան ցույց էին տալիս էքզիթ փոլերը։ Ընդդիմությունը և քաղաքացիական հասարակությունը համոզված են, որ ընտրությունների արդյունքները կեղծվել են։ Նրանք հրաժարվում են ճանաչել նոր խորհրդարանի լեգիտիմությունը։ Արդեն մի քանի օր է, ինչ Թբիլիսիում բողոքի ակցիաներ են անցկացվում։ Միջազգային կազմակերպություններն իրենց հերթին «Վրացական երազանքին» կոչ են անում իրականացնել մանրակրկիտ հետաքննություն ընտրությունների ընթացքում հնարավոր խախտումների փաստերի վերաբերյալ։
