«Մարզման ժամանակ վնասել է ուսը»․ ու՞ր է անհետացել Վրաստանի նախկին վարչապետ Ղարիբաշվիլին
Ղարիբաշվիլին հիվանդանոցում է
Իշխող «Վրացական երազանքը» հաստատել է, որ կուսակցության նախագահ, Վրաստանի նախկին վարչապետ Իրակլի Ղարիբաշվիլին առողջական խնդիրների պատճառով հոսպիտալացվել է Թբիլիսիի «Ամերիկյան հոսպիտալ» կլինիկայում։
Կուսակցության պարզաբանմամբ՝ Ղարիբաշվիլին «մարզման ժամանակ վնասել է ուսը», ինչի պատճառով «աննշան բժշկական օգնություն» է պահանջվել։
Ղեկավարությանը ստիպված է եղել նման հայտարարությամբ հանդես գալ այն բանից հետո, երբ վրացական լրատվամիջոցներում հայտնվել է տեղեկություն այն մասին, որ նախկին վարչապետին հիվանդանոց են տեղափոխել բազմաթիվ վնասվածքներով։
Բժշկական ոլորտի երկու աղբյուրներ JAMnews-ի հետ զրույցում հաստատել են, որ նախկին վարչապետն իսկապես գտնվում է հիվանդանոցում։
Այս տեղեկատվությունը դեկտեմբերի 10-ին առաջինը տարածել էր ընդդիմադիր «Մտավարի արխի» հեռուստաալիքը։
Տեղեկատվության մեջ նշվում էր, որ Ղարիբաշվիլին ենթարկվել է ֆիզիկական բռնության իր թիմակիցների կողմից։ Թե կոնկրետ ով է նրան ծեծի ենթարկել՝ չէր հաղորդվում։
«Տեղեկություններ կան օլիգարխ Իվանիշվիլիի ղեկավարությամբ գործող իշխող «Վրացական երազանք» կուսակցության թիմում ենթադրյալ ֆիզիկական բախման մասին»,- հաղորդել էր «Մտավարի» հեռուստաալիքը։
Վերջերս Բիձինա Իվանիշվիլիի նախկին մերձավոր անձանցից մեկը՝ Գիորգի Բաչիաշվիլին, որին լրատվամիջոցները կոչում են «օլիգարխի անձնական բանկիր», հայտարարել էր, որ Իրակլի Ղարիբաշվիլին «արդեն ավելի քան երկու շաբաթ չի եկել կուսակցության գրասենյակ»։
Բաչիաշվիլիի վարկածի համաձայն՝ Ղարիբաշվիլին դուրս է եկել կուսակցության կազմից և կոնֆլիկտ է ունեցել ներկայիս վարչապետ Իրակլի Կոբախիձեի հետ։
Ասում է, որ Ղարիբաշվիլին 2024 թվականի փետրվարին ազատվել է վարչապետի պաշտոնից, քանի որ հրաժարվել է երկրորդ անգամ նախաձեռնել «օտարերկրյա գործակալների մասին» օրենքը։
Գիորգի Բաչիաշվիլիի խոսքով՝ կոնֆլիկտն ավելի է սրվել նախագահի պաշտոնում Միխեիլ Կավելաշվիլիի թեկնածությունն առաջադրելուց հետո, ինչն անընդունելի քայլ էր իշխող կուսակցության անդամներից շատերի համար։
Նա պնդում է, որ կուսակցության հետ հակամարտության մեջ է նաև արդարադատության և մշակույթի նախկին նախարար, «Վրացական երազանքի» ամենափորձառու և հակասական կերպարներից մեկը՝ Թեա Ցուլուկիանին։ Համարվում էր, որ նա կուսակցության պատվավոր նախագահ, օլիգարխ Բիձինա Իվանիշվիլիի մերձավոր շրջապատի ներկայացուցիչ է։
Դեկտեմբերի 10-ին Բաչիաշվիլին ընդդիմադիր «Պիրվելի» հեռուստաալիքիի հետ զրույցում հայտարարել է. «Այսօր հայտնի դարձավ, որ Ղարիբաշվիլին տարբեր վնասվածքներով գտնվում է վնասվածքաբանության կենտրոնում։ Չգիտեմ՝ դա ինչի հետ է կապված, բայց խորհրդավոր պատմություն է»։
Ղարիբաշվիլիի՝ ամերիկյան հիվանդանոցում բուժվելու փաստը հաստատում է նաև «Ազատություն» ռադիոկայանի վրացական խմբագրության աղբյուրը։ Աղբյուրի փոխանցմամբ՝ Ղարիբաշվիլին վնասվածքի պատճառով դիմել է վնասվածքաբանի։
Իրակլի Ղարիբաշվիլին երկու անգամ զբաղեցրել է կառավարության ղեկավարի պաշտոնը։ Առաջին անգամ նա վարչապետ է դարձել 2013 թվականին, սակայն երկու տարի անց՝ 2015 թվականին, հանկարծակի լքել է պաշտոնը։ Հետագայում նա նույն պաշտոնին է նշանակվել 2021 թվականի փետրվարի 18-ին՝ գործող վարչապետ Գիորգի Գախարիայի հրաժարականից հետո։ Այժմ Գախարիան ընդդիմության առաջնորդներից մեկն է։
