Ադրբեջանն ու Հայաստանը պայմանավորվել են հրադադարի մասին. ի՞նչ պայմաններով

Լեռնային Ղարաբաղի ռազմական գործողությունների ​​գոտում հրադադարի ռեժիմի և նախկին ձևաչափով խաղաղ բանակցությունները շարունակելու մասին համաձայնությունը ձեռք է բերվել Ադրբեջանի, Հայաստանի և Ռուսաստանի արտաքին գործերի նախարարների եռակողմ հանդիպման արդյունքում, որը տեղի է ունեցել 2020 թ. հոկտեմբերի 9-10-ին, Մոսկվայում:

Ջեյհուն Բայրամովը, Զոհրաբ Մնացականյանը և Սերգեյ Լավրովը բանակցություններ վարեցին ամբողջովին փակ ձևաչափով գրեթե 11 ժամ և որոշումը հրապարակեցին հոկտեմբերի 10-ի առավոտյան ժամը երեքին: Սրանք ամենաերկար խորհրդակցություններն էին վերջին 20 տարիներին:

Ղարաբաղում դաժան մարտերը շարունակվում են արդեն երկու շաբաթ՝ սեպտեմբերի 27-ից, երկու կողմերն օգտագործում են հրետանի, օգտագործում են անօդաչու թռչող սարքեր, ինքնաթիռներ և ցամաքային ռազմական տեխնիկա և միմյանց մեղադրում են ռազմական գործողությունները սկսելու մեջ:

Մարտեր Արցախում։ 2020 թ-ի հոկտեմբերի 10-ի ռեպորտաժները, տեսանյութերը, լուսանկարները

Լուրեր Արցախի, Հայաստանի և Ադրբեջանի սահմանին տեղի ունեցող ռազմական գործողությունների մասին. մարտերի 14-րդ օրը

Բոլոր կողմերից լուրեր և ռեպորտաժներ Ղարաբաղի շուրջ և Ադրբեջանի ու Հայաստանի սահմանին ռազմական գործողությունների մասին: Մարտերի ​​13-րդ օր

Համաձայն տարածված փաստաթղթի՝ Ադրբեջանը և Հայաստանը դադարեցնում են կրակը շաբաթ օրը՝ հոկտեմբերի 10-ին, տեղի ժամանակով ժամը 12:00-ին (CET 10:00), մարդասիրական նպատակներով` Կարմիր խաչի միջազգային կոմիտեի միջնորդությամբ ռազմագերիների և այլ կալանավորված անձանց և զոհվածների մարմինների փոխանակման համար:

Հատկապես ընդգծվում է, որ ԵԱՀԿ Մինսկի խմբի միջնորդությամբ բանակցային գործընթացի ձևաչափը մնում է անփոփոխ, այսինքն՝ Լեռնային Ղարաբաղի հակամարտության կարգավորման բանակցային գործընթացին կմասնակցեն Ադրբեջանն ու Հայաստանը:

Համաձայնության ամբողջական տեքստը

Ի պատասխան Ռուսաստանի Դաշնության Նախագահ Վ.Վ. Պուտինի կոչին և Ռուսաստանի Դաշնության Նախագահ Վ.Վ. Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև ձեռք բերված համաձայնությամբ՝ կողմերը պայմանավորվել են հետևյալ քայլերի մասին.

1. Հայտարարվում է հրադադար հոկտեմբերի 10-ին ժամը 12։00-ից մարդասիրական նպատակներով՝ գերիների և այլ կալանավորված անձանց ու զոհվածների մարմինների փոխանակման համար՝ ԿԽՄԿ չափանիշներին համապատասխան։ 
2. Հրադադարի կոնկրետ չափանիշները լրացուցիչ կհամաձայնեցվեն։
3. Ադրբեջանի Հանրապետությունը և Հայաստանի Հանրապետությունը ԵԱՀԿ ՄԽ համանախագահների միջնորդությամբ, հիմնվելով կարգավորման հիմնարար սկզբունքների վրա, սկսում են առարկայական բանակցությունները՝ շուտափույթ խաղաղ կարգավորման հասնելու նպատակով:
4. Կողմերը հաստատում են բանակցային գործընթացի ձևաչափի անփոփոխ լինելը։