«Ձեռքերդ արյունոտ են»․ հակապուտինյան վերնագրերը՝ անակնկալ՝ ռուսական ԶԼՄ-ներում մայիսի 9-ին
Հակապուտինյան վերնագրեր Lenta.ru-ում
Ռուսական Lenta.ru-ն, որը հավատարիմ է իշխանություններին, մայիսի 9-ին հրապարակել է ՌԴ նախագահ Վլադիմիր Պուտինին և ուկրաինական պատերազմը քննադատող տասից ավելի նյութեր։
Ինչպես հաղորդում է Новая газета-Европа-ն, ավելի ուշ տեքստերն անհետացել են կայքից, սակայն դրանց պատճենները հասանելի են վեբ-արխիվում:
Մի քանի հոդվածների վերնագրեր հնչում էին այսպես. «Ռեկորդային ռազմական ծախսերը չօգնեցին Ռուսաստանին հաղթել Ուկրաինային», «Ռուսական իշխանությունները լրագրողներին արգելել են խոսել բացասականի մասին», «Ռուսաստանը հիմնովին ավերեց Մարիուպոլը» և «Ուկրաինան խափանեց Պուտինի ծրագրերը»։
Նյութերի սկզբում գրառում կար․ «Այս նյութը համաձայնեցված չէ ղեկավարության հետ, իսկ դրա հրապարակման համար նախագահի աշխատակազմը կպատժի հրատարակությանը, այլ կերպ ասած՝ ՇՏԱՊ ՊԱՀՊԱՆԻՐ ԱՅՍ ԿԱԴՐԸ, քանի դեռ չեն ջնջել»։
Հրապարակման համար պատասխանատվություն են ստանձնել «Տնտեսություն» և «Բնակելի միջավայր» բաժինների ղեկավար Եգոր Պոլյակովը, ինչպես նաև խմբագիր Ալեքսանդրա Միրոշնիկովան։ Mediazona-ի աղբյուրը հաստատել է, որ հրապարակումներն արել են այս բաժինների աշխատակիցները. նրանք փոխարինել են արդեն իսկ հրապարակված լուրերի տեքստերը նորերով։
Mediazona-ն հրապարակել է նաև հակապատերազմական տեքստեր պատրաստած լրագրողների հայտարարությունը.
«Զանգվածային արգելափակումից հետո երկրում գրեթե չեն մնացել ԶԼՄ-ներ, որոնց կարելի է հետևել առանց VPN-ի կամ Doomscrolling-ի Telegram-ում [նկատի ունի Telegram-ից լուրերի չափից ավելի սպառումը — JAMnews]։ Մենք ունենք հսկայական լսարան, որի վրա ես ևս շատ ջանք եմ թափել, ուստի ես և Սաշան որոշեցինք, որ նման փերֆորմանսը կլինի միակ ճշմարիտը»,- նշել է Պոլյակովը։
Նա հավելել է, որ իր հետ «արդեն խոսել են» և ենթադրություն արել, որ Միրոշնիկովայի հետ այլևս Lenta.ru-ի աշխատակիցներ չեն։
«Ձեռքերդ արյունոտ են»
Lenta.ru կայքի հակապատերազմական նյութերը մայիսի 9-ի միակ անակնկալը չէին ռուսական մեդիա տարածքում։
Վաղ առավոտից ռուսական հեռուստատեսային ծառայությունների օգտատերերը հաղորդումների ծրագրի փոխարեն հայտնաբերել էին տեքստային հաղորդագրություն․
«Ձեր ձեռքերին է հազարավոր ուկրաինացիների և նրանց հարյուրավոր սպանված երեխաների արյունը։ Հեռուստատեսությունն ու իշխանությունները ստում են։ Ո՛չ պատերազմին»։
Նույն մակագրությունը վազող տողի տեսքով ուղեկցում էր հեռուստատեսային հաղորդումները։
