«Ընտրություններից առաջ կեղծ նյութեր կտարածվեն»․ Վրաստանի անվտանգության ծառայություն
Հնարավոր կեղծիքներ Վրաստանի ընտրություններից առաջ
Վրաստանի պետական անվտանգության ծառայության ներկայացրած տվյալների համաձայն՝ քաղաքական շրջանակների հետ կապված որոշ խմբեր խորհրդարանական ընտրություններից առաջ նախատեսում են տարածել կեղծ տեսանյութեր և ձայնագրություններ, որոնք ստեղծվել են արհեստական բանականության և ժամանակակից այլ տեխնոլոգիաների միջոցով:
Վրաստանի պետական անվտանգության ծառայությունը (ՊԱԾ) պարզաբանում է, որ այս կեղծ նյութերում օգտագործվելու են Վրաստանի իշխանությունների ներկայացուցիչների ձայներն ու տեսապատկերները: Ծառայության պնդմամբ՝ «կեղծ տեղեկատվության» տարածման նպատակն է հակասություններ ստեղծել իշխանության ճյուղերի միջև, թշնամանք հրահրել իշխանությունների և Ուղղափառ եկեղեցու միջև, ինչպես նաև վատթարացնել կառավարության և արևմտյան գործընկերների հարաբերությունները:
ՊԱԾ-ը պնդում է, որ կեղծ նյութերը տարածողները դրանք հասարակությանը կներկայացնեն որպես տեղեկատվության արտահոսք անվտանգության ծառայությունից՝ այդպիսով փորձելով հեղինակազրկել այն և պառակտում մտցնել իշխանության ճյուղերի միջև:
Ըստ ՊԱԾ-ի՝ այս սադրանքի հիմնական նպատակն է արհեստականորեն բողոքական տրամադրություններ ստեղծել, երկրում ապակայունացում առաջացնել, ինչը վերջին հաշվով կօգտագործվի քաղաքական նպատակներով:
«Մենք ուշադիր հետևում ենք այս խմբերի գործունեությանը, և օրենքի ցանկացած խախտման դեպքում կձեռնարկվեն համապատասխան միջոցներ՝ օրենսդրությանը համապատասխան», — հայտարարում է ծառայությունը:
Մեկնաբանություն
«Գախարիան՝ հանուն Վրաստանի» կուսակցության առաջնորդներից Կախաբեր Կեմոկլիձեն մեկնաբանել է Պետական անվտանգության ծառայության հայտարարությունը.
«Ես կարդացի իմ նախկին գործընկերների հայտարարությունը: Այն չափազանց ընդհանրական է և, ինչն ավելի վատ է, քաղաքականապես կողմնակալ է պաթոսի տեսանկյունից:
Մի բան, որ կարող եմ վստահ ասել՝ այսօրվա դրությամբ, չնայած արհեստական բանականության (ԱԲ) ընձեռած բարձր տեխնոլոգիական հնարավորություններին, պարզապես անհնար է ստեղծել այնպիսի արտադրանք (տեսանյութ/ձայնագրություն), որը հնարավոր չլինի փորձաքննության արդյունքում արագ նույնականացնել որպես արհեստականորեն ստեղծված։
Ես չգիտեմ, թե ինչից են վախենում (կամ արդյոք ընդհանրապես վախենում են) «Վրացական երազանք»-ի «հանճարները», բայց արհեստական բանականության օգտագործմամբ դեռևս հնարավոր չէ ստեղծել այդպիսի՝ խորապես հավաստի բովանդակություն: Այսպես կոչված Deep Fake-ը, իհարկե, մարտահրավեր է ներկայացնում, սակայն արհեստական բանականությունը դեռևս թույլ չի տալիս մշակել այնքան բարձր մակարդակի արտադրանք, որ թաքցվի դրա՝ արհեստական մանիպուլյացիայի փաստը»:
Վրաստանի վարչապետ Իրակլի Կոբախիձեն հայտարարել է.
«Խոսքը գնում է քաղաքական ուժերի մասին, որոնք մեր երկրի բարօրությունը չեն ցանկանում: Այստեղ խոսքը ինչպես արտաքին ուժերի, այնպես էլ երկրի ներսում գործող ուժերի մասին է, այսինքն՝ նկատի են առնվում ծայրահեղ ընդդիմությունն ու նրանց արտասահմանյան հովանավորները:
Կարծում եմ, որ նման գործողությունները որևէ ազդեցություն չեն ունենա ընտրությունների արդյունքների վրա: Բայց լավ է, որ մեր պետական հաստատությունները, մասնավորապես՝ Պետական անվտանգության ծառայությունը, զգոն են: Անհրաժեշտ է հատուկ վերահսկողություն, որպեսզի ոչ ոք չկարողանա որևէ բացասական ազդեցություն ունենալ այս ընտրությունների վրա: Ուստի մենք պետք է շնորհակալություն հայտնենք Պետական անվտանգության ծառայությանը այն բանի համար, որ կարևոր տեղեկատվություն է ներկայացրել հասարակությանը, որպեսզի մարդիկ ավելի զգույշ լինեն»:
Հետևեք մեզ — Facebook | Youtube | Telegram
Հնարավոր կեղծիքներ Վրաստանի ընտրություններից առաջ
