«Մեկուսացման չեղարկում, իշխանության հրաժարական»․ Վլադիկավկազում մեկ ու կես հազար մարդ պահանջում է կորոնավիրուսի մասին տեղեկություն ու ղեկավարության հրաժարական
Վլադիկավկազում մինչև մեկ ու կես հազար մարդ (ըստ տեղական լրատվամիջոցների հաղորդագրությունների) ապրիլի 20–ին բողոքի ակցիայի է դուրս եկել կորոնավիրուսի համաճարակի պայմաններում Հյուսիսային Օսիայի իշխանությունների գործողությունների դեմ։
Սա հիմնականում այն մարդկանց բողոքն է, որոնք չեն հավատում կորոնավիրուսի համաճարակին։ Նրանք պահանջում են չեղարկել մեկուսացումը, բացել բիզնեսն ու դպրոցներն, ազատ արձակել իրենց ոչ ֆորմալ առաջնորդին և պաշտոնանկ անել Հյուսիսային Օսիայի ղեկավար Բիտարովին։
Որպես նոր ղեկավար ակցիայի մասնակիցներն առաջարկում են պատգամավոր Կալոևին, որը հայտնի է նրանով, որ սպանել է շվեյցարացի ավիադիսպետչերին և վրեժ լուծել ավիավթարի հետևանքով մահացած իր կնոջ և երեխաների համար։
Բոլոր մանրամասները
Ցուցարարների մի մասն ակտիվիստների բավականին մեծ խումբ է, որոնք կարծում են, որ չկա ոչ կորոնավիրուս, ոչ համաճարակ, և դա իշխանությունների հորինած բաներն են՝ բնակչության հաշվին հարստանալու համար։
Նրանք պահանջում են ոչ միայն չեղարկել մեկուսացումն, այլև ազատ արձակել իրենց ոչ ֆորմալ առաջնորդին։ Դա տեղացի օպերային երգիչ Վադիմ Չելդիևն է, որը կտրականապես չի հավատում կորոնավիրուսի և պանդեմիայի գոյությանը և որն էլ հենց նախաձեռնել է այս հանրահավաքը։
- «Կարծում եմ, որ ոչ մի կորոնավիրուս էլ չկա»․ սա ապացուցելու համար Վլադիկավկազում գրոհել են հիվանդանոցը
- Պանդեմիա, Ռուսաստան․ վարակման բռնկում, բուժհամակարգը ծայրահեղ անպատրաստ է
- Կորոնավիրուսը Հյուսիսային Կովկասում․ վարակված են բոլոր շրջանները, մահացել է Ինգուշիայի հոգևոր առաջնորդը
Չելդիևը երկու օր առաջ ձերբակալվել է կեղծ տեղեկությունների տարածման մեղադրանքով։ Նա մեղադրվում է նաև «իշխանության ներկայացուցչի նկատմամբ բռնության կիրառման» համար, ինչը նախատեսում է մինչև հինգ տարվա ազատազրկում։
Ըստ պաշտոնական տվյալների՝ ապրիլի 20–ին Հյուսիսային Օսիայում կորոնավիրուսով վարակված 145 մարդ կա, երկու մարդ մահացել է։
Հանրահավաքին մասնակցած մյուս քաղաքացիները պնդում են, որ իրենց հարկ եղած ձևով չեն իրազեկում համաճարակի հետ կապած իրավիճակի մասին։
Ակտիվորեն կարգախոսներ են հնչում «ինքնամեկուսացման» ռեժիմի դեմ, որի պատճառով շատերը կորցրել են աշխատանքը։ Հանրահավաքին խոսում են այն մասին, որ շարունակում է աշխատել «Բավարիա» գարեջրային ընկերությունը, որը պատկանում է հանրապետության ղեկավարի ընտանիքին։
Շատերը նաև վանկարկում են՝ «Բացել դպրոցները»։
Սակայն, ըստ ամենայնի, բոլորի գլխավոր պահանջը հետևյալն է՝ Հյուսիսային Օսիայի ղեկավար Վյաչեսլավ Բիտարովի հրաժարականը։
Բիտարովը դուրս է եկել մլարդկանց մոտ, բայց՝ ապարդյուն
Ակցիան համաձայնեցված չէ իշխանությունների հետ, այդ պատճառով էլ մասնակիցներին սկսել են ձերբակալել։ Ճիշտ է, հանրապետության ղեկավար Բիտարովը հավաստիացրել է բնակչությանը, որ շուտով բոլորն ազատ կարձակվեն։
Վյաչեսլավ Բիտարովը հանդիպել է ցույցի մասնակիցներին և բոլորին կոչ արել տուն վերադառնալ և տանը մնալ մինչև մեկուսացման ռեժիմի ավարտը։ Քաղաքացիների այն վրդովված պատասխանին, թե վարակը հորինված է, նա նշել է․
«Եթե ինձ որևէ մեկն ապացուցի, որ կորոնավիրուս չկա, ես ամեն ինչ կրկին կբացեմ»։
Մարդիկ սկսել են սուլել և խանգարել նրան խոսել։
Եվ հանրապետության ղեկավարը, և ակցիայի մասնակիցների մեծ մասը դիմակներ չեն դրել, նրանցից ոչ ոք անհատական պաշտպանության ոչ մի միջոց չունի։
- Սպիրտով լի պահեստներ, և դեղատներ, որտեղ հակասեպտիկներ չկան
- «Նրանք ուզում են մոռանա՞լ Բեսլանը»․ ինչո՞ւ է Մոսկվան Երկրորդ աշխարհամարտի ավարտի տոնը նշանակել դպրոցում տեղի ունեցած ահաբեկչության ողբերգական օրը
Այնուհետև Բիտարովը վերադարձել է կառավարության շենք, իսկ ժողովրդին է դիմել ներքին գործերի նախարար Միխայիլ Սկոկովը։ Նա առաջարկել է բոլորին ցրվել և զգուշացրել է, որ հակառակ դեպքում ուժ է կիրառվելու։
Սակայն մարդիկ շարունակում են փողոցում մնալ և պահանջել Բիտարովի հրաժարականը։
Նախընտրելի ղեկավարը Կալոևն է, որը սպանել է շվեյցարացի ավիադիսպետչերին՝ վրեժ լուծելով իր ընտանիքի մահվան համար
Հանրահավաքին հնչում է նաև այն մարդու անունը, որին ներկաներից շատերը ցանկանում են տեսնել որպես հանրապետության ժամանակավոր ղեկավար։ Դա Վիտալի Կալոևն է, որը Հյուսիսային Օսիայում հայտնի է դարձել այն բանից հետո, երբ սպանել է շվեյցարացի ավիադիսպետչերին, որի մեղքով ավիավթարի հետևանքով մահացել են նրա կինն ու երկու երեխաները։
Ամեն ինչ տեղի է ունեցել 2004 թ–ին։ Կալոևի ընտանիքը տուն էր վերադառնում Իսպանիա կատարած ճամփորդությունից։ Շվեյցարացի դիսպետչեր Պետեր Նիլսենի սխալի պատճառով ռուսական ինքնաթիռը բախվել էր DHL–ի բեռնատար ինքնաթիռին Բոդենի լճի վրա, զոհվել էին բոլոր 60 ուղևորներն ու անձնակազմի 9 անդամները։
2005 թ– հոկտեմբերին Վիտալի Կալոևը Շվեյցարիա էր մեկնել և սպանել այդ դիսպետչերին։ Նա դատապարտվել էր ութ տարվա ազատազրկման։
2007 թ–ի դեկտեմբերին Շվեյցարիայի դատարանը նրան ազատ էր արձակել օրինակելի պահվածքի համար, և դրանից անմիջապես հետո Վիտալի Կալոևը Ռուսաստան էր վերադարձել։
2019 թ–ին Վիտալի Կալոևը «Միասնական Ռուսաստան» իշխող կուսակցության կողմից առաջադրվել էր որպես Վլադիկավկազի քաղաքային իշխանության թեկնածու։
Վիտալի Կալոևը ոչ մի կերպ չի մեկնաբանել իրավիճակն ու բողոքի ակցիային մինչև հիմա չի մասնակցել։
2017 թ–ին Հոլիվուդը Կալոևի պատմության մոտիվներով ֆիլմ էր նկարահանել «Հետևանքներ» (Aftermath) անվանումով։ Ֆիլմում գլխավոր դերը կատարել է Առնոլդ Շվարցենեգերը։
Մեկնաբանություն
Ալան Ցխուրբաև,
բլոգը «Կավկազսկի ուզել» ռուսական պարբերականի կայքում է
«Թե ինչ էր ուզում Չելդիևն, այդպես էլ չհասկացա։ Թե ինչ գաղափարի համար մարդիկ այժմ կարող են տուժել, կրկին չեմ հասկանում։
Ես հասկանում եմ, որ մարդիկ առանց աշխատանքի տանը նստած են, որ սա նյարդային իրավիճակ է, բայց ինչո՞ւ են փողոց դուրս եկել։
Մի քանի օր դիտում էի Չելդիևի ալիքը, ահա, թե ինչ հասկացա․
● վարակ չկա, մեզ ուզում են չիպավորել,
● Ռուսաստանում իշխանությունը ֆաշիստական է,
● Ստալինը լավն է, մահացել է աղքատության մեջ,
● օսերն այլևս նախկինը չեն,
● օսերը երբեմն դեռ այն են,
● ԽՍՀՄ–ը կենդանի է,
● բոլորը պետք է զարթնեն։
Այս ամենը, մեղմ ասած, անպատասխանատու պահվածք է»։
