«Վիզա ունենք, բայց Շենգենյան գոտի մուտքն արգելում են»․ ի՞նչ են պատմել ՀՀ քաղաքացիները
ՀՀ քաղաքացիների մուտքը Բուլղարիա արգելվել է
Բուլղարիան արգելում է Շենգենյան վիզա ունեցող հայաստանցիների մուտքն ու նրանց հետ ուղարկում Հայաստան։ «Ազատություն» ռադիոկայանին այս ահազանգով դիմել են բազմաթիվ քաղաքացիներ։ Պատմել են, որ Սոֆիայի օդանավակայան ժամանելուց անմիջապես հետո խնդիրների են բախվել։ Մասնավորապես՝ սահմանապահներն արգելել են մուտք գործել Բուլղարիա, ժամերով, երբեմն էլ օրերով պահել մեկուսարանում, ենթարկել բռնության։
«Քաղաքացիների մուտքն առանձին երկրներ արգելվում է այն պատճառով, որ Շենգենյան վիզա ստանալու ժամանակ դիմում-հարցաթերթիկում և հարակից փաստաթղթերով ներկայացվում է բացառապես տվյալ երկիր մեկնելու նպատակ, սակայն հետագայում՝ վիզան ստանալուց հետո, այցելության նպատակը (ուղղությունը, ծրագիրը) կամ հյուրանոցի ամրագրումը փոփոխվում կամ չեղարկվում են»,- հայտարարել է Հայաստանի արտգործնախարարությունը։
Նախարարությունը մեկ օրինակ է ներկայացրել, երբ քաղաքացին հարցաթերթիկում նշել է 10 օրով Բուլղարիա մեկնելու նպատակ, կցել ինքնաթիռի տոմսի և հյուրանոցի ամրագրում, սակայն հետագայում պարզվել է, որ նա պատրաստվում է Բուլղարիայում գտնվել ընդամենը 3 օր, ապա 7 օրով մեկնել Իտալիա կամ Շենգենյան գոտու այլ երկիր։ Հայաստանցիների ահազանգերը ցույց են տալիս, որ արգելվել է նաև այն քաղաքացիների մուտքը, որոնք Բուլղարիայից եվրոպական այլ երկիր մեկնելու ծրագրեր չեն ունեցել։
Նույնիսկ այս ֆոնին փորձագիտական շրջանակները լավատես են։ Ասում են՝ ՀՀ-ն արձանագրում է դրական միտումներ, հակառակ պարագայում՝ Եվրամիությունը չէր մեկնարկի վիզաների ազատականացման շուրջ երկխոսություն։
Օդանավից՝ մեկուսարան
«Ազատություն» ռադիոկայանին դիմած քաղաքացիները պատմել են, որ իրենց մուտքը Բուլղարիա արգելվել է անհիմն պատճառաբանությամբ, ասել են, թե՝ հայտնի չէ՝ ինչու եք եկել Բուլղարիա։ Նրանք, սակայն, ձեռքի տակ ունեցել են բոլոր անհրաժեշտ փաստաթղթերը, այդ թվում՝ հյուրանոցի ամրագրում, հետդարձի տոմս և ապահովագրություն։
Օրինակ՝ քաղաքացիներից Արամ Մնացականյանը պատմել է, որ ինքն ու ընկերը Սոֆիայի օդանավակայանի մեկուսարանում են անցկացրել 3 օր, այնտեղից դուրս են եկել միայն ջուր և սնունդ գնելու համար, այն էլ ուղեկցող ոստիկանի հետ։ Նշել է նաև, որ մեկուսարանում անհնար էր սնվել, հակասանիտարական պայմաններ էին։
ՀՀ քաղաքացիներին մեկուսարանում բռնության են ենթարկել ճաշարանում սնվելու ցանկության համար, այնուհետև ստիպել են ջնջել հեռախոսի տեսագրությունները․
«Ինձ էլ, ընկերոջս էլ պառկացրին գետնին, ձեռնաշղթաներ անցկացրին, ընկերոջս մեջքը ճղվել էր, արյուն էր գալիս, ու ստիպում էին, որ ֆոտոները, վիդեոները ջնջենք, քանի որ իրենք էլ գիտեն, որ անօրինական բռնություն էին կիրառել։ Քանի որ մեզ մնացել էր ընդամենը 2 ժամ՝ հետ գալու Հայաստան, ստիպված եղանք հեռախոսը տալ իրենց, մի ժամ պահեցին իրենց մոտ, բռնության ապացույցները ջնջեցին»։
ԱԳՆ-ն հորդորում է «նախապես ուսումնասիրել տվյալ երկրի միգրացիոն կանոնները»
Հայաստանի արտաքին գործերի նախարարության և դեսպանություններ աշխատակիցները հանդիպել են նման խնդիրների բախված քաղաքացիների հետ։ ԱԳՆ-ից հայտնում են, որ հարցը քննարկվել է նաև համապատասխան երկրների իրավասու մարմինների հետ։
ԱԳՆ փոխանցմամբ՝ տվյալ երկրի իրավասու մարմինների կողմից ՀՀ քաղաքացիների մուտքը արգելելու հիմք է տալիս այցելության նպատակի փոփոխությունը, օրինակ՝ մի երկրի համար դիմելը, բայց Շենգենյան գոտու որևէ այլ երկիր այցելելը․
«Դա գնահատվում է որպես այցելության հայտարարված և իրական նպատակի կամ պայմանների անհամապատասխանություն։ Հարկ է նշել, որ Շենգենյան վիզայի առկայությունն անվերապահ իրավունք չի տալիս օտարերկրացուն մուտք գործել Շենգենյան գոտի»։
Արտգործնախարարությունը շեշտել է՝ անձնագրային հսկողության ժամանակ կարող են պահանջվել նաև այցի նպատակը հիմնավորող լրացուցիչ փաստաթղթեր․
«Ստուգողական նման գործողություններն առավելապես բնորոշ են այն երկրներին, որտեղ միգրացիոն ռիսկերը գնահատվում են բարձր։ Անհրաժեշտ է հաշվի առնել, որ Շենգենյան վիզա ստանալուց հետո՝ այցելության նպատակի, երկրի, ժամկետների և այլ պայմանների ցանկացած անհամապատասխանություն կամ հետագա չհիմնավորված փոփոխություն կարող է հանգեցնել Ձեր մուտքը տվյալ երկիր արգելելուն և տրված վիզան չեղարկելուն՝ ինչպես սահմանին, այնպես էլ նախքան մեկնումը»։
ԱԳՆ-ից ՀՀ քաղաքացիներին հորդորել ենք նախապես ուսումնասիրել այն երկրի միգրացիոն կանոնները, որտեղ պատրաստվում են մեկնել, այնուհետև «հստակ գնահատել դրանք խախտելու ռիսկերը և հնարավոր բացասական հետևանքները»։
Մեկնաբանություն
Քաղաքագետ Հայկ Սուքիասյանի խոսքով՝ Հայաստանի հետ վիզաների ազատականացման շուրջ բանակցություններ մեկնարկելու ԵՄ արտաքին հարաբերությունների խորհրդի որոշումը ՀՀ եվրաինտեգրման ճանապարհի կարևորագույն քայլն է։
Քաղաքագետի գնահատմամբ՝ Հայաստանի վերաբերյալ որոշում ընդունելիս ԵՄ-ն հաշվի է առել ինչպես բարեփոխումների հնարավոր ձախողման, այնպես էլ անօրինական միգրացիայի հետ կապված ռիսկերը։
«Իհարկե, կա անօրինական միգրացիայի հետ կապված խնդիր, բայց դա վերաբերում է ամբողջ աշխարհին»,- նկատել է նա։
Սուքիասյանի խոսքով՝ ԵՄ-ն սերտորեն աշխատում է Հայաստանի իշխանությունների հետ, որպեսզի անօրինական միգրացիա տեղի չունենա․
«Այդուհանդերձ, ԵՄ-ն վիզային ռեժիմն արագ չի ազատականացնի՝ հաշվի առնելով Հայաստանում գործող ինստիտուտների չկայացվածությունը կամ կիսակայացվածությունը։ Եթե ունենայինք լիարժեք կազմակերպված, դեմոկրատական ինստիտուտներ, վստահ եմ, որ ազատականացումը տեղի կունենար մեկ տարվա ընթացքում»։
Կարծում է՝ ՀՀ-ում բարեփոխումները դեռևս ցանկալի մակարդակի չեն հասել, ուստի Եվրամիությունը վիզաների ազատականացման կգնա աստիճանաբար։
«Հուսով եմ, որ այդ ընթացքում եվրոպացիներից շատ բան կսովորենք, մեր դեմոկրատական ինստիտուտները կարգի կբերենք, որպեսզի վիզաների ազատականացումն արդեն վերածվի ԵՄ-ին ինտեգրվելու գործընթացի»,- ամփոփել է քաղաքագետը։
Հետևեք մեզ — Facebook | Youtube | Telegram
ՀՀ քաղաքացիների մուտքը Բուլղարիա արգելվել է
