Քահանայի հարցազրույցի հետքերով․ ՀՀ-ում հոգևորականներ են բերման ենթարկվել
ՀՀ-ում հոգևորականներ են բերման ենթարկվել
Հայաստանի հոգևոր կենտրոնից՝ Էջմիածնից հայտնել են՝ ձերբակալվել է Արագածոտնի թեմի Սաղմոսավանքի հոգևոր հովիվ Փառեն քահանա Առաքելյանը, կան բերման ենթարկված մի շարք այլ հոգևորականներ, այդ թվում՝ Արագածոտնի թեմի առաջնորդը։
Նախ ԶԼՄ-ները հաղորդում էին 7 հոգևորականների բերման ենթարկվելու մասին, ավելի ուշ՝ 10։ Թեմի առաջնորդարանում գործողություններ են իրականացնում Ազգային անվտանգության ծառայությունն ու Քննչական կոմիտեն։
«Իրազեկ քաղաքացիների միավորում» ՀԿ ղեկավար Դանիել Իոաննիսյանը հայտարարաել է՝ ինքն է հանցագործության մասին հաղորդում ներկայացրել Դատախազություն։ Հաղորդման համար հիմք է ծառայել Հովհաննավանքի հոգևոր հովիվ Արամ քահանայի՝ Հանրային հեռուստատեսությանը տված հարցազրույցը։ Քահանան, մասնավորապես՝ հայտարարել էր, որ «2021 թվականին Հայ առաքելական սուրբ եկեղեցու ներսում եղել է պարտադրանք` քաղաքական ուժերից մեկի նախընտրական հանրահավաքներին մասնակցելու»։
Մայր Աթոռի խոսնակ Եսայի քահանա Արթենյանի դիտարկմամբ՝ ձերբակալությունները պետք է դիտարկել իշխանությունների՝ «եկեղեցու դեմ արշավի» շրջանակներում։
«Մենք որևիցե արշավի մաս չենք կազմում: Մի խումբ ՀԿ-ների, այդ թվում՝ մեր նախաձեռնությամբ, հանրահավաքին մասնակցելուն պարտադրելը քրեականացված արարք է ՀՀ-ում, և պետությունը պետք է պայքարի բոլոր նման դրսևորումների դեմ»,- «Ազատության» հետ զրույցում նկատել է Դանիել Իոաննիսյանը։
Այս պահին հայտնի բոլոր տեղեկությունները՝ ամփոփ
- Հայաստանը՝ Արևմուտքի և ՌԴ միջև․ կառավարության «բալանսավորման» քաղաքականության ռիսկերը
- Խաղադրույք «նոր դեմքերի» վրա. ինչպե՞ս է ՌԴ-ն փորձում առաջ մղել իր շահերը Հայաստանում
- «Հայ եկեղեցականների քայլերում կա ոչ միայն ռուսական հետք, այլև ուղղորդում»․ լարվածություն Մայր Աթոռում
Ի՞նչ է հայտնել Քննչական կոմիտեն
Հոգևորականներին բերման ենթարկելու վերաբերյալ ԶԼՄ-ներին պարզաբանում է ներկայացրել Քննչական կոմիտեն։
«Իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով հավաք անցկացնելուն կամ դրան մասնակցելուն խոչընդոտելու կամ հարկադրելու, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու դեպքի առթիվ նախաձեռնված քրեական վարույթի նախաքննության շրջանակներում կատարվում են վարութային և ապացուցողական անհրաժեշտ գործողություններ»,- փոխանցել են կառույցից՝ առանց մանրամասներ հայտնելու։
Թեմի առաջնորդի և 4 քահանայի գտնվելու վայրն անհայտ է
Փաստաբան Արա Զոհրաբյանի փոխանցմամբ՝ թեմի առաջնորդ Մկրտիչ եպիսկոպոս Պռոշյանի գտնվելու վայրն անհայտ է, Քննչական կոմիտեն հրաժարվում է ասել՝ որտեղ է հոգևորականը։
«Փաստացի մեզնից թաքցվում է, թե որտեղ է գտնվում, թեկուզ օրինական հիմքերով բերման ենթարկված և պետության իրավազորության տակ գտնվող անձը: Անձը հայտնվել է օրենքի պաշտպանությունից դուրս»,- հավելում է փաստաբան Մարինե Ֆարմանյանը:
Փաստաբանական խումբը հանցագործության մասին հաղորդում է ներկայացրել ոստիկանություն բարձրաստիճան հոգևորականի բռնի անհետացման հետ կապված։
Նյութի հրապարակման պահին հաղորդվեց, որ անհայտ է նաև բերման ենթարկված քահանաներից չորսի գտնվելու վայրը: Բացի այդ, ՄԻՊ օգնությամբ հայտնի դարձավ, որ Մկրտիչ եպիսկոպոս Պռոշյանը գտնվում է Քննչական կոմիտեի Կենտրոնի բաժնում:
Մկրտիչ եպիսկոպոս Պռոշյանը Ամենայն հայոց կաթողիկոսի քրոջ որդին է։ 2001 թ․-ին Գարեգին Բ-ի ձեռամբ ձեռնադրվել է կուսակրոն քահանա։ Ավելի ուշ՝ 2010 թ․-ին կաթողիկոսի ձեռամբ ձեռնադրվել է եպիսկոպոս և նշանակվել Արագածոտնի թեմի առաջնորդ։
Հոգևորականները վկայի կարգավիճակ ունեն, կհարցաքննվեն
Հոգևորականների փաստաբանները լրագրողներին մանրամասներ են ներկայացրել։ Մասնավորապես՝ նշել են, որ նախքան բերման ենթարկվելը խուզարկություններ են իրականացվել հոգևորականների տներում, Արագածոտնի թեմի առաջնորդարանում և մի շարք աշխարհիկ աշխատակիցների տներում։
«Առգրավվել են մի շարք փաստաթղթեր, համակարգիչներ, այդ թվում՝ մի աշխարհիկ աշխատակցուհու ընտանիքի անդամների համակարգիչները, հեռախոսները»,- նկատել է փաստաբան Արա Զոհրաբյանն ու հավելել՝ բերման են ենթարկվել նաև թեմի աշխարհիկ աշխատակիցներ։
Նրա խոսքով՝ թեև հոգևորականներին հարկադրաբար բերման են ենթարկել, սակայն Քննչական կոմիտեում նրանք ունեն վկայի կարգավիճակ:
Փաստաբան Արմինե Ֆանյանի փոխանցմամբ՝ ձերբակալված հոգևորականները հայտնել են, որ չեն պատասխանի քննիչների հարցերին առանց փաստաբանների։
«Քահանաները ծանուցագրեր են ստացել։ Փաստաբանի ներկայությամբ նրանք հետագայում կհարցաքննվեն»,- նշել է նա։
Փաստաբանական խումբը տեղեկացրել է՝ Մայր Աթոռից ունեն լիազորագիր՝ պաշտպանելու հոգևորականների շահերը, սակայն իրենց չի թույլատրվում ներս մտնել: Իրենց մուտքը Քննչական վարչություն խոչընդոտելու դեպքով ևս հաղորդում են ներկայացրել Ոստիկանություն:
«Քրեական օրենսգրքով արգելված արարք է»
Քաղհասարակության ներկայացուցիչ, «Իրազեկ քաղաքացիների միավորում» ՀԿ ղեկավար Դանիել Իոաննիսյանը հայտնել է՝ Դատախազություն հաղորդում են ներկայացրել և պահանջել քննել Արամ քահանայի հայտարարությունները։
«Քանի որ պարտադրելը հանրահավաքներին մասնակցել թե՛ հին, թե՛ նոր Քրեական օրենսգրքով արգելված արարք է, «Իրազեկ քաղաքացիների միավորումը» սեպտեմբերի 17-ին հանցագործության մասին հաղորդում էր ներկայացրել Դատախազություն՝ խնդրելով քննել հրապարակային արված այդ հայտարարությունը»,- հայտարարել է ԻՔՄ-ն։՝
Կազմակերպությունից շեշտել են՝ նույն կերպ են վարվում նաև «ժողովրդավարական կարգին դեմ ուղղված հանցագործության մասին որևէ հրապարակային խոսք նկատելու բոլոր դեպքերում»։
Նաև նշել են, որ ենթադրյալ հանցագործության կամ դրա հնարավոր կատարողների մասին որևէ այլ տեղեկություն կամ մանրամասներ չունեն։
Քննչական կոմիտե է մեկնել ՄԻՊ արագ արձագանքման խումբը
Հայաստանի մարդու իրավունքների պաշտպանի գրասենյակից տեղեկացրել են՝ մի խումբ հոգևորականների բերման ենթարկելու վերաբերյալ տեղեկություններ են ստացել ԶԼՄ-ներից և սոցիալական մեդիայից, ՄԻՊ աշխատակազմի թեժ գծին զանգ է ստացվել նաև փաստաբանի կողմից:
«Պաշտպանի հանձնարարությամբ աշխատակազմի արագ արձագանքման խումբը մեկնել է Քննչական կոմիտե՝ ազատությունից զրկված անձանց իրավունքների ապահովման վիճակին և ազատությունից զրկելու հիմքերին տեղում ծանոթանալու նպատակով»,- ասված է հաղորդագրության մեջ:
Հետևեք մեզ — Facebook | Youtube
ՀՀ-ում հոգևորականներ են բերման ենթարկվել
