Հելսինկյան հանձնաժողով. «ՀՀ-ն հեռանում է Մոսկվայից, իսկ Վրաստանը թեքվում է դեպի ՌԴ»
Հելսինկյան հանձնաժողովը՝ Կովկասի մասին
«Վրաստանի կառավարության ռուսամետ և ոչ լիբերալ գործողությունները լուրջ անհանգստություն են առաջացնում, հատկապես այն պայմաններում, երբ Ռուսաստանը փորձում է պահպանել իր ազդեցությունը տարածաշրջանում: Ռազմավարական առումով ողջ Հարավային Կովկասը գտնվում է «դանակի ծայրին»,- հոկտեմբերի 3-ին հրապարակված բաց նամակում հայտարարել է ԱՄՆ Հելսինկյան հանձնաժողովը:
Ի՞նչ է գրում Հելսինկյան հանձնաժողովը
«Հարավային Կովկասը գտնվում է ռազմավարական առումով վտանգավոր իրավիճակում՝ դանակի ծայրին: Քանի որ Ռուսաստանը ձգտում է պահպանել իր ազդեցությունը տարածաշրջանում՝ սրելով տարածաշրջանային հակամարտությունները: Միացյալ Նահանգները և մեր դաշնակիցները պետք է վերանայեն իրենց մոտեցումը:
Հայաստանը՝ պատմականորեն Ռուսաստանի ամենամոտ դաշնակիցներից մեկը, հեռանում է Մոսկվայից: Միևնույն ժամանակ Ադրբեջանն ուժեղացնում է իր կապերը Ռուսաստանի հետ և հավասարակշռում է դրանք ՆԱՏՕ-ի անդամ Թուրքիայի և Եվրամիության հետ իր երկարատև և արդյունավետ հարաբերություններով:
Բացի այդ, «Վրացական երազանք»-ի կառավարությունը շրջադարձ է կատարել դեպի Ռուսաստան և ոչ լիբերալ կողմնորոշում՝ ակնհայտորեն մի կողմ դնելով իր ժողովրդի արևմտամետ տրամադրությունները: Այս շեղումը դեպի ռուսամետ դիրքորոշում լուրջ մտահոգություն է առաջացնում:
ԱՄՆ-ը պետք է միասնական՝ երկկուսակցական մոտեցում ցուցաբերի Կովկասի նկատմամբ, ուժեղացնի պատասխանատվության միջոցները ժողովրդավարությունից հեռանալու համար՝ միաժամանակ տրամադրելով մեխանիզմներ արևմտյան ինստիտուտների հետ ավելի խորը և ուժեղ ինտեգրման համար: Մենք պետք է միասին գծենք առաջընթացի ուղին:
Մեր նոր զեկույցի «Հարավային Կովկաս» վերնագրով գլուխը նախանշում է գործողությունների համապարփակ ծրագիր, որը ԱՄՆ-ը պետք է ձեռնարկի տարածաշրջանում ժողովրդավարական վճռականությունն ամրապնդելու և Ռուսաստանի աճող ազդեցությանը հակազդելու համար»:
