«ԵՄ առաքելությունը միջամտել չի կարող»․ Բաքվի հնարավոր հարձակման մասին
Հարձակում Հայաստանի վրա
Պաշտոնական Երևանից պարբերաբար հնչող նոր էսկալացիայի վտանգի վերաբերյալ հայտարարությունների ֆոնին Եվրամիության դիտորդական առաքելության ղեկավարը հայտարարել է․ «Բազմաթիվ հայերի համոզմամբ՝ գարնանն Ադրբեջանը հարձակում կձեռնարկի»։ Ադրբեջանի ԱԳՆ-ն անմիջապես արձագանքել է՝ նշելով, որ Մարկուս Ռիտերի խոսքերը «հիմնված են հայկական կողմի կեղծ պնդումների» վրա։
Հայ փորձագետները էսկալացիայի վտանգ տեսնում են մշտապես։ Ներկա պահին, սակայն, ռիսկերը համարում են «անհամեմատ ցածր»։
«Եթե գարնանն Ադրբեջանը չհարձակվի, ուրեմն ԵՄ առաքելությունը հաջողված է»
Deutsche Welle-ի հետ զրույցում նման հայտարարություն է արել ԵՄ դիտորդական առաքելության ղեկավար Մարկուս Ռիտերը: Նա նշել է, որ գարնանն ադրբեջանական կողմը հարձակում է ձեռնարկելու, թեև ներկայացրել է դա «բազմաթիվ հայերի համոզմամբ»։
Խոսելով երկամյա ժամկետով Հայաստանում տեղակայված առաքելության մասին՝ ընդգծել է՝ դիտորդներն Ադրբեջանի տարածք մուտք գործել չենք կարող, հետևաբար չեն կարող նաև արձանագրել, օրինակ՝ հարձակման նախապատրաստվող զորքերի տեղաշարժը։
«Մենք չենք կարող միջամտել։ Մենք մեր տրամադրության տակ ունենք միայն հեռադիտակներ և տեսախցիկներ»,- պարզաբանել է Ռիտերը։
«Խստորեն դատապարտում ենք»․ Բաքվի արձագանքը
Մարկուս Ռիտերի հայտարարությունը քննադատել է Ադրբեջանի արտգործնախարարության մամուլի քարտուղար Այհան Հաջիզադեն․
«ԵՄ առաքելության ղեկավարը, հիմնվելով հայկական կողմի կեղծ ու զրպարտչական պնդումների վրա, կարծիք է հայտնել, որ Ադրբեջանն, իբր, պատրաստվում է հարձակման, և որպես ԵՄ առաքելության հիմնական խնդիր է ներկայացրել «Հայաստանի պաշտպանությունն Ադրբեջանից»։
«Հայաստանի համար այլևս անվտանգ չէ»․ խորհրդարանի խոսնակ
«Հայաստանյան իշխանություններն ուզում են փոխել հարաբերությունների որակը մի տարածաշրջանում, մի միջավայրում, ուր մեզ համար այլևս անվտանգ չէ»,- Գերմանիայում հայտարարել է Հայաստանի խորհրդարանի խոսնակը։ Ալեն Սիմոնյանը վերահաստատել է՝ Հայաստանը հանդես է գալիս տարածաշրջանում խաղաղության դարաշրջան բացելու օրակարգով:
Ավելի վաղ Հայաստանի արտաքին գերատեսչությունը չէր բացառել, որ Ադրբեջանը կարող է դիմել «լայնածավալ ուժի կիրառման» ինչպես երկրի ինքնիշխան տարածքի, այնպես էլ Լեռնային Ղարաբաղի նկատմամբ։ Պաշտոնական Երևանի դիտարկմամբ՝ «տարածաշրջանի կայունությամբ և խաղաղությամբ հետաքրքրված բոլոր գործընկերները» պետք է գործուն քայլեր ձեռնարկեն Ադրբեջանի կողմից ուժի կիրառման դրսևորումները բացառելու ուղղությամբ։
«ԱՄՆ-ն, Եվրոպան և Իրանը՝ զսպող հանգամանք Բաքվի համար»
Քաղաքագետ Գուրգեն Սիմոնյանն ասում է՝ 2020 թ․-ի նոյեմբերի 9-ի հայտարարությունից հետո նոր էսկալացիայի հավանականությունը մշտապես եղել է շատ բարձր։
«Հավանականություն միշտ կա, որ ռազմական գործողությունները կվերսկսվեն, որովհետև խաղաղության պայմանագիր չկա, և Ադրբեջանը չի հրաժարվել իր նախկին քաղաքականությունից, բայց այդ ռիսկերն անհամեմատ ավելի ցածր են, քան 2021 թ․-ին և 2022 թ․-ին»,- JAMnews-ի հետ զրույցում նշել է նա։
Ըստ Սիմոնյանի՝ պատճառն այն է, որ փոխվել են աշխարհաքաղաքական իրողությունները։ Ընդգծում է՝ Հայաստանի Զինված ուժերն անհամեմատ ավելի բարվոք իրավիճակում են, քան անմիջապես պատերազմից հետո։ Մյուս կողմից նկատում է՝ դժվար թե ադրբեջանական կողմը ցանկանա քաղաքակիրթ աշխարհին հակառակ ընթանալ։
«Ադրբեջանին կարող են տալ անգամ ահաբեկչությանը խթանող, սպասարկող պետության կարգավիճակ այնպես, ինչպես Ռուսաստանին են տվել»,- շեշտում է նա։
Քաղաքագետի դիտարկմամբ՝ Բաքվի համար զսպող հանգամանքներ կարող են հանդիսանալ ԱՄՆ-ն, Եվրոպան և Իրանը։
Հետևեք մեզ — Facebook | Youtube | Telegram
Հարձակում Հայաստանի վրա
