Հարկային արտոնություններ Աբխազիայում. կաշխուժացնե՞ն տնտեսությունը, թե՞ երկիրը կդարձնեն օֆշորային
Հարկային արտոնություններ Աբխազիայում
Աբխազիայի իշխանությունները մտադիր են ներգրավել խոշոր ներդրողների՝ նրանց տրամադրելով աննախադեպ արտոնություններ։ Ընդդիմությունը դեմ է արտահայտվում՝ ենթադրելով, որ դա հանրապետությունը կվերածի օֆշորային գոտու և մեծապես կվնասի նրա իմիջին։
Ո՞րն է արտոնությունների էությունը
«Ներդրումային գործունեության մասին» օրենքում փոփոխությունները նախատեսում են հարկային արտոնություններ այն ներդրողների համար, որոնք հանրապետությունում կներդնեն ավելի քան երկու միլիարդ ռուբլի [մոտ 20 միլիոն եվրո]։
Ներդրողը 25 տարի ժամկետով ամբողջությամբ կազատվի եկամտահարկի և գույքահարկի վճարումներից։
Այս փոփոխություններն արդեն հավանության են արժանացել տնտեսական քաղաքականության խորհրդարանական հանձնաժողովի կողմից և պետք է ներկայացվեն հաջորդ նստաշրջանի ընթացքում։
«Օտարերկրյա կապիտալ»=«ռուսական»
Տեսականորեն՝ օրենքի փոփոխությունները վերաբերում են ցանկացած ներդրողի, այդ թվում՝ տեղական։ Սակայն իրականությունն այն է, որ նույնիսկ ամենահաջողակ աբխազ գործարարները երկու միլիարդ ռուբլու չափով ազատ միջոցներ չունեն։ Այսինքն՝ միայն օտարերկրյա բիզնեսները կկարողանան օգտվել առատաձեռն արտոնություններից, ինչը տեղի ձեռներեցներին դնում է ակնհայտ անհավասար պայմանների մեջ։
Բացի այդ, այս դեպքում «օտարերկրյա բիզնես» նշանակում է «ռուսական»։ Այն այժմ, հայտնվելով Արևմուտքի պատժամիջոցների տակ, լրջորեն իր ուշադրությունը սևեռել է Աբխազիայի վրա։
Սուխումի օդանավակայանի վերակառուցումը, նախագահ Ասլան Բժանիայի կողմից լոբբինգ արված «բնակարանների օրենքը». ռուսական բիզնեսի մասնակցությամբ այս և այլ խոշոր նախագծերն արդեն հասցրել են մեծ աղմուկ բարձրացնել Աբխազիայում և շատերի մոտ դժգոհություն կամ առնվազն թերահավատություն առաջացնել։
- «Աշխարհը հերքում է մեր գոյությունը». Աբխազիայի երիտասարդների կյանքը ԵՄ պատժամիջոցներից հետո
- Անվճար բնակարան Աբխազիայում. ո՞ւմ համար է նախատեսված
Կառավարությունը պնդում է, որ այս ամենը կաշխուժացնի Աբխազիայի տնտեսությունը և դրական ազդեցություն կունենա նրա բնակիչների բարեկեցության վրա։ Ընդդիմությունն ու անկախ փորձագետները, սակայն, դրան չեն հավատում։
Ինչո՞ւ է ընդդիմությունը դեմ
Ընդդիմությունը կարծում է, որ Աբխազիայում ներդրողների համար արտոնությունների կիրառման պրակտիկան ցույց է տալիս դրանց անարդյունավետությունը, և նոր փոփոխությունների պատճառով հանրապետությունը կարող է նույնիսկ վերածվել օֆշորային գոտու։
«Մենք ամենայն պատասխանատվությամբ հայտարարում ենք, որ մեր երկրի վերածումը օֆշորային գոտու ռիսկեր և սպառնալիքներ է պարունակում և կհանգեցնի բոլոր տեսակի սև ցուցակներում Աբխազիայի ընդգրկման՝ որպես գորշ գոտի ապօրինի վաստակած կապիտալի լվացման համար», — ասված է ընդդիմադիր կազմակերպությունների համատեղ հայտարարությունում։
«Նման «արտոնյալ քաղաքականության» պատճառով ՌԴ ֆինանսների նախարարությունը 2015 թվականին մեզ արդեն ներառել է սև ցուցակում, քանի որ մենք ընկել ենք օֆշորային գոտու բնութագրիչների տակ։ Հիմա պատմությունը կարող է կրկնվել»,- հիշեցնում է տնտեսագետ Ախրա Արիստավան։
Բացի այդ, ըստ Արիստավայի, խոշոր կապիտալի համար երկարաժամկետ արտոնությունների քաղաքականությունը նշանակում է, որ պետական գանձարանը կկորցնի լուրջ ֆինանսական եկամուտներ։ Համապատասխանաբար, կառավարությունը չի կարողանա բարելավել սոցիալական փաթեթը և բարձրացնել ինչպես կենսաթոշակները, որոնք չնչին գումար են կազմում, այնպես էլ պետական հատվածի աշխատողների աշխատավարձերը։
Հետևեք մեզ — Facebook | Youtube | Telegram
Հարկային արտոնություններ Աբխազիայում
