ՀԱՊԿ-ը որոշել է օգնել Հայաստանին, բայց հայտնի չէ` ինչպես
Ինչպե՞ս ՀԱՊԿ-ը կօգնի Հայաստանին
Հայաստանի նախաձեռնությամբ հոկտեմբերի 28-ին տեսակոնֆերանսի ձևաչափով տեղի է ունեցել ՀԱՊԿ Հավաքական անվտանգության խորհրդի (ստեղծվել և գործում է Ռուսաստանի հովանու ներքո) արտահերթ նիստը։ Հանդիպմանը մասնակցել են դաշինքի անդամ վեց երկրների ղեկավարները։ Դաշինքին անդամակցում են Հայաստանը, Ռուսաստանը, Բելառուսը, Ղազախստանը, Ղրղզստանը և Տաջիկստանը։
Նիստի արդյունքներն ամփոփող պաշտոնական հաղորդագրությունում նշվում է, որ «քննարկվել են Հայաստանին օգնություն տրամադրելու համատեղ քայլերը»։ Բայց թե որոնք են այդ քայլերը, հայտնի չէ:
Հակառակ Հայաստանի սպասումներին՝
● Նիստի արդյունքներն ամփոփող հաղորդագրությունում չկա «սեպտեմբերի 13-14-ին Ադրբեջանի ագրեսիան Հայաստանի դեմ» ձևակերպում։
● Չկան տեղեկություններ այն մասին, թե ինչպես է վերականգնվելու Հայաստանի տարածքային ամբողջականությունը։
● Սեպտեմբերի 13-14-ի իրադարձությունները ամփոփիչ հաղորդագրությունում ներկայացվում են որպես սրացում հայ-ադրբեջանական սահմանին՝ առանց մատնանշելու, թե որ կողմն է սկսել ռազմական գործողությունները։
Ի՞նչ է քննարկվել նիստում
Հանդիպումը դռնփակ էր, և դժվար է դատել, թե ուրիշ ինչ է ասվել հանդիպման ընթացքում։
Սակայն Հայաստանի կառավարության մամուլի հաղորդագրությունից տեղեկանում ենք, որ ՀԱՊԿ գլխավոր քարտուղարի զեկույցը, որը ներկայացվել է նիստում, «մեծապես արտահայտում է առկա իրողությունները, մասնավորապես ադրբեջանական ստորաբաժանումների կողմից ՀՀ ինքնիշխան տարածք ներխուժման փաստը և դրա կրկնության վտանգը, ինչպես նաև ադրբեջանական ուժերի՝ ելման դիրքեր վերադառնալու անհրաժեշտությունը»։
Ըստ Հայաստանի վարչապետի պաշտոնական կայքի՝ նա հերթական անգամ հայտարարել է, որ «հստակ ակնկալիքներ կան, որ նախ՝ ՀԱՊԿ-ը հստակ քաղաքական գնահատական կտա կատարվածին, և երկրորդ՝ կընդունի Հայաստանի տարածքային ամբողջականությունը վերականգնելու ճանապարհային քարտեզ»։
Պուտինը ելույթ ունեցավ, բայց առանց հստակ ուղերձների
Նիստի ընթացքում ելույթ է ունեցել նաև ՌԴ նախագահ Վլադիմիր Պուտինը։ Կրեմլի պաշտոնական կայքը կարճ տեսանյութ է տարածել։ Դրանում ՌԴ նախագահ Վլադիմիր Պուտինը հայտարարում է, որ Ռուսաստանը միշտ աջակցել է Հայաստանին անվտանգության ապահովման հարցում, և խաղաղության միակ հնարավոր ճանապարհը Ռուսաստանի Դաշնության, Հայաստանի և Ադրբեջանի ղեկավարների համատեղ հայտարարությունների բոլոր դրույթների կատարումն է։
Բայց Պուտինի ելույթում նույնպես չկան հասցեական գնահատականներ և հստակ հայտարարություններ հետագա քայլերի վերաբերյալ։
«Ինչ վերաբերում է հայ-ադրբեջանական կարգավորմանը, ապա այսօր էլ մենք անում ենք ամեն հնարավորը Բաքվի և Երևանի միջև հարաբերությունների համապարփակ կարգավորման հասնելու համար։ Բոլորի համար ակնհայտ է, որ ոչ վաղ անցյալում և՛ Ադրբեջանը, և՛ Հայաստանը, ինչպես Ռուսաստանը, մեկ պետության կազմում էին։ Մենք հսկայական կապեր ունենք Երևանի և Բաքվի հետ, և դա հաշվի չառնելը պարզապես անհնար է։ Մենք բոլորս բավականին ծանր վիճակում ենք։ Բայց, իհարկե, մենք չենք կարող անմասն մնալ Ռուսաստանի մտերիմ պետությունների միջև առկա խնդիրներից ու հակասություններից և միշտ պատրաստ ենք նպաստել դրանց խաղաղ կարգավորմանը»,— ասել է Պուտինը։
- Երկու իրարամերժ պատասխան Երևանից Պուտինի հայտարարություն. ի՞նչ է կատարվում
- ՌԴ-ն չի ճանաչում Ադրբեջանի ինքնիշխանությունը Ղարաբաղի նկատմամբ. մեկնաբանություններ Բաքվից
- Ի՞նչ է քննարկվելու Փաշինյան-Ալիև հանդիպմանը Սոչիում. կարծիքներ
- «ԵՄ և ՀԱՊԿ-ի առաքելությունների համադրման քաղաքական մոտիվ չկա». կարծիք
«Ուղղափառ հայեր»
Նիստում եղել են նաև զավեշտալի պահեր։ Լրագրողները և սոցիալական ցանցերը մեջբերում են Բելառուսի նախագահ Ալեքսանդր Լուկաշենկոյի հայտարարությունը «Հայաստանի ուղղափառ ժողովրդի» մասին, մինչդեռ երկրում գերիշխում են Հայ Առաքելական եկեղեցու հետևորդները։
Հայաստանը վրդովված է ՀԱՊԿ-ի անգործությունից
Պաշտոնական Երևանը բազմիցս հրապարակայնորեն քննադատել է ՀԱՊԿ-ին Հայաստանին ռազմական օգնություն չցուցաբերելու համար Ադրբեջանի հետ սահմանին սրացման ժամանակ, որը Երևանը և շատ արևմտյան քաղաքական գործիչներ անվանել են ներխուժում Հայաստանի տարածք։
Մի քանի շաբաթ առաջ Հայաստանի արտգործնախարարի հետ հանդիպման ժամանակ ՌԴ ԱԳ նախարարը հայտարարեց, որ ՀԱՊԿ-ը պատրաստ է դիտորդներ ուղարկել հայ-ադրբեջանական սահման, և դրա համար անհրաժեշտ է միայն Հավաքական անվտանգության խորհրդի նիստ կազմակերպել, իսկ կազմակերպությունում ներկայումս նախագահում է Հայաստանը։
Խորհրդի նիստը կայացավ։ Առայժմ, սակայն, հայտնի չէ՝ պայմանավորվածություն ձեռք բերվե՞լ է դիտորդներ ուղարկելու վերաբերյալ, և եթե այո, ապա ի՞նչ մանդատ կարող է ունենալ այդ առաքելությունը։
Հայաստանի կառավարության տարածած հաղորդագրության համաձայն՝ ՀԱՊԿ երկրների ԱԳ նախարարներին տրվել է որոշման նախագիծ համաձայնեցնելու հանձնարարական։ Բացի այդ, նոյեմբերի վերջին նախատեսված է ՀԱՊԿ նիստ, որի ընթացքում պետք է դիտարկվի հայ-ադրբեջանական սահմանին տիրող իրավիճակը։
Հետևեք մեզ — Facebook | Youtube | Telegram
Ինչպե՞ս ՀԱՊԿ-ը կօգնի Հայաստանին
