Հանցավորության դեմ պայքարում Հայաստանը տարածաշրջանի առաջատարն է
Հանցավորությունը ՀՀ-ում
«Աշխարհում հանցավորության մակարդակի վերաբերյալ վերլուծության համաձայն՝ Հայաստանը հանցավորության ցածր մակարդակ ունեցող 137 երկրների շարքում զբաղեցնում է 9-րդ հորիզոնականը, իսկ տարածաշրջանի երկրների շարքում՝ 1-ին հորիզոնականը»,- հայտարարել է Ներքին գործերի նախարար Վահե Ղազարյանը։
«Հանցավորության մակարդակն ըստ երկրների — 2023» (World Population Review 2023) հետազոտությունն իրականացվել է World Population Review միջազգային կազմակերպության կողմից։
Նրա փոխանցմամբ՝ հարևան Վրաստանը 10-րդ հորիզոնականում է։ Առաջատարների հնգյակում են Կատարը, Արաբական Միացյալ Էմիրությունը, Թայվանը, Օմանը և Նոր Զելանդիան։
Ղազարյանը խորհրդարանի պաշտպանության և անվտանգության հարցերի հանձնաժողովի նիստում ներկայացրել է ՀՀ կառավարության ծրագրի (2021-2026 թթ.) 2023 թվականի կատարման ընթացքի և արդյունքների մասին զեկույցը։
Թմրամիջոցների վաճառքով զբաղվող 650 առցանց խանութ է հայտնաբերվել
Ներքին գործերի նախարարը տեղեկացրել է՝ 2023 թ․-ը նախարարության կողմից հայտարարվել էր թմրամիջոցների դեմ պայքարի տարի․
«Նախորդ տարի թմրամիջոցների ապօրինի շրջանառության դեպքերի հայտնաբերման թիվն աճել է 2847-ով կամ ավելի քան 2,5 անգամ։ Հայտնաբերվել են թմրամիջոցների վաճառքով զբաղվող համացանցային 650 խանութ և 35 ալիք»։
Բարեփոխումներ, այդ թվում՝ աշխատավարձի բարձրացում
Նախարարն անդրադարձել է նաև նախարարության կառուցվածքային վերափոխման գործընթացին, նոր ոստիկանության ձևավորմանը։ Այն 4 ուղղություն է ունենալու՝ քրեական, պարեկային, համայնքային և ոստիկանության գվարդիա։ Շեշտել է՝ հանրապետության ողջ տարածքում արդեն իսկ ներդրվել է պարեկային ծառայությունը։ Մյուս ուղղությունների մասով օրենսդրական փաթեթներ են ընդունվել։
Ըստ նրա՝ ոստիկաններն այժմ ունեն ատեստավորման միջոցով աշխատավարձը բարձրացնելու հնարավորություն։
«Նախկինում 222,000 դրամ ստացող օպերատիվ աշխատակիցը, ատեստավորումը գերազանց հանձնելով, ստանում է 459,000 դրամ»,- նկատել է Ղազարյանը ու հավելել, որ ատեստավորում կարող են անցնել նաև փրկարար ծառայության աշխատակիցները։
Վահե Ղազարյանի փոխանցմամբ՝ 2023 թ․-ին փրկարար ծառայությունը համալրվել է 8 ամենագնացներով, ձեռք է բերվել 2 անօդաչու թռչող սարք։
«Մեր դռները բաց են արցախցիների համար»
«Հայաստան» խմբակցության պատգամավոր Գեղամ Նազարյանը նախարարին հարցրել է՝ կա՞ վիճակագրություն, թե արցախցի քանի ոստիկան կամ փրկարար է ՀՀ-ում իր մասնագիտությամբ աշխատանքի անցել։ Ի պատասխան ՆԳ նախարար Վահե Ղազարյանը հայտնել է, որ նախորդ տարեվերջին հանդիպում է նախաձեռնել Լեռնային Ղարաբաղի Ներքին գործերի նախարարի և ղեկավար կազմի հետ։
«Եվ մենք ասել ենք՝ մեր դռները ձեր առաջ բաց են։ Այսօր արդեն 5 հոգի ունենք աշխատող, ընդհուպ՝ բարձրաստիճան անձ»,- հայտարարել է նա։
Միևնույն ժամանակ՝ նախարարը հայտնել է, որ Արցախից բռնի տեղահանված անձանց փորձում են աշխատանքի տեղավորել ՆԳՆ տարբեր կառույցներում։
Օգտագործելով առիթը՝ Ղազարյանը ներկայացրել է նաև ԼՂ-ից բռնի տեղահանվածների հաշվառման գործընթացը։
«Ներկայումս ժամանակավոր պաշտպանության վկայական է ստացել 76,339 անձ, հաշվառվել 79,682-ը, իսկ քաղաքացիության համար դիմել է 1437 անձ»,- հայտնել է նա։
2024 թ․-ը՝ ՃՏՊ-ների դեմ պայքարի տարի
Այս տարվա առաջին եռամսյակում ճանապարհատրանսպորտային պատահարների նվազում է նկատվում։
«54 դեպքով ունենք ՃՏՊ-ների նվազում, 6-ով՝ մահվան ելքով ՃՏՊ-ների նվազում և 110-ով՝ վիրավորներով»,- հայտնել է նախարարն ու հավելել՝ բավականին լավ ցուցանիշ է։
Ղազարյանի գնահատմամբ՝ այսօր վարորդները չունեն քշելու ունակություն: Վթարների պատճառների թվում մատնանշել է ճանապարհների «լավ որակը», որը թույլ է տալիս գերազանցել արագությունը։
Տեղեկացրել է՝ նախատեսվում է մայրուղիներին էլեկտրոնային տեսալուսանկարահանող համակարգ ներդնել։ Ծրագրի իրականացման համար մրցույթ է հայտարարված։
«Եթե ամեն ինչ բարեհաջող անցնի, մենք բոլոր մայրուղիներին կտեղադրենք նոր ու ժամանակակից տեսախցիկներ, որոնք ցույց կտան արագությունը, վարորդը ստիպված կլինի արագությունն իջեցնել»,- ասել է Ղազարյանը։
Հետևեք մեզ — Facebook | Youtube | Telegram
Հանցավորությունը ՀՀ-ում․ վիճակագրություն
