Վրաստանի նախագահը ներում կշնորհի՞ Սաակաշվիլիին

Հանրահավաք Թբիլիսիում՝ ընդդեմ Սաակաշվիլիի ներման

Դեկտեմբերի 28-ի երեկոյան Թբիլիսիում՝ Վրաստանի նախագահ Սալոմե Զուրաբիշվիլիի նստավայրի առաջ տեղի է ունեցել ցույց՝ Վրաստանի նախկին նախագահ Միխեիլ Սաակաշվիլիին ներում չշնորհելու պահանջով։ Ակցիան կազմակերպել են գործող իշխանություններին հավատարիմ քաղաքացիները։

Երկար ժամանակ է, ինչ միջազգային և վրացական բազմաթիվ քաղաքական գործիչներ ու կազմակերպություններ Վրաստանի իշխանություններից պահանջում են թույլ տալ բուժման նպատակով արտերկիր տեղափոխել կլինիկայում գտնվող, ծանր հիվանդ Սաակաշվիլիին։ Ի թիվս այլոց, ակտիվ կոչեր են հնչում ուղղված գործող նախագահին, ով իրավունք ունի նրան ներում շնորհել։ Մինչ այժմ Զուրաբիշվիլին հստակ հայտարարել է, որ դա չի անի։

Բողոքի ակցիայի մասնակիցները հայտարարել են, որ դեմ են հնարավոր ներմանը և դեմ են նաև նրան, որ Սաակաշվիլին բուժման նպատակով տեղափոխվի արտերկիր։

Նախագահ Սալոմե Զուրաբիշվիլին մոտեցել է ցուցարարներին ու ասել, որ նրանք «անկեղծ չեն իրենց կարգախոսներում».

«Դուք եկել եք այստեղ որոշ մարդկանց տարածած լուրերից հետո։ Բայց հետաքրքիրն այն է, թե որտեղ էին այդ մարդիկ 2007 թվականին, երբ տեղի ունեցան Սաակաշվիլիի ժամանակաշրջանի ողբերգությունները։ Որտե՞ղ էին նրանք, երբ ես էի կանգնած փողոցում։ Ես ձեզ կասեմ, թե որտեղ էին նրանք: Այսօր լուրեր տարածողները կա՛մ Միշայի [Սաակաշվիլիի] շտաբում էին, կա՛մ բարձր պաշտոններ էին զբաղեցնում»։

Դրանից հետո նախագահը հատուկ ճեպազրույց է անցկացրել, որտեղ կրկնել է նույն մեղադրանքները.

«Ինչպե՞ս կարող են նրանք ինձ հետ խոսել բարոյականության մասին: Հետաքրքիր է՝ ի՞նչ կարող են ինձ սովորեցնել»։

Նախագահ Սալոմե Զուրաբիշվիլիի խոսքով՝ Միխեիլ Սաակաշվիլիին ներում շնորհելու մասին հիմնական հարցի պատասխանը «կտրվի այն ժամանակ, երբ կտրվի»։

Ապա նա ներկայացրել է իրավիճակի իր տեսլականը.

«Ի՞նչ ընդհանրություն ունեն այս երկու քաղաքական ուժերը [իշխող կուսակցությունն ու ընդդիմությունը]։ Երկուսն էլ պայմաններ են ստեղծել Սաակաշվիլիի գալու համար։

Մի ուժը [«Միացյալ ազգային շարժում» ընդդիմադիր կուսակցությունը] հրահրել է՝ հրավիրելով ու հեղափոխություն խոստանալով, ասելով, թե ժողովուրդը դուրս կգա փողոց։

Իսկ երկրորդը [իշխող «Վրացական երազանք» կուսակցությունը] այլ կերպ է հրահրել՝ օգտագործելով վրացական բնավորության առանձնահատկությունները։ Ասել են՝ «եթե հերոս ես, ոչ թե վախկոտ, ուրեմն արի»։

Նրա գալով շահագրգռված էին երկու քաղաքական ուժերն էլ, ու հիմա պարզ է, թե ինչու։ Հիմա ամբողջ երկիրը Միշայի շուրջ վեճերի, քննարկումների ու պայքարի մեջ է։ Այլ թեմա չկա, այլ թեմայով խոսելն անհնար է»,- հայտարարել է Զուրաբիշվիլին։

«Ինձ սպառնում են իմ կարիերայով, ասում են՝ հրաժեշտ կտամ կարիերայիս, չգիտեմ, գուցե մոռանում են՝ քանի տարեկան եմ։ Ինձ ճանաչողները գիտեն, որ ինձ հետաքրքրում է միայն այս երկիրը և բացառապես նրա եվրոպական ապագան»,- ճեպազրույցում ասել է Վրաստանի նախագահը։

• «Չպետք է թույլ տանք, որ իմ հայրը մահանա բանտում». Սաակաշվիլիի որդի
• 2008 թ․-ի օգոստոսյան պատերազմի ժամանակ կատարված հանցագործությունների հետաքննությունն ավարտվել է
• Ի՞նչ է վաճառում Վրաստանը Եվրոպայում. Ասոցացման համաձայնագրի 8 տարին

Միխեիլ Սաակաշվիլիին ներում շնորհելու խնդրագրով, որն արդեն ստորագրել է ավելի քան երկու հազար մարդ, մի խումբ կանայք դիմել են Վրաստանի նախագահին։

#SaveMisha — այս կարգախոսի ներքո Ուկրաինայի նախագահի խորհրդական Ալեքսեյ Արեստովիչը և իրավապաշտպան, բլոգեր Մարկ Ֆեյգինը աշխարհի մարդկանց կոչ են անում ի պաշտպանություն Միխեիլ Սաակաշվիլիի կազմակերպել ցույցեր, հունվարի 4-ին՝ տեղական ժամանակով ժամը 12-ից 14-ը ընկած հատվածում գնալ աշխարհի տարբեր երկրներում գտնվող Վրաստանի դեսպանատներ։

Նույն եթերի ընթացքում Ալեքսեյ Արեստովիչը նշել է, որ «Միխեիլ Սաակաշվիլիին բանտում ոչնչացնում են շոուի համար» և հեռուստադիտողներին կոչ է արել մասնակցել գլոբալ ակցիային, քանի որ «մենք չենք կարող թույլ տալ, որ ժամանակակից աշխարհում մարդուն այսպես վերաբերվեն»։

Դեկտեմբերի 20-ին Ուկրաինայի նախագահ Վլադիմիր Զելենսկին կոչ էր արել Վրաստանի կառավարությանը Միխեիլ Սաակաշվիլիին բուժման նպատակով տեղափոխել արտասահման։ Նրա կոչին միացել էր Մոլդովայի նախագահ Մայա Սանդուն։

Ի պատասխան՝ «Վրացական երազանքի» նախագահ Իրակլի Կոբախիձեն նշել էր, որ Զելենսկու հայտարարությունը նշանակություն չի ունենա, իսկ Սանդուն «պետք է ավելի մոտիկից դիտարկի Մոլդովայի վեցերորդ նախագահին [նկատի ունի Մոլդովայի հինգերորդ նախագահ Իգոր Դոդոնին], որը դեռ բանտում է»։

Օրեր առաջ Միխեիլ Սաակաշվիլին ուկրաինացի լրագրող Դմիտրի Գորդոնին ուղարկել էր նամակ, որով հայտնել էր, որ ամերիկացի թունաբանների զեկույցի համաձայն՝ Սաակաշվիլին բանտում թունավորել են թունավոր նյութերի խառնուրդով, որը, ինչպես ինքն է գրել, պետք է սպաներ իրեն։ Սակայն «Ես չեմ մահացել, բայց դեռ բոլոր ախտանիշներն ունեմ, առանց բուժման դա կհանգեցնի մահվան»,- գրել էր Սաակաշվիլին։ Ի պատասխան այս նամակի՝ Դմիտրի Գորդոնը տեսաուղերձ է հրապարակել՝ բուժման նպատակով Սաակաշվիլիին արտասահման տեղափոխելու պահանջով։

Դեկտեմբերի 24-ին Սաակաշվիլին նամակ էր գրել նաև ռուս իրավապաշտպան Մարկ Ֆեյգինին՝ նշելով, որ իրեն ցանկացել են սպանել Պուտինի հրամանով։ Նամակը, որը Սաակաշվիլին գրել էր ռուսերեն, Ֆեյգինը տեղադրել է իր Twitter-ում։

Հետևեք մեզ — Facebook | Youtube | Telegram

Հանրահավաք Թբիլիսիում՝ ընդդեմ Սաակաշվիլիի ներման