Հայկական լաստանավի գործարկումը ձգձգվում է. ի՞նչն է պատճառը

Լաստանավային փոխադրումներ Սև ծովով

Ռուսաստանի նկատմամբ կիրառվող պատժամիջոցները խոչընդոտում են հայկական լաստանավի գործարկմանը: Լրագրողների հետ ճեպազրույցում ասել է Հայաստանի էկոնոմիկայի նախարար Վահան Քերոբյանը:

Հայաստանը Սև ծովով լաստանավային կանոնավոր փոխադրումներ պետք է իրականացներ հունիսի 15-ից: Կառավարությունն այդ մասին հայտարարել էր դեռևս մայիսի սկզբին:

Լաստանավային փոխադրումները՝ Վերին Լարսի անցակետին այլընտրանք. Հայաստանի նոր մոտեցումը

Կառավարության որոշմամբ՝ փոխադրումների ծառայությունների արժեքն ամբողջությամբ կսուբսիդավորվի։ Սուբսիդավորումը, սակայն, հավերժ չի լինելու:

էկոնոմիկայի նախարարի փոխանցմամբ՝ հայկական լաստանավային փոխադրումների նկատմամբ սահմանափակումներ է կիրառում հոլանդական APM ընկերությունը, որն էլ շահագործում է վրացական Փոթի նավահանգիստը:

«Եվրոպական շատ ընկերություններ սանկցիաներ են կիրառում Ռուսաստանի նկատմամբ, և APM-ը, հանդիսանալով աշխարհի խոշորագույն նավային ընկերություններից մեկը, ևս սանկցիաներ ունի կիրառած Ռուսաստանի դեմ։ Հիմա մենք բանակցում ենք, որպեսզի մեր լաստանավերի վրա այդ սանկցիաները չկիրառվեն։ Եվ, ըստ էության, իրենք իրավունք էլ չունեն»,- հայտնել է նա:

Նախարարը հիշեցնում է, որ լաստանավային կանոնավոր հաղորդակցություն Հայաստանը երբևէ չի ունեցել։ Բնական է համարում այն, որ կան նաև որոշակի ռիսկեր: Վստահեցնում է՝ կառավարությունն անում է ամեն բան «օր առաջ այդ ծառայությունը արտահանողներին և ներմուծողներին հասանելի դարձնելու համար»:

Էկոնոմիկայի նախարարի խոսքով՝ ամեն բան պատրաստ է, մնում է ստանալ վերջին թույլտվությունը, սպասում են հոլանդական ընկերության պատասխանին: Կոնկրետ ժամկետներ, սակայն, Քերոբյանը չի մատնանշել:

«Ռիկոշետ» Հայաստանի վրա․ ինչպե՞ս կտուժի տնտեսությունը Ուկրաինայի պատերազմի հետևանքով

2022 թվականին Հայաստանը ակնկալում էր լիովին հաղթահարել համավարակի հետևանքները և տնտեսական աճ ապահովել 5%-ով ավելի, քան նախորդ տարի, սակայն Ռուսաստանի դեմ պատժամիջոցներն ամեն ինչ փոխեցին

Գործադիրը կանոնավոր լաստանավային փոխադրումները դիտարկում է որպես Վերին Լարսի անցակետի այլընտրանք: Հայաստանն ու Ռուսաստանը կապող միակ ցամաքային ուղին անցնում է Վերին Լարսով, սակայն եղանակային անբարենպաստ պայմանների պատճառով անցակետը հաճախ փակ է լինում: Սա բացասական ազդեցություն է թողնում Հայաստանի տնտեսության, մասնավորապես՝ արտահանման ցուցանիշների վրա:

Էկոնոմիկայի նախարարության առաջարկով՝ գործադիրը որոշել է սուբսիդավորել լաստանավային փոխադրման ամբողջ արժեքը՝ իրականացնելով լաստանավի վարձակալում։

Փոթի-Պորտ Կավկազ լաստանավային հաղորդակցությունը լինելու է կանոնավոր՝ շաբաթական երկու անգամ: Լաստանավն ունենալու է երկաթուղային 40 վագոնի և 50 բեռնատարի տեղափոխման հնարավորություն։

Ըստ նախնական գնահատականների՝ լաստանավային փոխադրման արդյունքում տարվա ընթացքում հարկային մուտքերն ավելանալու են 2.7 մլն դոլարով:

Ի՞նչ կկորցնի ու կշահի Հայաստանը ՌԴ դեմ կիրառվող պատժամիջոցների արդյունքում

ՌԴ հնարավոր անջատումը SWIFT համակարգից, ռուբլու արժեզրկումն ու իրավիճակի ազդեցությունը Հայաստանի տնտեսության վրա

Լաստանավային փոխադրումներ Սև ծովով