Սրացում Ադրբեջանի և Հայաստանի սահմանին․ հակամարտության նոր զարգացո՞ւմ
Երևանն Ադրբեջանին մեղադրել է իր հարավային սահմանները հրետակոծելու համար, Բաքուն հերքել է դա, սակայն հայտարարել է Իրանի հետ սահմանին Հայաստանի կողմից սադրանքի մասին։
Մարտերը ղարաբաղյան հակամարտության գոտում շարունակվում են սեպտեմբերի 27-ից, զոհվել է արդեն մի քանի հազար զինվորական և քաղաքացիական անձ երկու կողմից։ Այս ընթացքում երեք անգամ հրադադար է հայտարարվել՝ հոկտեմբերի 10-ին, 18-ին և 26-ին, սակայն ամեն անգամ այն միանգամից խախտվել է։ Կողմերը միմյանց են մեղադրում հրադադարը խախտելու համար։
Նորություններ և ռեպորտաժներ բոլոր կողմերից՝ Արցախի շուրջ և Հայաստանի ու Ադրբեջանի սահմանին ընթացող ռազմական գործողությունների մասին։ Մարտերը շարունակվում են արդեն մեկ ամիս
Հոկտեմբերի 27-ի առավոտյան Հայաստանի պաշտպանության նախարարությունը հաղորդագրություն է տարածել իր հարավային սահմաններն ադրբեջանական զինված ուժերի կողմից հրետակոծելու մասին։
Բաքվում այս հաղորդագրությունը հերքել են։
Սակայն արդեն մի քանի րոպե անց կողմերը միմյանց մեղադրել են սահմանի նույն հատվածում սրացման համար։
Երկու բանակների միջև արդեն ոչ թե ղարաբաղյան հակամարտության գոտում, այլ երկու երկրների սահմանին բախումների մասին հաղորդագրություններ են սկսել ստացվել այն բանից հետո, երբ Ադրբեջանը հաղորդել է, որ վերահսկողության տակ է առել Իրանի և Ադրբեջանի միջև սահմանի հատվածը (ղարաբաղյան հակամարտության գոտում)։
• «Պատերազմն Ադրբեջանի համար փոխզիջումը չեղարկելու միջոց է»․ հայ քաղաքագետ
• Հայաստանի վարչապետի տիկինն արցախյան ճակատ կմեկնի
Հայաստանի պաշտպանության նախարարության տեղեկությունները
Հոկտեմբերի 27-ի առավոտյան Հայաստանի պաշտպանության նախարարության մամուլի քարտուղար Շուշան Ստեփանյանը հաղորդել է, որ «ադրբեջանական կողմը հերթական անգամ խախտել է հրադադարի ռեժիմը՝ կիրառելով ԱԹՍ-ներ (որոնցից մեկն ընկել է Հայաստանի տարածքում)»։
«Ադրբեջանը հրետանային կայանքներից հրետակոծել է Հայաստանի սահմանապահ ուղեկալի դիրքերն Իրանի հետ հարավային սահմանին»։
Որոշ ժամանակ անց Հայաստանի պաշտպանության նախարարությունը հաղորդել է, որ «հակառակորդը շարունակում է կրակ վարել Հայաստանի Հանրապետության հարավային սահմանի ուղղությամբ։ Կան վիրավորներ»։
Հայաստանի պաշտպանության նախարարությունը զգուշացրել է, որ «ստիպված է պատասխան միջոցներ կիրառել ադրբեջանական զորքերի դեմ»։
Ադրբեջանի պաշտպանության նախարարության տեղեկությունները
«Հայաստանի տարածած տեղեկությունն այն մասին, թե իբր այսօր Հայաստանի տարածքն Ադրբեջանը հրետակոծել է ԱԹՍ-ներով և հրթիռահրետանային համակարգերով, սուտ է և սադրիչ բնույթ է կրում», — գրեթե անմիջապես հայտարարել է Ադրբեջանի պաշտպանության նախարարությունը։
Այնուհետև Ադրբեջանի պաշտպանության նախարարությունն ու սահմանապահ ծառայությունը համատեղ հայտարարությամբ են հանդես եկել այն մասին, որ «Հայաստանը նպատակաուղղված կերպով սրում է իրավիճակը ճակատի տարբեր ուղղություններով, հատկապես՝ պետական սահմանի վերականգնված հատվածներում»։
«Հայաստանի ղեկավարությունն արդեն պետք է գիտակցի և համակերպվի, որ վերականգնված պետական սահմանները հակամարտության գոտի չեն, այլ միջազգային հանրության կողմից ճանաչված պետական սահման, որը բնորոշում է Ադրբեջանի լիիրավ ինքնիշխան տարածքները […]։
Այդ ուղղությամբ ցանկացած սադրանք գնահատվում է որպես ագրեսիայի ակտ մեր տարածքային ամբողջականության նկատմամբ։ Ադրբեջանն իրավունք ունի ոչնչացնելու ցանկացած լեգիտիմ ռազմական օբյեկտ, որը սպառնում է իր տարածքին՝ անկախ դրա տեղակայումից», — ասված է հայտարարությունում։
Թուրքական ներխուժում Հայաստա՞ն
Որոշ աղբյուրներ, գլխավորապես՝ Telegram-ալիքները, հաղորդել են, իբր թուրքական հատուկ նշանակության ջոկատ է նախապատրաստվում՝ Հայաստան ներխուժելու համար։
Նման հաղորդագրություններից մեկը․
«Տեղեկություններ կան, որ Սիրիայում Էրդողանի խմբավորումներին հասցված ռուսական հարվածներից հետո (դրանք հասցվել են նախօրեին), թուրք «սուլթանն» անմիջապես որոշել է ռևանշ վերցնել և գրոհել Հայաստանի առանձին շրջանները երկրի հարավում։ Այսպիսով, պատերազմը մտնում է նոր, ավելի մասշտաբային փուլ»։
Կողմերից ոչ մեկի պաշտոնական աղբյուրներն այս լուրը չեն մեկնաբանել։
