Հայաստան, կորոնավիրուս։ Ինչպե՞ս և ինչո՞վ են ապրում մարդիկ․ հարցուփորձ է արել վարչապետը

Մարտի 27–ին Հայաստանի վարչապետը պատահական հեռախոսահամարներով զանգահարել է երկրի բնակիչներին և հետաքրքրվել, թե ինչպես են նրանք ապրում կարանտինի պայմաններում։ Այդ ամենը հեռարձակվել է ուղիղ եթերով նրա ֆեյսբուքյան էջում։

Զանգից առաջ նա ասել է, որ իր կարևորագույն խնդիրներից մեկը երկրի քաղաքացիների հետ կապն ապահովելն է։ Իսկ զանգերի հետ կապված փորձարկումը պետք է՝ հասկանալու համար, թե ինչ դրության մեջ են քաղաքացիները և որ ուղղություններով պետք է տրամադրվի պետության սոցիալական օգնությունը կորոնավիրուսի պայմաններում։

Կառավարությունում մշակվում է սոցիալական օգնության փաթեթ այն մարդկանց, որոնք արտակարգ դրության և տնից դուրս գալու արգելքի պայմաններում մնացել են առանց աշխատանքի և ապրուստի միջոցի։

• Ի՞նչն է արգելված Հայաստանում արտակարգ դրության պայմաններում

• Կորոնավիրուսի համաճարակը Կովկասում․ փաստեր և թվեր տարածարջանի վերաբերյալ

Հայաստան, կորոնավիրուս․ առաջին մահն է գրանցվել, վարակված են դեռահասներ, զինվորականներ, բուժաշխատողներ, լրագրողական աշխատանքի սահմանափակումները մեղմացվել են

Ի՞նչ է պարզել վարչապետը

Վարչապետի առաջին զրուցակիցը տարեց մի կին էր, որն ապրում է իր 90-ամյա ամուսնու հետ։

Նա պատմել է, որ արտակարգ դրություն հայտարարելուց հետո առաջին մի քանի օրերին իրենց այցելել են սոցիալական ծառայության աշխատակիցներն ու սնունդ բերել։ Սակայն հիմա դադարել են գալ։ Այժմ տարեց զույգին խնամում է նրանց դուստրը, որը Ռուսաստանից է եկել, սակայն վաղն արդեն մեկնում է։

Փաշինյանը հետաքրքրվել է, թե արդյոք մարդիկ ապրուստի միջոց ունեն՝ արտակարգ դրության ժամանակահատվածը վերապրելու համար, քանի դեռ շատ կազմակերպություններ չեն աշխատում։

Վարչապետի զանգը զարմացնում և ուրախացնում էր նրա զրուցակիցներին։ Մարդիկ միանգամից չէին բողոքում խնդիրներից։ Սակայն զրույցի ընթացքում պարզվում էր, որ շատերը սուղ պայմաններում են ապրում, առանց աշխատանքի են մնացել, սնվում են ամռանը պատրաստած պահածոներով։

Նրանցից մեկը պատմեց, որ իրեն աշխատանքի չեն ընդունում, որովհետև 46 տարեկան է։ Նա փորձել է տաքսու վարորդ ընդունվել, սակայն իր դիմած ծառայություններում ասել են, թե ընդունում են մինչև 35, առավելագույնը 40 տարեկանների։ Տանը երկու մանկահասակ երեխա կա, կինը չի աշխատում։ Պետությունից նպաստ ընտանիքը չի ստանում, քանի որ վարկ ունի։ Սոցիալական ծառայության մոտեցումը հետևյալն է․ եթե կարող ես վարկ մարել, ուրեմն կարիքի մեջ չես։ Իսկ վարկերն իրականում վերցվել են հենց գոյությունը պահպանելու համար։

Վարչապետի զրուցակիցներն ասում էին, որ օգնություն չեն խնդրում պետությունից, իրենց միայն աշխատատեղեր են պետք։ Սակայն այս պահին երկրում գործազուրկ են անգամ նրանք, ովքեր կորոնավիրուսի տարածումից և ձեռնարկությունների աշխատանքի կասեցումից առաջ տեղավորված էին։

Վարչապետը լսել է բոլոր պատմությունները, հետաքրքրվել մանրամասներով, գրառումներ արել և ոմանց խոստացել, որ եթերից հետո նրանց կզանգահարեն և կլուծեն խնդիրների մի մասը։

«Շատ կարևոր է իմանալ, թե ինչ են զգում մեր քաղաքացիներն այս օրերին, ինչպես են հաղթահարում դժվարությունները, տանում սահմանափակումները», — այսպես է զանգերով մարդկանց տրամադրությունները հասկանալու և նրանց հետ կապ հաստելու իր գաղափարը բացատրել Նիկոլ Փաշինյանը։

Նրա խոսքով՝ դա օգնում է ավելի լավ հասկանալ խնդիրները, հստակեցնել տնտեսական, սոցիալական աջակցության փաթեթների ձևավորուման ուղղությունները։

Զրույցի ժամանակ Նիկոլ Փաշինյանը զրուցակիցներին հիշեցրել է տնից դուրս գալու սահմանափակումների մասին։ Մարտի 25-31–ը Հայաստանում չի կարելի տնից դուրս գալ առանց անհրաժեշտության։ Տնից դուրս գալիս պետք է լրացնել «տեղաշարժի ձևաթուղթը»։ Յուրաքանչյուրը պետք է դրանում նշի նպատակը, որտեղից և ուր է գնում, դուրս գալու և վերադառնալու ժամը։ Մարդիկ իրենց մոտ պետք է ունենան անձնագիր կամ նույնականցման քարտ։ Այդ պահանջների կատարմանը հետևում է ոստիկանությունը։

Մանրամասներ՝ երկրում տիրող իրավիճակի մասին

Ըստ առողջապահության նախարարության վերջին տվյալների՝ երկրում հաստատվել է կորոնավիրուսով վարակման 329 դեպք։

Վարակվածների թվում երկամսյա երեխա կա, որի մոտ հիվանդությունն առանց ախտանիշների է ընթանում, և որի մայրը երկու օր ջերմել է։ Այժմ երկուսն էլ իրենց լավ են զգում։

Վարակվածներից մեկի վիճակը գնահատվում է որպես ծայրահեղ ծանր։

Կորոնավիրուսով վարակվածներից մեկը մահացել է մարտի 26–ին։

Նույն օրը հայտնի է դարձել, որ վարակը ներթափանցել է բանակ։ Սկզբից հաղորդվել է վարակման երեք դեպքի մասին։ Մարտի 27–ին այդ թիվը հասել է հինգի։ Նոր հիվանդներն արդեն մեկուսացված էին։

Երկրում սահմանափակվել է ելքն ու մուտքը։ Արգելված են հանրային միջոցառումները, ռեստորանների, բարերի և սրճարանների աշխատանքը։