Հայաստան, կորոնավիրուս․ չի կարելի տնից դուրս գալ առանց անհրաժեշտության, ավելի է սահմանափակվում բիզնեսի գործունեությունը

Հայաստանում կորոնավիրուսի հետագա տարածման կանխարգելման համար հաստատված արտակարգ դրության պայմանների ավելի խիստ սահմանափակումներ են հայտարարվել։

Այլևս չի կարելի առանց անհրաժեշտության տանից դուրս գալ։ Դուրս գալիս անհրաժեշտ է ունենալ անձնագիր կամ ID-քարտ։

Բացի այդ, մինչև մարտի վերջ սահմանափակվում է «տնտեսական գործունեությունը», հայտարարվել է արգելված և թույլատրված ոլորտների ցանկը։

Երկրի ողջ տարածքում կարող են աշխատել մթերային խանութները, դեղատներն ու բանկերը։

Թույլատրված է հեռահաղորդակցության ընկերությունների գործունեությունը։ Դրանք ապահովում են բոլոր կազմակերպությունների աշխատանքը, որոնք անցել են առցանց ռեժիմի, և դպրոցականների և ուսանողների հեռավար ուսուցումը։

• Ի՞նչն է արգելված Հայաստանում արտակարգ դրության ժամանակահատվածում

• Կորոնավիրուսի համաճարակը Կովկասում․ փաստեր և թվեր տարածաշրջանի վերաբերյալ

Տեղաշարժի սահմանափակում

Մարտի 24–ին Հայաստանում գրանցվել է կորոնավիրուսով 14 նոր հիվանդ, վարակվածների ընդհանուր թիվն այժմ 249 է։

Այդ մասին մարտի 24–ի երեկոյան Հայաստանի քաղաքացիներին իր ուղերձում հայտնել է վարչապետը։ Ուղիղ եթերի ժամանակ Նիկոլ Փաշինյանը հայտարարել է նաև աննախադեպ սահմանափակումների կիրառման մասին․մարդիկ չեն կարող տնից դուրս գալ առանց անձը հաստատող փաստաթղթի և պետք է բացատտրեն, թե ինչ նատակով են փողոցում գտնվում։

Պարետատունը խստորեն հետևելու է մարդկանց տեղաշարժին, բնակիչները պետք է հատուկ ձևաթուղթ լրացնեն։ Այն պետք է մարդկանց մոտ լինի ամեն անգամ փողոց դուրս գալիս։ Եթե ձեռքի տակ տպող սարք չկա ձևաթուղթը լրացնելու համար, առաջարկվում է դրա բովանդակությունը ամբողջությամբ ձեռագիր ներկայացնել։ Մասնավորապես, պետք է գրել տան հասցեն, որից մարդը դուրս է գալիս, դուրս գալու նպատակը, այն վայրի անվանումն ու հասցեն, ուր նա ուղևորվում է։

Ամեն դեպքում, մարդկանց  կոչ են անում տանը մնալ և օգտվել մթերքի և դեղորայքի առաքման ծառայություններից։ Տնից դուրս գալու անհրաժեշտության դեպքում առաջարկվում է միայնակ լինել, առանց ուղեկցության, եթե խոսքը տարեց մարդու մասին չէ, որն օգնականի կարիք ունի։

Ավելի վաղ պարետն արդեն որոշում էր կայացրել, որ բոլոր մթերային խանութները ժամը 10–ից մինչև 12–ը սպասարկելու են միայն 65–ից բարձր տարիքի մարդկանց։ Երկրի բոլոր բնակիչները բջջայիններին տեքստային հաղորդագրություններ են ստանում նախազգուշացմամբ, որ այդ ժամերին գնումներ չպլանավորեն։ Դա կապված է նրա հետ, որ տարեցներն ավելի ծանր են տանում կորոնավիրուսը։

Իր ուղերձում վարչապետը խնդրել է մարդկանց երկու հոգուց ավելի չհավաքվել և շփման ժամանակ տարածություն պահպանել։

Ի՞նչն է արգելվում

Վարակի տարածումը սահմանափակելու համար կառավարությունը որոշել է արգելել նաև որոշակի ոլորտների աշխատանքը։ Դեռևս հայտարարվում է մինչև մարտի վերջ դրանց աշխատանքի սահմանափակման մասին։

Արգելված գործունեության տեսակների ցանկը․

— բարեր և նմանատիպ հաստատություններ;

— կինոթատրոններ, այդ թվում՝ որոնք ֆիլմերի բացօթյա ցուցադրություն են իրականացնում;

— շահումով խաղերի, մարզական միջոցառումների, զվարճանքի և հանգստի կենտրոններ;

— առևտրային կետեր, բացառությամբ մթերային խանութներից, դեղատներից և գյուղմթերքի շուկաներից։

Ի՞նչն է աշխատելու

Սահմանափակումները չեն տարածվում սննդի առաքման, ինչպես նաև կազմակերպություններին կից հործող բուֆետների և ճաշարանների աշխատանքի վրա։ Արգելված չէ բանկերի, ինքնասպասարկման ավտոմատների աշխատանքը։

Արգելված չէ հեռահաղորդակցության ոլորտի ընկերությունների աշխատանքը։ Նրանց աշխատանքն առավել կարևոր է արտակարգ դրության պայմաններում, քանի որ կազմակերպությունների մեծ մասն անցել է առցանց աշխատանքային ռեժիմի, իսկ բուհերն ու դպրոցները՝ հեռավար ուսուցման։

Շարունակվելու է սննդամթերքի, հիգիենայի միջոցների և կոսմետիկայի արտադրությունն, աշխատելու են հյուրանոցները, հանքաարդյունաբերությունն ու զենքի արտադրության ձեռնարկությունները։

Էլեկտրաէներգիայի, գազի, ջրի մատակարարման ծառայություններն աշխատելու են աշխատակիցների ոչ ամբողջական կազմով՝ անհրաժեշտության դեպքում վթարները հեռացնելու համար։ Արգելված չէ սգո ծառայություններ մատուցող հաստատությունների գործունեությունը։