Հայաստանում ստորագրվել է իշխանական կոալիցիա ձևավորելու մասին հուշագիր

Հայաստանի նախագահ Սերժ Սարգսյանի ղեկավարած «Հանրապետական» և 125-ամյա Հայ Յեղափոխանական Դաշնակցություն կուսակցությունները ստորագրել են կոալիցիոն հուշագիր: Սա նշանակում է, որ երկիրը ղեկավարելու են և դրա համար պատասխանատվություն են ստանձնելու ՀՀԿ-ն և ՀՅԴ-ն համատեղ:

Հայաստանի քաղաքական դաշտում տեղի ունեցածն անակնկալ չէր, որովհետև ՀՀԿ-ի և ՀՅԴ-ի միջև նախորդ տարի ստորագրվել էր քաղաքական համագործակցության մասին հուշագիր, ինչից հետո Դաշնակցությունը ստացել էր նախարարական 3 և մարզպետի 2 պորտֆել ու, ըստ էության, դարձել իշխանության մաս: Այս փաստաթղթով իշխանությունը կիսելու որոշումն ամրագրվեց արդեն որպես կոալիցիոն համագործակցություն ապրիլի 2-ին Հայաստանում տեղի ունեցած խորհրդարանական ընտրություններից  հետո, որտեղ ՀՀԿ-ն ձևավորեց մեծամասնություն:

Ինչպես փաստաթղթի ստորագրումից հետո հայտարարել է ՀՀԿ փոխնախագահ Արմեն Աշոտյանը, երկու կուսակցությունների կոալիցիոն համագործակցության հիմնական ոլորտային ուղղություններից են լինելու հակակոռուպցիոն պայքարը, «Ազգ-բանակ» հայեցակարգի ներդնումը, իրավական դաշտի բարեփոխումները, մրցունակ տնտեսության զարգացումը, մարդու ազատությունների և իրավունքների հետ շաղկապված ինստիտուտների հետագա զարգացման խնդիրները:

ՀՅԴ-ից Աղվան Վարդանյանն էլ նշել է, որ կուսակցություններն ունեն արժեքային մեծ ընդհանրություններ և լավ ու համառ աշխատանքի պարագայում կկարողանան նոր որակ բերել:

ՀՀԿ-ն ու ՀՅԴ–ն նախկինում էլ կոալիցիոն գործընկերներ են եղել, բայց 2009թ.-ին նախագահ Սերժ Սարգսյանի ընտրվելուց 1 տարի անց ՀՅԴ-ն լքել է կոալիցիան, իրեն հայտարարելով ընդդիմություն:
Կոալիցիոն գործընկերն այդպես էլ չհստակեցրին՝ ինչպե՞ս են բաշխվելու կառավարության պորտֆելները, արդյոք ՀՅԴ-ն պահպանելո՞ւ է 3 նախարարի և 2 մարզպետի պաշտոնը, թե՞ դրանց թիվը կավելանա:

Հուշագրում ասվում է միայն, որ Հանրապետության վարչապետ առաջադրելու իրավունքը պատկանում է ՀՀԿ-ին, իսկ ՀՀ նոր Սահմանադրությամբ հենց վարչապետի պաշտոնն է առաջնայինը, քանի որ Հայաստանը խորհրդարանական կառավարման երկիր է դարձել:

Դեռևս ընտրություններից առաջ Սերժ Սարգսյանը հայտարարել էր, որ վարչապետի պաշտոնում առաջադրելու են ՀՀԿ անդամ, գործող վարչապետ Կարեն Կարապետյանին: Օրերս Կ. Կարապետյանն իր վերջին հարցազրույցում վերահաստատեց, որ պատրաստ է շարունակել պաշտոնավարել:

Նշենք, որ կոալիցիա ձևավորելու մասին փաստաթուղթը ուժի մեջ է մինչև նորընտիր խորհրդարանի լիազորությունների ավարտը, այսինքն՝ 5 տարի: