Հայաստանում հազարավոր կամավորներ օգնում են բժիշկներին պայքարել կորոնավիրուսի դեմ

Հայաստանում մարտի 20–ին հաստատվել է կորոնավիրուսով վարակման 136 դեպք։ Վարակվածների թիվը սկսել է անսպասելիորեն աճել մարտի 11–ից հետո։ Մինչ այդ, երկրում միայն մեկ վարակված կար, որն Իրանից էր ժամանել։ Մարտի 16–ից երկրում արտակարգ դրություն է հայտարարվել՝ կորոնավիրուսի հետագա տարածումը կանխելու համար։

Քանի որ հիվանդների և մեկուսացվածների թիվն աճել է, առողջապահության նախարարությունը հայտարարել էր կամավորների հավաքագրման մասին։ Բժիշկների կոչին արձագանքել են հազարավոր կամավորներ։

Նրանք, ովքեր ընտրվածների ցանկում չեն հայտնվել, ինքնուրույն են մտածում, թե ինչպես օգնել մարդկանց։ Մասնավորապես, ոմանք սկսել են կարել և բաժանել բժշկական դիմակներ։

Կամավորների մասին

Մեկ օրում նախարարությունը ավելի քան երկու հազար ինքնակենսագրական է ստացել մարդկանցից, որոնք պատրաստ են կամավորական աշխատանք իրականացնել։

«Հարգելի հայրենակիցներ, առողջապահության նախարարությունը շնորհակալություն է հայտնում իր կոչին օպերատիվ կերպով արձագանքելու համար։ Այս պահին կամավորների բավականաչափ քանակով ինքնակենսագրականներ են հավաքվել, նոր տվյալների հավաքագրումը ժամանակավորապես կասեցվում է», — ֆեյսբուքյան իր էջում գրել է նախարարության մամուլի խոսնակ Ալինա Նիկողոսյանը։

Մարդիկ օգնում են՝ ինչով կարող են։ Ոմանք մեքենայով սնունդ և դեղորայք են տեղափոխում, կամավոր բուժքույրերն ու բժշկական համալսարանի ուսանողներն ավելի պրոֆեսիոնալ օգնություն են ցուցաբերում, միացել են նաև հոգեբաններ։

Անվճար բժշկական դիմակներ

Արդեն մարտի 2–ին, այսինքն՝ Հայաստանում կորոնավիրուսով վարակման առաջին դեպքի մասին լուրերի հաջորդ օրը դիմակների պակաս է նկատվել։ Մարդիկ սոցցանցերում բողոքում էին, որ դեղատներում դիմակ չկա։

Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը հայտարարել է, որ Հայաստանում դրանք պարզապես չեն արտադրվում։

Դրանից հետո սոցցանցերում և լրատվամիջոցներում հրապարակումներ հայտնվեցին մարդկանց մասին, որոնք ընտանիքներով տանը կարում են բժշկական դիմակներ և անվճար բաժանում անցորդներին փողոցներում։ Այդպիսիք, նախևառաջ, հայտնվեցին Էջմիածնում, որը հայտարարվել է կորոնավիրուսի տարածման էպիկենտրոն։

Նրանցից մեկը Միշա Դավթյանն է։ Նրա մայրը դիմակներ է կարում, ինքն ախտահանում է դրանք և բաժանում բուժկենտրոններում։

«3000 դիմակ արդեն բաժանել ենք մարդկանց, դրանք ծառայել են իրենց նպատակին։ Դա ինձ միայն ուրախացնում է և խրախուսում շարունակել այս գործը», — ասում է Միշան։

Դիմակներ է կարում նաև Էջմիածնի բնակիչ Արմեն Աբրահամյանի ընտանիքը։

«Արդեն հինգերորդ օրն է, ինչ սկսել ենք դիմակներ կարել։ Դրանք բոլորն ախտահանվում են հիվանդանոցային պայմաններում։ Առաջին օրը կարել ենք 56 դիմակ, իսկ այժմ արդեն՝ 3500։ Մենք կարող ենք դիմակներով ապահովել Էջմիածնի հիվանդանոցը, պոլիկլինիկան, ծննդատունը, ոստիկանական բաժանմունքները։ Մնացածը բաժանում ենք հասարակ քաղաքացիներին», — ասում է Արմենը։  

Այնուհետև նախաձեռնությանն են հետևել նաև մյուս քաղաքներում։ Մասնավորապես, Ալավերդիում տասը կամավոր ակտիվիստներ սկսել են դիմակներ կարել։ Ասում են, որ նախապես հստակեցրել են բժիշկների հետ, թե ինչպես դրանք պատրաստել, որ նյութերն են ավելի նախընտրելի։ Դրանք կարվում են ձեռնոցով, այնուհետև ախտահանվում և բաժանվում են փողոցի անցորդներին։