Հայաստանում ԵՄ դեսպանը կոչ է անում փոխել ԿԸՀ կազմը, այն ավելի արժանահավատ դարձնել

Լուսանկարը՝ verelq.am-ի

Հայաստանի Կենտրոնական ընտրական հանձնաժողովն ավելի արժանահավատ պետք է դարձնել: Նման հայտարարությամբ է հանդես եկել Հայաստանում ԵՄ պատվիրակության ղեկավար, դեսպան Պյոտր Սվիտալսկին:

«ԿԸՀ կազմում պետք է ներգրավվեն քաղաքացիական հասարակության ներկայացուցիչներ և այլն: Իմ խորհուրդն է հայերին՝ մտածեք, ուսումնասիրեք ԿԸՀ-ի կազմի խնդիրը, նաև այն, թե ինչպես կարող եք ԿԸՀ-ն դարձնել ավելի արժանահավատ և հանրային վստահությունը վայելող կառույց»,- շեշտել է դիվանագետը:

Հայաստանի իշխանությունների արձագանքը ԵՄ ներկայացուցչի հայտարարությանը իրեն սպասեցնել չի տվել: ՀՀ արդարադատության նախարար Դավիթ Հարությունյանը լրագրողներին ասել է, որ Կենտրոնական ընտրական հանձնաժողովի կազմը փոխելու-չփոխելու հարցը երկրի ներքին խնդիրն է, որը որոշում է Ազգային ժողովը: «Կարծում եմ, որ որոշակի փորձ է մեր ներքին քաղաքական հարցերին միջամտելու, ինչը համարում եմ անթույլատրելի՝ անկախ նրանից, դա արվում է  բարի, թե այլ նպատակներով»,- նշել է Դ. Հարությունյանը:

Պյոտր Սվիտալսկին նաև խոսել է Հայաստանում անցկացված նախորդ ընտրությունների մասին՝ նշելով, որ դրանք կատարյալ չեն անցել, երկիրը դեռ չի հասել ժողովրդավարական ստանդարտների կատարելությանը: «Սա դեռևս գործընթաց է: Մենք, կարող ենք ասել, որ ճանապարհի գրեթե կեսին ենք», — նշել է դեսպանը, հավելելով սակայն, որ դրական է համարում Հայաստանի անցած ճանապարհը՝ մյուս երկրների հետ համեմատած:

Դեսպանը հույս է հայտնել, որ 2-3 տարի անց, երբ Հայաստանը կմոտենա հաջորդ ընտրություններին, մեծ փոփոխություններ կլինեն երկրում: Նա խոսել է նաև նոր Ընտրական օրենսգրքի մասին, որը ձևավորվեց իշխանության և ընդդիմության քննարկումների և համաձայնության հասնելու արդյունքում:

«Իշխող ուժերը փորձում են Ընտրական օրենսգիրքը հարմարեցնել իրենց քաղաքական նպատակներին, նույնիսկ ամենաժողովրդավարական երկրներում սա բնական բնազդ է: Օգտագործում են տարրեր, որ իշխող կուսակցությունն օգտվի, իր շահերին ծառայի»,- ասել է դեսպանը:

Այս առնչությամբ էլ ՀՀ արդարադատության նախարարը նշել է, որ դեսպանը իր դիրքորոշումը չպետք է հայտնի. «Ես կարծում եմ, որ սա ևս քաղաքական հարց է և դրա վերաբերյալ իրենց դիրքորոշումը արտահայտում են ոչ թե դեսպանները, այլ համապատասխան ոլորտի մասնագետները: Համապատասխան ոլորտում ամենաբարձր մարմինը Վենետիկի հանձնաժողովն է, որը տվել է իր եզրակացությունը»: