Հայաստանի վարչապետն ապաքինվել է և վերադարձել աշխատանքի։ Նրա վերադարձն ուղեկցվել է «ուժայինների» հրաժարականներով

Հայաստանի վարչապետը հունիսի 8–ին հայտարարել է, որ արդեն ապաքինվել է։ Այն մասին, որ Նիկոլ Փաշինյանը կորոնավիրուսով է վարակվել, հաղորդվեց մեկ շաբաթ առաջ։

«Հենց նոր ստացանք մեր ընտանիքի անդամների կրկնակի թեստերի պատասխանները [վարակվել էր ողջ ընտանիքը — JAMnews]։ Բոլորիս պատասխանը բացասական է․․․ Ես վերադառնում եմ լիարժեք աշխատանքի», — ֆեյսբուքյան իր էջում գրել է վարչապետը։ 

Զուգահեռ հայտնի է դարձել ուժային կառույցներում բարձր պաշտոնյաների հրաժարականների մասին։ 

Իրենց պաշտոնը լքել են Զինված ուժերի Գլխավոր շտաբի պետն, Ազգային անվտանգության ծառայության ղեկավարն ու ոստիկանապետը։ Եվ բառացիորեն մի քանի րոպե անց հայտնի են դարձել այն անձանց անուններն, ովքեր նրանց փոխարինելու են այդ պաշտոններում։ 

Մինչ դեռ, ընդդիմությունը կոչ է անում, որ ողջ կառավարությունը հրաժարական ներկայացնի։

• «Մնացեք տանն, այլ ոչ թե գերեզմանոցում»։ Թե ինչպես են երկրները հաղթահարում կորոնավիրուսի նոր բռնկումները
• Հայաստանում վարակման խոշոր բռնկումներ են սպասվում

ԶՈւ Գլխավոր շտաբի ղեկավարը հեռացել է որդու հարսանիքի պատճառո՞վ

Վերջերս վարչապետ Նիկոլ Փաշիյանը հայտարարել էր, որ փոփոխություններ են սպասվում։ Նա չէր հստակեցրել, թե ինչ փոփոխությունների մասին է խոսքը, սակայն արդեն հունիսի 4–ին հրաժարական ներկայացրեց Հայաստանի Պետեկամուտների կոմիտեի ղեկավար Դավիթ Անանյանը։

Հունիսի 8–ին սկզբից հաղորդվեց էր ԶՈւ Գլխավոր շտաբի պետ Արտակ Դավթյանի հաժարականի մասին լուրը։ 

Դրան նախորդել էր նրա որդու հարսանիքի հետ կապված պատմությունը։ Հունիսի 7–ին հայկական լրատվամիջոցները գրում էին այն մասին, որ բարձրաստիճան զինվորականը խախտել է պարետատան հրահանգներն ու ավելի քան հարյուր հյուրերի մասնակցությամբ հարսանիք արել։

Բանն այն է, որ երկրում մինչև հունիսի 13–ը շարունակում է արտակարգ դրություն գործել, և բոլոր զանգվածային միջոցառումներն արգելված են։

Դավթյանը հայտարարել է, որ «բոլորն անձնական կյանքի իրավունք ունեն»․

«Կոչ եմ անում որոշ անձնաց, մամուլին չներխուժել իմ անձնական և ընտանեկան տարածք և չփորձել ինձ ներքաշել քաղաքական խաղերի մեջ»։

Պաշտոնական հաստատում, թե ինչն է հրաժարականի պատճառ դարձել, դեռ չկա։ Կարելի է միայն ենթադրել, որ հարսանիքի շուրջ սկանդալն է ստիպել Դավթյանին հրաժարականի դիմում գրել։

Ինչ վերաբերում է տոնակատարությանն, ապա ոստիկանությունից հաղորդել են․

«Ոստիկանության ծառայողներն այցելել են, նախազգուշացրել ու համապատասխան արձանագրություն կազմել։ Միջոցառումը դադարեցվել է»։ 

Ինչո՞ւ են հրաժարական տվել մյուս երկուսը 

ԱԱԾ ղեկավար Էդուարդ Մարտիրոսյանի և ոստիկանության պետ Արման Սարգսյանի հրաժարականի պաշտոնական պատճառը ևս չի հաղորդվում։

Սակայն օրերս վարչապետն ինքն է պատմել, որ բավականին կոշտ է խոսել ԱԱԾ պետի և ոստիկանապետի հետ։ Խոսքը գնացել է այն մասին, որ ուժային կառույցներն ի վիճակի չեն ապահովել սանիտարական նորմերի պահպանումը երկրում։

Մայիսի 8–ին Հայաստանում ընդհանուր առմամբ 13 325 վարակված կա։ Օրական վարակման հարյուրավոր դեպքեր են արձանագրվում։ Կառավարությունը դեռևս մտադիր չէ կրկին կանգնեցնել ձեռնարկություններն ու միայն կոչ է անում հետևել նոր վարքականոններին և աշխատանքի սանիտարական նորմերին։

Ընդդիմությունը պահանջում է վարչապետի հրաժարականը

Հայաստանի ուժային կառույցներում հրաժարականները տեղի են ունեցել «100 տոկոսով կառավարությունը փոխելու» ընդդիմության պահանջի ֆոնին։

Այսպիսի հայտարարությամբ հունիսի 5–ին հանդես է եկել «Բարգավաճ Հայաստան» կուսակցության առաջնորդ, համանուն խորհրդարանական խմբակցության ղեկավար և խոշոր գործարար Գագիկ Ծառուկյանը։ Ըստ նրա՝ 2018 թ–ի «թավշյա» հեղափոխությունից հետո իշխանության եկած կառավարությունը չի արդարացրել ժողովրդի հույսերն ու պետք է ամբողջովին փոխվի։

Ծառուկյանը հիշեցրել է՝ դեռևս մեկ տարի առաջ ինքը խոսել է այն մասին, որ կառավարությունը չի կարողանում կատարել իր առջև դրված խնդիրները․

«Ես այն ժամանակ ասել եմ, որ եթե փոփոխություն են ուզում, պետք է փոխել կազմի 97%–ը։ Սակայն այսօր, տեսնելով այս բոլոր ձախողումներն ու անհաջողությունները, կարծում եմ, որ ամբողջությամբ՝ 100%–ով, պետք է փոխել կառավարությունը։ Ինձ համար տհաճ է սա ասել, սակայն մենք տեսնում ենք, որ ձախողվել են բոլոր ոլորտները»։

Փաշինյանն օլիգարխի հայտարարությունները չի մեկնաբանել։ Սակայն նրա մամուլի խոսնակ Մանե Գևորգյանը ֆեյսբուքյան իր էջում գրել է, որ Գագիկ Ծառուկյանն անհանգստացած է իր անվան հետ կապված մի շարք քրեական գործերի հետաքննության ընթացքով․

«Եթե պարոն Ծառուկյանը կարծում է, որ իր քաղաքական հայտարարությունները կշեղեն քննության բնականոն ընթացքը, սխալ հաշվարկ է, որովհետև Հայաստանում բոլորը հավասար են օրենքի առաջ, նաև՝ ապօրինի ձեռքբերված գույքը բռնագանձելու մասին օրենքի առաջ, որով մտահոգվելու առիթ նույնպես պարոն Ծառուկյանը կարող է ունենալ»։

Փորձագիտական կարծիք

Քաղաքական մեկնաբան Նաիրա Հայրումյանը կարծում է․

«Հունիսի սկզբից, երբ կորոնավիրուսով վարակման և մահացության ցուցանիշները սկսեցին կտրուկ աճել, Հայաստանում պարբերաբար սկսեցին հրաժարականի պահանջներ հնչել՝ նախարարի, պարետի, վարչապետի, էական չէ։

Նման արձագանքը լիովին բնական է․ մի քանի շաբաթ տևած մեկուսացումից, զսպվածությունից և տագնապից հետո գալիս է ագրեսիվ թուլացման փուլ։ ԱՄՆ–ում դա խոշոր անկարգությունների է բերել, Ռուսաստանում ցույցերի ալիք են կանխատեսում․․․ Հայաստանում ամեն ինչ կարող է այլ կերպ լինել, և կառավարության հրաժարականն արդեն այնքան էլ անհավանական չի թվում, որքան մեկ շաբաթ առաջ»։

Քաղաքագետ Հակոբ Բադալյանը հրաժարականի կոչերը դիտարկում է կառավարության և դրա ընդդիմադիրների վարկանիշի տեսանկյունից․

«Բանն այն է, որ կառավարության հրաժարական պահանջում է մի ուժի նախագահ, որը խորհրդարանի 2018 թվականի արտահերթ ընտրությանը ստացել է մոտ 10 տոկոս ձայն, և դա եղել է երկրորդ ցուցանիշը: Իսկ «Իմ քայլը» մեծամասնությունը ստացել է 70 տոկոս ձայն:

Այն, որ խորհրդարանի ընտրությունից մեկուկես տարի անց հնարավոր է վստահության վարկանիշի փոփոխություն, կան կառավարման արդյունքից դժգոհներ, անգամ հիասթափություն ունեցողներ, թերևս կասկածից վեր է: Բայց չկան նախանշաններ, որ այդ ամենն ունի այնպիսի մասշտաբ, որ հիմք տա խոսել քաղաքական դիրքերի հարաբերակցության փոփոխության մասին», — գրում է  փորձագետը։