Հայաստանի վարչապետ․ Ղարաբաղը չի կարող Ադրբեջանին տարածքներ զիջել և զոհաբերել անվտանգությունը

Լեռնային Ղարաբաղը չի կարող Ադրբեջանին տարածքներ փոխանցել և զոհաբերել իր անվտանգությունը։ Այս մասին Հայաստանի Առաջին ալիքին տված հարցազրույցում հայտարարել է Նիկոլ Փաշինյանը։

Վարչապետն առանձնահատուկ ուշադրություն է դարձրել խաղաղ պայմաններում հայ զինվորականների մահվան դեպքերին և սահմանադրական փոփոխությունների հանրաքվեին, որը նախաձեռնել է իշխող կուսակցությունը։

• Ինչպե՞ս լուծել ղարաբաղյան հակամարտությունը։ Հարցին պատասխանում են Ադրբեջանի նախագահն ու Հայաստանի վարչապետը

• Ղարաբաղում տեղի ունեցած «ապրիլյան պատերազմից» երեք տարի անց։ Ի՞նչ է այն փոխել՝ փորձագիտական կարծիք Բաքվից և Երևանից

Ղարաբաղի մասին․«Չկա տարածքների հարց, կա անվտանգության հարց»

Հարցազրույցի ժամանակ Նիկոլ Փաշինյանն Իլհամ Ալիևի հետ իր վերջին հանդիպումը շրջադարձային է անվանել։ Այն կայացել է փետրվարի 15–ին Մյունխենյան անվտանգության համաժողովի շրջանակում։

Փաշինյանը հայտարարել է, որ 2018 թ–ի մայիսից Ադրբեջանը փորձել է համոզել միջազգային հանրությանը, որը Հայաստանն ապակառուցողական դիրքորոշում է զբաղեցրել Ղարաբաղի հարցում։ Խոսքն այն ժամանակահատվածի մասին է, երբ Փաշինյանն արդեն իշխանության էր եկել և իր կարծիքն արտահայտել բանակցային գործընթացի մասին։ Մասնավորապես, նա պնդում է, որ ղարաբաղյան կողմը նույնպես պետք է ներկայացված լինի, ավելի ճիշտ՝ վերադառնա բանակցությունների սեղանի շուրջ, ինչին Ադրբեջանի նախագահը կտրականապես դեմ է։

«Այդ խոսակցությունը միջազգային հանրությանը շատ հստակ ցույց տվեց, որ Հայաստանն ունի կառուցողական դիրքորոշում Ղարաբաղի հարցում, իսկ Ադրբեջանն ունի ապակառուցողական, ընդհուպ ռասիզմի հասնող դիրքորոշում Ղարաբաղի հարցում», — նշել է Հայաստանի վարչապետը։

Նա պնդում է, որ այժմ ստեղծվում է ղարաբաղյան հարցի նոր բովանդակություն, որն ինքը պայմանականորեն անվանում է «մյունխենյան սկզբունքներ»․

«Ես հայտարարել եմ և կրկնում եմ ևս մեկ անգամ․ Ղարաբաղը չի կարող զիջել իր անվտանգությունը․․․Մենք երբեք չենք ասել, որ պատրաստ ենք տարածքներ զիջել։  Պաշտպանության բանակը վերահսկում է դրանք ոչ թե հաճույքի համար, այլ որովհետև ուրիշ տարբերակ չի եղել»։

Փաշինյանը նշել է, որ այդ տարածքները վերահսկվում են Լեռնային Ղարաբաղի սահմաններից ռազմական գործողությունները հեռու պահելու նպատակով․

 «Եթե կա առաջարկ, անվտանգության ապահովման նույնքան արդյունավետ մի գործիքի, այդ առաջարկը թող ձևակերպվի Ադրբեջանի, միջազգային հանրության կողմից, և հայ ժողովուրդը կքննարկի՝ իր համար դա ընդունելի է, թե՝ ոչ: Մենք ասում ենք, որ տարածքների հարց չկա։ Մենք պատրաստ ենք բանակցություններ վարելու անվտանգության հարցերի շուրջ»։

Միաժամանակ վարչապետը պնդում է, որ ղարաբաղյան հարցը ռազմական լուծում չունի, կարգավորման վերաբերյալ ցանկացած առաջարկ պետք է ընդունելի լինի Հայաստանի, Ղարաբաղի և Ադրբեջանի ժողովուրդների համար։

Հայկական բանակում մահվան դեպքերի պատճառը

Խաղաղ պայմաններում զինվորականների մահվան հաճախակի դարձած դեպքերի պատճառներից մեկը Փաշինյանը համարում է բանակում ծառայողների շրջանում քրեական ենթամշակույթի առկայությունը․

«Քանի որ քրեական ենթամշակույթի դեմ պայքարը չի տարվել այն մասշտաբներով, որով ես հանձնարարել եմ, պատասխանատու անձանցից երկուսն ազատվել են զբաղեցրած պաշտոններից»։

Այս թեման դարձել է հասարակությունում ամենաքննարկվածը, քանի որ 2020 թ–ի մեկ ու կես ամսվա ընթացքում զոհվել է 13 մարդ։

Խոսելով հրաժարականների մասին՝ Փաշինյանը նկատի ունի Ռազմական ոստիկանության պետ Արթուր Բաղդասարյանին և ԶՈՒ բարոյահոգեբանական ապահովման վարչության ղեկավար Ալեքսան Ալեքսանյանին։

Զինված ուժերում կադրային փոփոխությունները տեղի են ունեցել վարչապետի ելույթի նախօրեին, և հասարակության տրամադրությունների վրա առանձնապես չեն ազդել։ Փետրվարի 20–ին կառավարության շենքի դիմաց իրավապաշտպանները բողոքի հերթական ակցիան են անցկացրել։ Նրանք կարծում են, որ այդ հրաժարականները կարող են միայն կարճաժամկետ արդյունք տալ։

Սահմանադրական հանրաքվեի մասին

Այժմ Հայաստանում քարոզարշավի փուլ է սահմանադրական հանրաքվեի նախաշեմին, որն ապրիլի հինգին է նշանակված։ Երկրի բնակիչները պետք է լուծեն Սահմանադրական դատարանի վեց դատավորների և նախագահի պաշտոնանկության հարցը: Խոսքը դատարանի այն անդամների մասին է, որոնք իրենց աթոռները զբաղեցրել են նախորդ իշխանության օրոք։

Ըստ վարչապետի՝ Հայաստանի Սահմանադրական դատարանի նկատմամբ տարիների ընթացքում անվստահություն է ձևավորվել, իսկ այն մոդելը, որն առաջարկում է իր թիմը, կօգնի վերականգնել վստահությունը։

«Ի՞նչ տարբերություն կա նախորդ և գործող մոդելների միջև։ Այն, մասնավորապես, կայանում է նրանում, որ նախորդ մոդելի դեպքում ՍԴ անդամների պաշտոնների թեկնածուներին առաջադրում էր Հայաստանի նախագահը կամ ԱԺ նախագահը, և ընտրում էր խորհրդարանը։ Նոր մոդելի համաձայն՝ ՍԴ դատավորի երեքական թեկնածու է առաջադրում նախագահը, կառավարությունն ու Դատավորների ընդհանուր ժողովը․․․

Եթե նախկինում Սահմանադրական դատարանի անդամներն ընտրվում էին ցմահ, ապա այժմ հստակ նշված է, որ նրանց լիազորությունների ժամկետը կազմում է 12 տարի, և միևնույն անձը չի կարող ՍԴ անդամ լինել մեկ անգամից ավելին»։