«Տարածքներ խաղաղության դիմաց» բանաձևը մեզ համար անընդունելի է»․ Հայաստանի վարչապետ

Արցախի շուրջ և Հաայստանի ու Ադրբեջանի սահմանին սրացման 18-րդ օրը վարչապետ Նիկոլ Փաշինյանն ուղիղ եթերում դիմել է Արցախի, Հայաստանի ժողովրդին և ողջ սփյուռքահայությանը։ Վարչապետը ներկայացրել է հակամարտության կարգավորման վերաբերյալ հայկական կողմի դիրքորոշումը։

Նրա խոսքով՝ միջազգային ուժերն ու կազմակերպությունները չեն արձագանքում կատարվածին՝ համարելով, որ «տարածքներ՝ խաղաղության հաստատման դիմաց» բանաձևն ընդունելի է լինելու։ 

«Սա շատ նման է 1938 թվականի Մյունխենյան համաձայնությանը, երբ իբր հանուն խաղաղության Եվրոպական մի շարք տերություններ Գերմանիային զիջեցին Չեխոսլովակիան: Իսկ թե ինչ եղավ հետո, գիտեք բոլորդ: Եվ հիմա հարցը հետևյալն է՝ արդյո՞ք աշխարհը թույլ է տալու մի նոր Հիտլերի ձևավորումն՝ այս անգամ Փոքր Ասիայում», — հայտարարել է Փաշինյանը։

Լեռնային Ղարաբաղի վերաբերյալ առաջարկները մնում են բանակցությունների սեղանին․ Սերգեյ Լավրով

Խաղաղապահներ և ռուս դիտորդներ Ղարաբաղում; դրա շուրջ շրջանների վերադարձ; անվտանգության երաշխիքներ Ղարաբաղի հայ բնակչության համար․ Ռուսաստանի ԱԳՆ-ի ղարաբաղյան կարգավորման մոտեցումը

Ահա Հայաստանի վարչապետի ելույթի մյուս թեզերը։

• Շարունակվում է Թուրքիայի և Ադրբեջանի ահաբեկչական ագրեսիան ընդդեմ Արցախի։

• Ադրբեջանը քայլ առ քայլ հասել է այն կետին, որ հայերի առջև անընդունելի պայմաններ է դրել։

Խոսքն Արցախին հարող և նրա վերահսկողության տակ գտնվող յոթ շրջաններից հինգը Բաքվին անհապաղ հանձնելու, ինչպես նաև մյուս երկուսի հանձնման գրաֆիկ ներկայացնելու մասին է։ Այսինքն՝ շրջանները, որոնք Լեռնային Ղարաբաղի համար անվտանգության գոտի են, պահանջվել է հանձնել՝ ոչ թե կարգավիճակի, այլ խաղաղության դիմաց։ Վերջին քայլը, որը պահանջում է ադրբեջանական լկողմը, արձանագրելն է, որ Արցախը պետք է լինի Ադրբեջանի կազմում։ Հակառակ դեպքում պատերազմ է լինելու։ Փաշինյանի կառավաությունը հրաժարվել է դրանից։

• Հայաստանի սահմանին հուլիսյան սրացումը ցույց է տվել, որ ադրբեջանական բանակն ի վիճակի չէ ռազմական ճանապարհով հարց լուծել։ «Այս արձանագրումը ցնցող նշանակություն ունեցավ շատերի, և առաջին հերթին Թուրքիայի համար: Հետո սկսվեցին համատեղ զորավարժություններ, մեծաթիվ թուրքական ռազմական տեխնիկա տեղափոխվեց Ադրբեջան»։ 

• Թուրքիան նաև մեծ թվով վարձկաններ Սիրիայից տեղափոխեց տարածաշրջան՝ գիտակցելով, որ Ադրբեջանն ի վիճակի չէ ինքնուրույն հաղթել հակառակորդին։

• Պատերազմն Արցախում անսպասելի չէր։ Հարցն այն էր, թե կոնկրետ որ ժամին և որտեղից կհարձակվեր Ադրբեջանը:

• Լեռնային Ղարաբաղը բլիցկրիգով գրավելու թուրք-ադրբեջանաահաբեկչական նախնական պլանը ձախողվել է։

• Ռուսաստանը կարողացավ բարձր մակարդակով կատարել ԵԱՀԿ Մինսկի խմբի համանախագահի և Հայաստանի ռազմավարական դաշնակցի իր դերը։

• Մոսկվայում հոկտեմբերի 9-10-ը Հայաստանի և Ադրբեջանի արտգործնախարարների հանդիպումն ուղղված էր հետագա կորուստները կանխելուն։ Սակայն Բաքուն որոշեց հրաժարվել հրադադարից, և այս րոպեներին շարունակում է հրետակոծությունը։

• Ռազմական գործողությունների մեկնարկից ի վեր հակառակորդը հսկայական կորուստներ է կրել, ավելին, քան հայկական կողմը, սակայն Ադրբեջանի իշխանությունները զոհված զինծառայողների մասին թվեր չեն հաղորդում։ Ընդ որում, Ադրբեջանի կողմից ռազմական գործողություններին մասնկացել են վարձկաններ, իսկ Հայաստանն ու Ղարաբաղը կորցրել են իրենց սեփական բնակիչներին։ 

• Հակառակորդն առաջին շաբաթվա ընթացքում կրել է նաև ռազմական տեխնիկայի հսկայական կորուստներ այն պայմաններում, երբ չի ունեցել մատակարարման ոչ մի սահմանափակում, իսկ Արցախը և Հայաստանը գործել են շրջափակման պայմաններում:

• Արցախի բանակի ստորաբաժանումները հյուսիսային և հարավային ուղղություններով որոշակի նահանջ են ունեցել:

• Ադրբեջանական կողմը դիվերսիոն խմբերով փորձում է խուճապ և խառնաշփոթ առաջացնել հայկական զորքերի թիկունքում:

• Արցախի Պաշտպանության բանակն իր վերահսկողության տակ է պահում ընդհանուր վիճակը հսկայական կորուստների գնով։ Փաշինյանն ընդգծել է, որ այս ամենը նա ասում է ոչ թե անելանելիության բերումով, այլ այն պատճառով, որ պարտավորություն ունի ճշմարտության լեզվով խոսել ժողովրդի հետ։

• Ռուսաստանը բարձր մակարդակով կատարել է ռազմավարական դաշնակցի և միջնորդի իր դերը։ Ինչի համար վարչապետը շնորհակալություն է հայտնել Ռուսաստանի նախագահին։ 

• ԵԱՀԿ Մինսկի խմբի համանախագահող երկրները մեծ ջանքեր են գործադրում հրադադարի հաստատմանը հասնելու ուղղությամբ: Փաշինյանը շնորհակալություն է հայտնել ԱՄՆ վարչակազմին և Ֆրանսիայի նախագահին կարգավորման ուղիների որոնմանն ակտիվ մասնակցություն ունենալու համար։

• Այդ ջանքերը, սակայն, մինչև օրս բավարար չեն եղել հայ ժողովրդի նկատմամբ թուրքական ցեղասպան քաղաքականությունը սանձելու համար։ 

Իր ուղերձը վարչապետն ավարտել է այն հայտարարությամբ, որ Հայաստանը չի ընկրկելու, որովհետև սա ճակատագրական պատերազմ է, և հայ ժողովուրդն իր մեջ պետք է ուժ գտնի կանգնեցնելու հակառակորդին՝ հաղթելու և ապրելու համար:

Նիկոլ Փաշինյանի ելույթի ամբողջական տեսատարբերակը․