«ՀՀ-ն չպիտի լինի ագրեսիայի համար գայթակղիչ երկիր». Փաշինյանի ուղերձը բանակի օրվա առիթով
Հայաստանի ԶՈՒ կազմավորման 34-ամյակը
Այսօր՝ հունվարի 28-ին Հայաստանը նշում է Զինված ուժերի կազմավորման 34-րդ տարեդարձը: Այդ առիթով հղած ուղերձում վարչապետ Նիկոլ Փաշինյանն ընդգծել է՝ Հայաստանի և Ադրբեջանի միջև հաստատված խաղաղությունից ավելի հուսալի անվտանգության երաշխիք չկա։
Շեշտել է՝ ՀՀ-ն պատերազմի չի պատրաստվում, քանի որ պատերազմ չի լինելու, իսկ բանակի զարգացումը շարունակաբար ընթանալու է։
«Չափազանց կարևոր է ունենալ ուժեղ, պաշտպանունակ բանակ՝ ապագայի պայմանական սպառնալիքներին դիմակայելու համար, այն դեպքերում, երբ դիվանագիտությունն ի վիճակի չի լինի դա անել:
Ուժեղ բանակ չունեցող երկիրը խոցելի է և կարող է գայթակղիչ լինել ագրեսիայի համար։ Հայաստանի Հանրապետությունն այսպիսին չպիտի լինի երբեք»,- հայտարարել է Փաշինյանը:
Ուղերձում նա անդրադարձել է նաև վերջին տարիներին բանակի զարգացման ուղղությամբ ձեռնարկված քայլերին, այդ թվում՝ ժամանակակից սպառազինություն և ռազմական տեխնիկայի ձեռքբերմանը: Փաշինյանի բնորոշմամբ՝ դրանք եղել են «այնպիսի որակի և պարամետրերի, որ մեր բանակը երբեք չի ունեցել»:
Նախկին նախագահներ Ռոբերտ Քոչարյանն ու Սերժ Սարգսյանը, սակայն, օրվա իշխանություններին մեղադրում են «տարածաշրջանի ամենամարտունակ բանակը թուլացնելու» մեջ:
- «Հայաստանը վերադառնում է այն արեալ, որից դուրս էր մղվել»․ կարծիքներ «Խաղաղության խորհրդի» մասին
- «Ուժային միջամտության արդարացման փո՞րձ»․ հայ գործիչների արձագանքը Սոլովյովին
- «Հասունանում է ՀՀ-ՆԱՏՕ հարաբերությունների վերանայման գործընթաց»․ հայ քաղաքագետ
«Բանակի պաշտպանունակությունն ավելանում է ամեն օր»
Հայաստանի վարչապետ Նիկոլ Փաշինյանի դիտարկմամբ՝ հայկական բանակն անցել է ձևավորման բարդ ժամանակաշրջան, առերեսվել է մարտահրավերների ու բարդությունների.
«Այսօր կարող ենք արձանագրել, որ ունենք բանակ, որը փոխվում և որի պաշտպանունակությունն ավելանում է ամեն օր։ Վերջին տարիներին հսկայական ներդրումներ և բարեփոխումներ ենք արել մեր բանակում»:
Իրականացված աշխատանքների շարքում Փաշինյանն առանձնացրել է՝
- զինծառայողների կամավոր ատեստավորման ծրագիրը․
«Մեր բանակում կան 700 հազար դրամ վարձատրություն ստացող շարքային կազմի բազմաթիվ զինծառայողներ։ Սպայական վարձատրությունները կարող են գերազանցել 1, 1․5, 2 միլիոն դրամը»; - «Պաշտպան հայրենյաց» ծրագիրը.
«Այսօր մենք 19 տարեկան բազմաթիվ զինծառայողներ ունենք, ովքեր 500, 600 հազար դրամ ամենամսյա վարձատրություն են ստանում»; - պարտադիր ժամկետային զինծառայության ժամկետի կճատումը
2026 թ.-ի հունվարի մեկից այն դարձել է 18 ամիս՝ նախկին 24 ամսվա փոխարեն; - սահմանների երկայնքով մեծ ծավալի ամրաշինական աշխատանքների իրականացումը,
- ժամանակակից սպառազինություն և ռազմական տեխնիկայի ձեռքբերումը.
«Սրա համար ծախսվել են մեծ ֆինանսական միջոցներ, որովհետև ձեռք բերված տեխնիկան թանկարժեք է և քանակական»:
«Այն, ինչ բանակում իրականացվել է վերջին տարիներին՝ անկյունաքար է մեր պետության հարատևության, անկախության, ինքնիշխանության, տարածքային ամբողջականության և սահմանների անձեռնմխելիության համար»,- ընդգծել է նա:
«ՀԱՊԿ-ում անդամակցությունը սառեցնելու արդյունքում օրհասական վտանգ ենք հաղթահարել»
Անդրադառնալով սպառազինության ձեռքբերման թեմային՝ վարչապետը նշել է, որ մինչև 2022 թվականը ժամանակակից ռազմական տեխնիկայի «վաճառքի պոտենցիալ ունեցող գրեթե բոլոր միջազգային գործընկերները քաղաքավարի մերժում էին Հայաստանի զենք վաճառել»: Փաշինյանը երկու հիմնական պատճառ է ներկայացրել՝
- «վստահ չէին, որ այդ զենքը չէր տեղակայվի ՀՀ միջազգայնորեն ճանաչված տարածքից դուրս,
- վստահ չէին, որ այդ զենքերի գաղտնի պարամետրերը հասանելի չէին դառնա ՀԱՊԿ-ին, որին ՀՀ-ի անդամակցությունը նույնպես խոչընդոտ էր նման գործարքներ կնքելու համար»:
Հիշեցրել է՝ Ռուսաստանի հովանու ներքո գործող ՀԱՊԿ ռազմական դաշինքի գործընկերները 2022 թվականի սեպտեմբերին ՀՀ ինքնիշխան տարածքի վրա Ադրբեջանի հարձակման ժամանակ հրաժարվում էին կատարել Հայաստանի անվտանգությունն ու տարածքային ամբողջականությունը երաշխավորելու պայմանագրային պարտավորությունները։ Բացի այդ, հրաժարվում էին նաև մատակարարել հարյուր միլիոնավոր դոլարի սպառազինություն և տեխնիկա, ինչի համար վճարումները ՀՀ-ն արդեն կատարել էր.
«Սա գոյաբանական սպառնալիք էր Հայաստանի Հանրապետության համար և ակնհայտ էր, որ մեր պետականությունը վերացնելու, մեր ինքնիշխանությունը զրոյացնելու որոշում է կայացված»:
Վարչապետ Փաշինյանի բնորոշմամբ՝ Երևանը կարողացել է այդ օրհասական վտանգը հաղթահարել երկու վճռական իրադարձության՝ 2022 թ.-ի հոկտեմբերի 6-ին Պրահայի քառակողմ հայտարարության և ՀԱՊԿ-ում ՀՀ անդամակցությունը սառեցնելու արդյունքում:
Եվս մեկ անգամ ընդգծել է՝ ՀՀ-ն հետևողականորեն շարունակելու է իր այդ ռազմավարությունը: Արձանագրել է՝ բանակը չունի և չի ունենալու Հայաստանի միջազգայնորեն ճանաչված տարածքի պաշտպանությունից դուրս այլ խնդիր: Իսկ օկուպացված տարածքների հարցը լուծվելու է ՀՀ-ի և Ադրբեջանի միջև ընթացող սահմանազատման գործընթացում։
Նախկին նախագահները խոսում են «հաղթական բանակը կոտրելու» մասին
ՀՀ երկրորդ նախագահ Ռոբերտ Քոչարյանի բնորոշմամբ՝ Փաշինյանի պաշտոնավարման տարիներին «արվել է ամեն ինչ մեր՝ տարածաշրջանի ամենամարտունակ ու հաղթական բանակը թուլացնելու, մասնատելու, կոտրելու համար»:
«Քաղաքական ղեկավարության՝ իր սխալները բանակի վրա բարդելու մոլուցքն անհետևանք չմնաց մեր բանակի համար»,- նկատել է նա:
Քոչարյանի խոսքով՝ աշխարհի բոլոր պետությունների համար իրական, երկարատև և արժանապատիվ խաղաղության գլխավոր երաշխավորը ամուր և մարտունակ բանակն է, և Հայաստանն էլ բացառություն լինել չի կարող: Հույս է հայտնել, որ կհաջողվի «արագորեն փոխել իրավիճակը, վերականգնել բանակի ուժը և ոգին, ինչը կապահովի կայուն խաղաղություն»:
Երրորդ նախագահ Սերժ Սարգսյանի գրասենյակը հրապարակել է 2018 թ.-ի իշխանափոխությունից հետո Սարգսյանի ուղերձների կարևոր շեշտադրումները: Դրանցում, մասնավորապես՝ նշվում է, որ ցանկացած ազգի և պետության լինելիության առաջին գրավականը բանակն է.
«Թշնամին տեսել է Հայոց բանակի հաղթական ոգին. տեսել ու սարսափել է հայ զինվորի աներևակայելի սխրանքներից, երբ բանակն ունեցել է արժանի ղեկավարներ:
Թշնամուն ծնկի բերած երբեմնի հզոր բանակը միֆ համարողները միտումնավոր անարգում են հազարավոր քաջորդիների հիշատակը և գիտակցաբար հուսահատության մղում ժողովրդին»:
Զինված ուժերում ընթացող բարեփոխումների գործընթացը երրորդ նախագահը տարակուսելի է համարում․
«Հայաստանի կառավարիչներն այժմ էլ բանակի «կերպափոխում» կոչվող տարակուսելի գործընթաց են սկսել, ինչն իրականում բանակը սեփական կերպին նմանեցնելու փորձ է՝ որպես բանակի վերջնական ջախջախման արար»։
Հետևեք մեզ — Facebook | Youtube
Հայաստանի ԶՈՒ կազմավորման 34-ամյակը
