Այսօր Հայաստանի Զինված ուժերի կազմավորման 30-ամյակն է: Տոնական միջոցառումը, սակայն, չեղարկվել է երկրի վարչապետի և մի շարք բարձրաստիճան պաշտոնյաների՝ կորոնավիրուսով վարակվելու պատճառով:
Առավոտյան փոխվարչապետ Մհեր Գրիգորյանը, նախարարներ ու այլ բարձրաստիճան պաշտոնյաներ այցելել են «Եռաբլուր» զինվորական պանթեոն՝ հարգանքի տուրք մատուցելու զոհվածների հիշատակին:
Օրվա առիթով ուղերձներով հանդես են եկել Հայաստանի վարչապետը, նախկին և ներկա նախագահները:
Բանակի օրվա ուղերձների, չեղարկված միջոցառման և կորոնավիրուսով վարակված պաշտոնյաների մասին։
Հունվարի 28-ի առավոտյան «Եռաբլուր» էին այցելել փոխվարչապետ Մհեր Գրիգորյանը, ՀՀ պաշտպանության նախարար Սուրեն Պապիկյանը, արտգործնախարար Արարատ Միրզոյանը, Անվտանգության խորհրդի քարտուղար Արմեն Գրիգորյանը, կառավարության ու Զինված ուժերի այլ ներկայացուցիչներ:
1992 թ.-ի հունվարի 28-ին Հայաստանի կառավարությունն ընդունեց «ՀՀ պաշտպանության նախարարության մասին» որոշում և դրանով իրավականորեն ազդարարեց ազգային բանակի ստեղծման մասին: Ավելի ուշ ձևավորվեց նախարարության կենտրոնական ապարատը` գլխավոր շտաբը, վարչություններն ու բաժինները:
1992 թ․ մայիսին հանրապետության տարածքում կազմակերպվեց առաջին զորակոչը:
Վարչապետը զինվորական պանթեոն չէր եկել, քանի որ երեքշաբթի օրվանից պարտականություններն իրականացնում է հեռահար. ըստ աշխատակազմի տարածած հաղորդագրության՝ Փաշինյանը վարակվել է կորոնավիրուսով:
Վարակման մասին լուրերից օրեր առաջ վարչապետ Փաշինյանը ներկա է գտնվել նախարար Սուրեն Պապիկյանի բազմամարդ հարսանիքին: Պապիկյանը, սակայն, դեռևս թեստ չի հանձնել, այսօր է պատրաստվում: Նախարարն անպատասխան է թողել բանակի վերաբերյալ հնչած հարցերը:
Բանակում իրականացվող բարեփոխումներին անդրադարձել է փոխվարչապետ Մհեր Գրիգորյանը՝ նշելով, որ հնարավոր է՝ փոփոխությունները տեսանելի չլինեն, բայց պրոցեսներ ընթանում են:
Ամենայն Հայոց կաթողիկոսը պանթեոն է եկել իշխանության ներկայացուցիչների հեռանալուց հետո միայն: Հարցին՝ ինչու է առանձին եկել «Եռաբլուր», Գարեգին Երկրորդը հրաժարվել է պատասխանել:
Նախօրեին ՀՀ զինված ուժերի կազմավորման 30-ամյակի կապակցությամբ Ամենայն Հայոց կաթողիկոսի հանդիսապետությամբ Էջմիածնի Սուրբ Աստվածածին եկեղեցում կատարվել էր Հանրապետական մաղթանք:
Չեղարկված միջոցառման մասին
Զինված ուժերի կազմավորման 30-ամյակի առիթով «Դվին» համալիրի մեծ սրահում ընդունելություն էր նախատեսված: Միջոցառումից օրեր առաջ հաղորդվեց, որ վարչապետը կորոնավիրուսով է վարակվել: Ավելի ուշ հայտնի դարձավ նաև ԶՈՒ Գլխավոր շտաբի պետի, բանակի ղեկավար կազմի մի շարք պաշտոնյաների՝ քովիդով հիվանդ լինելը:
Բանակի օրվա միջոցառումն, ըստ էության, հետաձգվեց համաճարակային իրավիճակից ելնելով և պաշտոնյաների վարակված լինելու պատճառաբանությամբ:
Ի՞նչ ուղերձներ են հղել պաշտոնյաները
Արտգործնախարար Արարատ Միրզոյանի դիտարկմամբ՝ պարտավոր ենք դասեր քաղել պարտությունից ու զբաղվել մեր պաշտպանական հզորությունների ավելացմամբ։
«Մենք պարտավոր ենք զբաղվել բանակի առողջացմամբ, վերակենդանացմամբ, ինչպես մնացած բոլոր պետական ինստիտուտներով։ Որևէ պետություն այլընտրանք չի կարող ունենալ», — լրագրողների հետ զրույցում նշել է Միրզոյանը:
Հունվարի 28-ը տոնական օր է նաև Արցախում: Ստեփանակերտում և մյուս բնակավայրերում այս օրը նշվում է որպես Հայրենյաց պաշտպանի օր:
Արտգործնախարարի խոսքով՝ մեզ հետ պատահած արհավիրքը մեծ ինքնախաբեության արդյունք էր, ուստի պետք է առերեսվել իրականությանն ու ուղիղ խոսել միմյանց հետ:
Ըստ նրա՝ պետք է այդ կերպ առաջ շարժվել նաև հայ-թուրքական երկխոսության դեպքում.
«Իհարկե, ունենք համազգային կարմիր գծեր, որոնք պետք չէ անցնել; Մյուս կողմից՝ մենք առաջին և վերջին պետությունը չենք, որ հարևանի հետ շատ երկար հակամարտություն է ունեցել։ Մենք որքան հիշենք ու հարգենք զոհվածների հիշատակը, այնուամենայնիվ, պարտավոր ենք հոգ տանել նաև ողջերի մասին», — նշել է նախարարը:
Շնորհավորական ուղերձում վարչապետ Նիկոլ Փաշինյանն ընդգծել է, որ այս տասնամյակների ընթացքում հայկական բանակն ունեցել է փառապանծ օրեր, բայց նաև անցել բազմաթիվ փորձությունների միջով:
«Այսօր մենք գնում ենք Զինված ուժերի հետագա զարգացմանն ուղղված համակարգային բարեփոխումների ճանապարհով՝ վերագնահատելով բանակի անցած ճանապարհը, ունեցած առավելությունները, բացթողումներն ու խնդիրները», — ասված է վարչապետի ուղերձում:
Նիկոլ Փաշինյանը վստահեցրել է՝ Հայաստանն ունենալու է պրոֆեսիոնալ բանակ, կառավարությունն այդ աշխատանքը կատարելու է անհոգնել, առանց ընկճվելու և առանց հոռետեսության.
«Բանակի մարտունակությունը, սպառազինությունը, ծառայության պայմանները բարելավելը մեր առաջնահերթությունն է»:
Օրերս հրաժարականի դիմում ներկայացրած նախագահ Արմեն Սարգսյանը ևս շնորհավորական ուղերձով է հանդես եկել: Նա շեշտել է՝ բանակը եղել և մնում է մեր անվտանգության և ինքնության երաշխավորն ու պահապանը, պետք է ամուր պահել բանակի թիկունքը:
«Բանակն ու կրթությունը մեր պետականության կարևորագույն հիմնաքարերն են: Աշխարհն արագորեն փոխվում է, և մեզնից է կախված, թե ինչպես օգտագործել այդ փոփոխություններն ի շահ մեր պետականության ու ժողովրդի», — ասված է նախագահի ուղերձում:
Բանակի օրը շնորհավորել են նաև Հայաստանի երկրորդ և երրորդ նախագահները: Երկրորդ նախագահ Ռոբերտ Քոչարյանը նշել է, որ օրը նշում ենք «բանակի համար ամենածանր պայմաններում։
«Տարածաշրջանում խաղաղության երբեմնի երաշխավոր, Արցախի անվտանգության երաշխավոր բանակն այսօր ինքն ունի պաշտպանության կարիք», — գրել է Քոչարյանն ու հույս հայտնել, որ բանակը կուղղի մեջքն ու կդառնա հայ ժողովրդի անվտանգության լիարժեք երաշխավորը:
Երրորդ նախագահ Սերժ Սարգսյանը օրվա առիթով այցելել է Սարդարապատի հերոսամարտի հուշահամալիր, որտեղից էլ հղել է իր ուղերձը: Սարգսյանը նշել է, որ հավատում է՝ հուշահամալիրի զանգակատան զանգերի ղողանջը դեռ ազդարարելու է նոր հաղթանակի լուրը.
«Հավատում եմ, քանի որ ես և իմ բազմաթիվ մարտական ընկերները Շուշիի ու Արցախի այլ բնակավայրերի ազատագրմամբ ականջալուր ենք եղել Սարդարապատի խորհրդին և ուժ առել մեր քաջակորով նախնիների հերոսական սխրանքներից»:
