Հայաստանի բնապահպաններն զգուշացնում հնարավոր սելավների և ջրհեղեղի վտանգի մասին

Բնապահպանները ահազանգում են, որ 2016-2017 ձմռան ամիսներին հանրապետության գետավազաններում կուտակված մեծ քանակության ձյան պաշարները, գարնանը ջերմաստիճանի կտրուկ բարձրացման  ու հորդառատ անձրևների հետ միասին, կարող են ինտենսիվ սելավների ու հեղեղումների պատճառ դառնալ:

«Հանուն կայուն մարդկային զարգացման» հասարակական կազմակերպության նախագահ, բնապահպան Կարինե Դանիելյանը նշում է, որ ջրհեղեղի վտանգը կնվազի, եթե ջերմաստիճանի կտրուկ բարձրացում չլինի:

Այս պահի դրությամբ վտանգը դեռ ակնհայտ չէ, սակայն ձմռանը տեղացած նորմայից շատ ձյունը արդեն իսկ ջրհեղեղների նախադրյալներ է ստեղծել: Այդ իսկ պատճառով բնապահպանները հորդորում են նախապես կանխարգելիչ միջոցներ ձեռնարկել:

Գետերի ու հեղեղատարների խոցելի տեղամասերի ամրացման նպատակով կառավարությունը առաջնահերթ հակահեղեղային միջոցառումներ է նախաձեռնել, մասնավորապես՝ Երևան-Գորիս-Մեղրի հատվածում, Կապսի ջրամբարում, Մովրովի հեղեղատարներում:

Սակայն, բնապահպանների կարծիքով, դրանք միայն հատվածային լուծումներ են և բավարար չեն ողջ հանրապետությունը, այդ թվում, մայրաքաղաքը աղետից պաշտպանելու համար: Երևանն ու Հայաստանի այն քաղաքները, որոնց լանջերը անտառներից զրկված են, այս տեսակետից առավել խոցելի են և անպաշտպան: