Հայաստանը Վրաստանից օգնություն է ստացել՝ բուժսարքավորումներ կորոնավիրուսի դեմ պայքարի համար

Վրաստանից Հայաստան է բերվել թոքերի արհեստական օդափոխության 27 սարք։ Սա հայ համայնքի և վրացի գործարարների և հասարակական գործիչների կողմից նվիրատվություն է, գրում է aliq.ge–ն։ 

Վրաստանում հաջողությամբ պայքարում են հիվանդության դեմ և պատրաստ են օգնել հարևան երկրին, որը ծանր իրավիճակում է հայտնվել։

Օրերս Վրաստանի Հիվանդությունների վերահսկման ազգային կենտրոնի ղեկավար Ամիրան Գամկրելիձեն հայտարարել էր կորոնավիրուսի համաճարակի դեմ Հայաստանին օգնլեու պատրաստակամության մասին։ Հայաստանի պաշտոնական պատասխանը դեռ չկա։

Ի՞նչ է արդեն բերվել Վրաստանից և ի՞նչ է սպասվում

Հունիսի 7–ին հայտնի է դարձել, որ Վրաստանում ապրող հայերի նախաձեռնությամբ ձեռք է բերվել թոքերի արհեստական օդափոխության 10 սարք։

Ապա Թբիլիսիի հայերը վրացի գործընկերների և հասարակական գործիչների հետ միասին ևս 17 սարք են ձեռք բերել։ Արդյունքում՝ 27 սարք Վրաստանում Հայաստանի դեսպանատան միջնորդությամբ հաշված ժամերի ընթացքում արդեն հայ–վրացական սահմանին էր։

Դրանց  մեծ մասը կտրամադրվի «Նորք» ինֆեկցիոն հիվանդանոցին, որը համաճարակի առաջին իսկ օրերից զբաղվում է կորոնավիրոսով հիվանդների բուժմամբ։ Սարքերի մյուս մասը կուղարկվի շրջանների հիվանդանոցներին։

Օգնություն տրամադրելու նախաձեռնողներից մեկի առաջարկով միջոցների հավաքագրում է նաև սկսվել՝ «Մեկ դիմակ՝ մեկ կյանք» կարգախոսով։ Դրան են միացել Վրաստանի հայ համայնքի ներկայացուցիչները։ Հավաքված փողով դիմակներ են գնվել, որոնք Հայաստան կուղարկվեն և կբաժանվեն անապահով ընտանիքներին։

Վրաստանում դեռ շարունակվում է միջոցների հավաքագրումը Հայաստանին օգնելու համար։

Հայաստանի առողջապահության նախարարն արդեն շնորհակալություն է հայտնել ցուցաբերված օգնության համար․

«Այս սարքերով մեր պացիենտները շնչում են` բառի ուղիղ և փոխաբերական իմաստներով»։

Օգնություն վրացական տեխնոլոգիական ընկերությունից

Հայաստանին իր օգությունն է արդեն առաջարկել Edison Tech Solutions վրացական տեխնոլոգիական ընկերությունը։ Այն հայտարարել է, որ պատրաստ է Երևանին կորոնավիրուսի դեմ պայքարին օժանդակելու շրջանակում անհատույց տրամադրել վրացական արտադրության հինգ ախտահանող խցիկ։

«Մենք պատրաստ ենք հինգ խցիկ ուղարկել հարևան երկիր առավելագույնը մեկ շաբաթում։ Ախտահանող խցերը կարելի է տեղադրել հանրային վայրերում, օրինակ, Վրաստանում դրանցից մեկն Օկրիբա ավտոկայանում է, Գագուայի հիվանդանոցում և այլն։ Հայաստանն, ըստ ցանկության, կարող է օգտագործել դրանք և տեղադրել, օրինակ, հիվանդանոցներում՝ ներքին վարակման կանխարգելման համար։ Ինչպես արդեն նշեցի, մենք պատրաստ կլինենք առավելագույնը մեկ շաբաթից, մնացածը կախված է ժամանակից և ֆորմալ միջպետական ընթացակարգերից», — հայտարարել է  ընկերության հիմնադիր Գիվի Բերիձեն։

Այդ խցերը ստեղծվել են մոտ մեկ ամիս առաջ՝ կորոնավիրուսի տարածման կանխարգելման համար։

Էլ ի՞նչ օգնութուն է առաջարկներ Վրաստանը

Վրաստանը կորոնավիրուսի դեմ պայքարում իր օգնությունն է առաջարկել դեռևս հունիսի 2–ին։ 

Վրաստանի Հիվանդությունների վերահսկման ազգային կենտրոնի ղեկավար Ամիրան Գամկրելիձեն հայտարարել էր, որ վրացի բժիշկները պատրաստ են օգնել Հայաստանին։

«Մենք լավ հարաբերություններ ունենք Հայաստանի Հիվանդությունների ազգային կենտրոնի հետ, և եթե մեր գործընկերներին պետք լինի, ապա մենք մեր հնարավորությունների սահմանում պատրաստ ենք օգնել նրանց։

Համոզված եմ, որ Վրաստանի կառավարությունն, առողջապահության նախարարությունը չեն մերժի Հայաստանին օգնելու հարցում։ Որոշումը, թե արդյոք օգնությունը պետք է, Հայաստանի առողջապահության նախարարությանն է», — հայտարարել է Գամկրելիձեն։

Սակայն պաշտոնական պատասխան կամ որևէ մեկնաբանություն Հայաստանից վրացական կողմի առաջարկի վերաբերյալ դեռևս չկա։ 

Այնուամենայնիվ, դրա վրա հարևան երկիրը կանգ չի առել։ Հունիսի 4–ից այստեղ հանրագիր է սկսել շրջանառվել, որն ուղղված է Վրաստանի կառավարությանը․

«Մենք խնդրում ենք Վրաստանի կառավարությանը դիտարկել այս բարդ ժամանակաշրջանում հարևան երկրին օգնելու հնարավորությունը։ Օգնություն ասելով՝ նկատի ունենք առաջարկել Հայաստանին նրա հիվանդներին բուժել Վրաստանում։ Մենք դա ճիշտ քայլ ենք համարում հարևան երկրին օգնելու և տարածաշրջանում համաճարակային իրավիճակը հանգուցալուծելու համատեսքտում»։

Ի՞նչ են գրում սոցցանցերում

Ֆեյսբուքի հայկական տիրույթում մարդիկ ակտիվորեն տարածում են ստացված սարքերի լուսանկարներն ու մեկնաբանում նախարարի գրառումը։

Ահա մի քանի մեկնաբանություն․

«Որպես Հայաստանի քաղաքացի՝ մեծապես շնորհակալ եմ Վրաստանում ապրող մեր հայրենակիցներին, ինչպես նաև վրացիներին իրենց օգնության և աջակցության համար, որը ցուցաբերվում է այս ծանր օրերին»։

«Իսկ այս ամիսների ընթացքում հնարավոր չէ՞ր ձեռք բերել այդ սարքերը։ Փառք աստծո, ուշացումով, բայց ոչ ուշ մեզ տվեցին այդ սարքերը։ Եվ մեր մասնագետներն իմացան, որ դրանց օգնությամբ մեր քաղաքացիները շնչում են»։

«Ամոթ, որ մենք չենք կարողացել ինքներս մեզ համար հոգ տանել, և այժմ մեզ օգնում են»։

«Շնորհակալություն եղբայրական Վրաստանին օգնության համար»։