«Դուրս կգանք ՀԱՊԿ-ից, ուրիշ ճանապարհ չկա»․ Փաշինյան
Հայաստանը դուրս կգա ՀԱՊԿ-ից
«Դուրս կգանք: Մենք կորոշենք, թե երբ դուրս գալ»,- Ռուսաստանի հովանու ներքո գործող ՀԱՊԿ ռազմական դաշինքը լքելու մասին նման հայտարարություն է արել Հայաստանի վարչապետ Նիկոլ Փաշինյանը։
Կառավարության ղեկավարը հերթական անգամ խոսել է Հավաքական անվտանգության պայմանագրի կազմակերպության՝ ՀՀ հանդեպ պարտավորությունները չկատարելու մասին։ Շեշտել է՝ «մեղավորը նրանք ենք , ովքեր ձևավորել են մի հատ փուչիկ դաշինք, որի անդամները, պարզվեց՝ գնացել, Ադրբեջանի հետ պլանավորում են մեր դեմ պատերազմը»։ Ավելի վաղ վարչապետը հայտնել էր, որ գիտի ՀԱՊԿ անդամ առնվազն երկու երկիր, որոնք մասնակցել են «մեր դեմ պատերազմի [2020 թ․-ի 44-օրյա պատերազմի] նախապատրաստությանը»։
Հայաստանի՝ ՀԱՊԿ-ը լքելու հավանականության մասին առաջին անգամ չէ, որ հայտարարվում է։ Փաշինյանի ելույթը, սակայն, արժանացել է ինչպես տեղական, այնպես էլ միջազգային ԶԼՄ-ների ուշադրությանը։ Դրանց մի մասը հայտարարությունը ներկայացրել է որպես արդեն իսկ կայացված որոշում։ Արտգործնախարար Արարատ Միրզոյանն ԱԺ ամբիոնից պարզաբանել է․
«Վարչապետն ասել է՝ մենք կորոշենք՝ երբ դուրս կգանք, մենք կորոշենք, բայց հետ չենք գնա՝ ոչ պակաս, ոչ էլ ավելի։ Եթե որևէ մեկը պնդում է, որ ՀՀ վարչապետն ասել է՝ Հայաստանը դուրս է գալիս ՀԱՊԿ-ից, սխալվում է, և սա շատ հեշտ ապացուցելի է»,- շեշտել է Արարատ Միրզոյանը։
Ի՞նչ կլիներ, եթե Փաշինյանը չլիներ․ «Հայաստանը 100 տոկոսով կլիներ գուբերնիա»
Այսօր կառավարություն-Ազգային ժողով հարցուպատասխանի ժամանակ ընդդիմադիր «Հայաստան» խմբակցության պատգամավոր Թադևոս Ավետիսյանը վարչապետին հարցրել է՝ Փաշինյանն ինքն իրեն հարց տվե՞լ է՝ եթե չլիներ իշխանության, ի՞նչ վիճակում կլինեին Հայաստանն ու Արցախը։ Փաշինյանի գնահատմամբ՝ ամեն բան նույնը կլիներ, բայց մի տարբերությամբ՝ «Հայաստանը 100 տոկոսով կլիներ գուբերնիա»։
Օգտագործելով առիթը՝ կառավարության ղեկավարը խոսել է նաև ՀԱՊԿ ռազմական դաշինքի՝ պայմանագրային պարտավորությունները չկատարելու մասին․
«Պարզվեց, որ դաշինքի անդամները ոչ թե իրենց պայմանագրային պարտավորություններն են կատարում, այլ գնացել, Ադրբեջանի հետ պլանավորում են մեր դեմ պատերազմը»:
Ընդդիմադիր պատգամավորների դիտարկմանը, թե այդ դեպքում ինչո՞ւ Հայաստանը չի լքում դաշինքը, Փաշինյանն արձագանքել է հետևյալ կերպ․
«Դուրս կգանք, դրանով էլ վախեցնո՞ւմ եք։ Լավ ենք անում։ Մենք կորոշենք՝ երբ դուրս գանք։ Ասում ենք, այդ ասելիքի պակա՞ս է եղել: Ձեր կարծիքով հաջորդ քայլը ո՞րն է, կարո՞ղ է հետ գնանք։ Ուրիշ ճանապարհ չկա»,- ընդգծել է Փաշինյանը։
Կառավարության ղեկավարին հարցրել են՝ դեպի ո՞ւր է շարժվում Հայաստանը։ Ի պատասխան ասել է՝ դեպի իրական Հայաստան, Հայաստանի Հանրապետություն՝ ինքնիշխան, անվտանգ, խաղաղ, սահմանազատված սահմաններով պետություն ու հավելել՝ «համարյա հասել ենք տեղ»։
«Իսկ այնտեղ [ՀԱՊԿ], մի անհանգստացեք, հետ չենք գնա: Ուղղակի չենք ասում շուտ, որ ձեր [խորհրդարանական ընդդիմության, որն, ըստ իշխող ուժի, սպասարկում է ՌԴ շահերը] տրամադրությունը հանկարծ չընկնի»,- վստահեցրել է Փաշինյանը։
