Համավարակն ադրբեջանցի մարզիկներին վերածել է տաքսու վարորդների և փոստատարների
2021 թ․ մայիսի 7-ին Վրաստանում պետք է կայանա վոլեյբոլի Եվրոպայի առաջնության ընտրական խաղն Ադրբեջանի և Չեռնոգորիայի հավաքականների միջև։ Սակայն ճակատագիրն այնպես է դասավորվել, որ Ադրբեջանից հարևան երկիր է մեկնելու մի թիմ, որը կազմված է տաքսու վարորդներից և փոստատարներից։ Ո՞րն է այդ կազուսի պատճառը։
- Ադրբեջանը՝ հերթական լոքդաունի նախաշեմին․ ասեկոսենե՞ր, թե՞ անխուսափելի մի բան
- Արցախյան նոր պատերազմի առաջին «անտունները»՝ ֆուտբոլիստները
- Վրաստանի ֆուտբոլի հավաքականը չի մասնակցի Եվրոպայի առաջնությանը
Կորոնավիրուսի համավարակը հսկայական հարված է հասցրել նաև սպորտին։ Մարզիկներն անգործ են մնացել։ Ադրբեջանում իրավիճակը բարդանում է նրանով, որ մարզական միջոցառումները թույլատրված են միայն բաց երկնքի տակ։ Այլ կերպ ասած՝ նրանք, ովքեր պետք է մարզվեն և հանդես գան դահլիճներում, ստիպված են սպասել կարանտինի ավարտին։
Լրագրողի հոգու ճիչը
Մարզիկների անելանելի դրության մասին է խոսում ադրբեջանցի սպորտային լրագրող Սաբուհի Մուսան։ Նրա խոսքով՝ դահլիճներում մարզումների արգելքը հանգեցնում է տրավմատիզմի բարձր մակարդակի․
«Փակ տարածքներում աթլետիկայի Եվրոպայի չեմպիոն Նազիմ Բաբաևը մեր երկիրը ներկայացնելու է Տոկիոյի Օլիմպիադային։ Սակայն նա չի կարողանում պատրաստվել մրցաշարին։ Ձմռան կեսին Բաբաևը ստիպված էր մարզվել փողոցում, և արդյունքն ակներև է․ նա վնասվածքներ է ստացել Ստամբուլում անցկացված երկու մրցաշարերում։ Այժմ Եվրոպայի առաջնությանը նրա մասնակցությունը հարցականի տակ է», — ասում է լրագրողը։
Նա հաղորդել է նաև, որ ներկա պահին սուսերամարտի հավաքականի մարզիկները ցրվել են աշխարհով մեկ՝ դահլիճներում մարզվելու հնարավորություն ունենալու համար։
«Այսպե՞ս ենք զարգացնում սպորտն Ադրբեջանում», — հարցնում է Սաբուհի Մուսան։
Համավարակն ադրբեջանցի մարզիկներին վերածել է տաքսու վարորդների և փոստատարների
Ադրբեջանի հավաքականի վոլեյբոլիստները գումար վաստակելու այլ ելք չեն գտել, քան տաքսու վարորդ և փոստատար դառնալը։
Ֆինանսական խնդիրների պատճառով թիմի ավագ Ալեքսեյ Չերվյակովը մեկնել է երկրից։ Սակայն, ոչ թե ուրիշ թիմում խաղալու համար, այլ որովհետև մարզիկը գումար վաստակելու համար ինչ-որ մի աշխատանք է փնտրում։
Ադրբեջանի հավաքականի մյուս մարզիկ Թուրան Հասանլին սկզբից սկսել է աշխատել գուլպաների կարի արտադարամասում, այնուհետև տեղափոխվել է փոստային ծառայություն և այժմ նամակներ է բաժանում։ Նրա թիմակից Էլմին Ալիշանովն այժմ ապրում է առաքման ծառայությունում աշխատանքի հաշվին։
Վոլեյբոլիստ Ասիֆ Ալիևն ընդհանրապես վերադարձել է հայրենի Ջալիլաբադի շրջան և գյուղատնտեսությամբ է զբաղվում։ Սակայն նա նույնիսկ ֆերմեր չէ․ համագյուղացիների կովերն է արածեցնում։
Տաքսի ծառայությունում աշխատանքի է անցել Ադրբեջանի վոլեյբոլի տղամարդկանց հավաքականի ևս մեկ մարզիկ՝ Ագիլ Աղազադեն, գրում է apasport-ը։
Փորձագետի մեկնաբանություն
Ադրբեջանի հայտնի սպորտային լրագողներից մեկը՝ azerisport կայքի հիմնադիր Վուգար Զեյնալը, JAMnews-ի հետ զրույցում պատմել է ադրբեջանցի շատ մարզիկների ծանր վիճակի մասին․
«Այո, ես գիտեմ, որ շատ ֆեդերացիաներում այժմ իրավիճակը ծայրահեղ բարդ է։ Մարզիկները մարզվելու, ելույթ ունենալու, հետևաբար՝ փող աշխատելու տեղ չունեն։
Նրանցից շատերը տաքսու վարորդ են․ եթե սեփական ավտոմեքենա ունես, ապա դա ընտանիք պահելու ամենահեշտ միջոցն է։ Սակայն մեծ մասն աշխատում է թաքցնել իր դժվարությունները՝ դրանք իր համար նվաստացուցիչ համարելով», — ասում է Վուգար Զեյնալը։
«Սակայն այս իրավիճակը միայն սպորտում չէ։ Վերջերս տաքսի եմ կանչել հայտնի միջազգային հավելվածով։ Վարորդը Բաքվի ամենաբարձրակարգ հյուրանոցներից մեկի գլխավոր մենեջերն էր։ Ի՞նչ անի։ Բոլորը մի բան անում են՝ ապրուստի միջոց վաստակելու համար», — հավելել է նա։
