Ադրբեջանում ձերբակալում են պատերազմի դեմ արտահայտված ակտիվիստներին
Հակապատերազմական ակտիվիստներ
Սեպտեմբերի 19-ից Ադրբեջանում տարբեր մեղադրանքներով ձերբակալվել են չորս ակտիվիստներ և մեկ լրագրող, որոնք հանդես են եկել Ղարաբաղում ռազմական գործողությունների դեմ։ Չնայած իրավապահ մարմինների հայտարարություններին, թե այս բոլոր անձինք ձերբակալվել են կոնկրետ արարքների համար, նրանք, ինչպես նաև իրավապաշտպանները պնդում են, որ հենց սոցիալական ցանցերում նրանց հայտարարություններն են դարձել հետապնդման պատճառը։
- «Պասիվ մնալ կնշանակի հանցակից լինել»․ ՄԱԿ ԱԽ նիստը՝ ԼՂ-ի վերջին դեպքերի շուրջ
- «Բաքուն շահագրգռված չէ ԼՂ-ից բոլոր հայերի հեռացումով»․ կարծիքներ Երևանից
- «Արևմուտքն է մեղավոր, ՌԴ-ն փրկում է»․ Կրեմլի ձեռնարկը՝ ԼՂ-ի դեպքերը լուսաբանելու մասին
Լրագրողը պատմել է, որ ձերբակալության ժամանակ բռնության է ենթարկվել
Սեպտեմբերի 21-ին լրագրող Նուրլան Գահրամանլին (առավել հայտնի է Libre կեղծանունով) դատապարտվել է 30-օրյա վարչական կալանքի։ Դատական նիստին լրագրողը հայտարարել է, որ իր նկատմամբ բռնություն է գործադրվել։
«Նուրլանը դատարանում հայտարարեց, որ Սումգայիթի ոստիկանությունն իրեն տարել է տնից և փոխանցել Գլխավոր դատախազության հակակոռուպցիոն գլխավոր վարչությանը։ Ճանապարհին Նուրլանին վիրավորել ու նվաստացրել են։ Բաժնում երեք հոգի դատախազի աչքի առաջ ծեծի են ենթարկել, փորձել են պարզել հեռախոսի գաղտնաբառը»,- պատմել է դատարանում ներկա ակտիվիստներից մեկը։
Նրա խոսքով՝ Նուրլան Գահրամանլիի ձեռքերին և ոտքերին կապտուկներ են եղել։
Լրագրողին մեղադրանք է առաջադրվել Վարչական իրավախախտումների վերաբերյալ օրենսգրքի 388-1.1.1 հոդվածով (Ինտերնետ տեղեկատվական ռեսուրսում կամ հեռահաղորդակցական ցանցում արգելված տեղեկատվություն տեղադրելը, ինչպես նաև նման տեղեկատվության տեղադրումը չկանխելը):
Նուրլան Գահրամանլին հայտարարել է իր անմեղության մասին և նշել, որ ձերբակալությունը կապված է իր հակապատերազմական հայտարարությունների հետ։
Մի քանի օր առաջ՝ սեպտեմբերի 13-ին, լրագրողը հրավիրվել էր Պետական անվտանգության ծառայություն։ Նա պատմել է, որ այնտեղ իրեն բռնաբարությամբ են սպառնացել սոցիալական ցանցերում իր գրառումների պատճառով։
Պետական անվտանգության ծառայությունը չի արձագանքել լրագրողի այդ հայտարարությանը։
Նախկին դիվանագետը նույնպես մեղադրվում է արգելված տեղեկություններ տարածելու մեջ
Առավոտյան նույն մեղադրանքով 30-օրյա վարչական կալանք էր սահմանվել հասարակական գործիչ Էմին Իբրահիմովի նկատմամբ։
Նա նախկին դիվանագետ է, ով աշխատել է ԱՄՆ-ում Ադրբեջանի դեսպանատանը, Ուրուգվայում երկրի դիվանագիտական ներկայացուցչությունում և այլուր։
Իբրահիմովի փաստաբան Ագիլ Լայիչը հայտնել է, որ իր պաշտպանյալի հետ հանդիպման ժամանակ նա պատմել է ձերբակալության իրական պատճառի մասին։ Նրա խոսքով՝ դա սոցիալական ցանցերում հնչեցրած քննադատությունն է։
«Նրա դուռը թակել են և ներկայացել որպես Azersu-ի (բնակելի շենքերի ջրի բաշխման պետական ընկերության) աշխատակիցներ։ Դուռը բացելուն պես մի քանի քաղաքացիական հագուստով անձինք ներխուժել են բնակարան ու ուժի կիրառմամբ բռնել նրան։ Բացի այդ, առանց դատարանի որոշման խուզարկել են տունը, վերցրել շատ իրեր, այդ թվում` հեռախոսներ, համակարգիչներ և տեսաձայնագրիչներ։
Էմին Իբրահիմովին տեղափոխել են Գլխավոր դատախազության արտաքրեական դատավարության վարչություն»,- ասել է փաստաբանը։
Իբրահիմովն իր փաստաբանին հայտնել է նաև, որ իրեն այս գրասենյակ են բերել առանց կոշիկների և գուլպաների։ Սոցցանցերում իր հրապարակած գրառումների պատճառով դատախազությունը նրան մեղադրել է «ահաբեկչությանը աջակցելու» մեջ:
30-օրյա վարչական կալանքի մասին դատարանի որոշման մեջ տեղ է գտել նաև Samsung և iPhone հեռախոսների, HP համակարգչի, DVR-ի վերադարձի հարցը։ Վերադարձի հարցը վերապահվել է դատախազությանը։ Դա ապացուցում է, որ այդ իրերը գողացել են տնից։ Դատարանի որոշումից պարզ չէ, թե ինչ իրավական հիմքով են դրանք առգրավվել։
«Հայտարարությունները, որոնք նա գրել է սոցիալական ցանցերի իր էջերում, չեն աջակցում ահաբեկչությանը: Սեփական կարծիքի համար Էմին Իբրահիմովի ձերբակալության կնիքը երևում է բուն դատարանի որոշման մեջ»,- ասել է Ագիլ Լայիչը։
Էմին Իբրահիմովը կարծում է, որ գործողությունները Ղարաբաղում իրականացվել են ռուսական շահերի շրջանակներում, և այդ մասին գրել է իր ֆեյսբուքյան վերջին գրառումներում։
Ղարաբաղյան երկրորդ պատերազմի մասնակիցը նույնպես դեմ է ռազմական գործողություններին
Սեպտեմբերի 20-ին մեկ այլ ակտիվիստ՝ Նեմատ Աբբասովը, դատապարտվել է վարչական կալանքի։ Հաղորդվում է, որ ակտիվիստը բերման է ենթարկվել վարչական իրավախախտումների վերաբերյալ օրենսգրքի 535.1 հոդվածով (ոստիկանության ծառայողի կամ զինվորականի օրինական պահանջին դիտավորյալ չենթարկվելը): Նեմատ Աբբասովի հարազատները պնդում են, որ նա իրականում ձերբակալվել է հակապատերազմական հայտարարությունների համար.
«Չնայած Նեմատը 2020 թվականի պատերազմի մասնակից է եղել, նա ներկայումս հանդես է գալիս պատերազմի դեմ և պատժի է ենթարկվում դրա համար»։
30-օրյա վարչական կալանքի դատապարտվածներից է նաև հասարակական ակտիվիստ Ամրախ Թախմազովը։ Ձերբակալությունից մեկ օր առաջ Թախմազովը հայտնել էր, որ իրեն հրավիրել են Պետական անվտանգության ծառայություն։ Նրա խոսքով՝ պատճառ են դարձել սոցցանցերում պատերազմի դեմ իր գրառումները։
Թախմազովին մեղադրանք է առաջադրվել վարչական իրավախախտումների վերաբերյալ օրենսգրքի 388-1.1.1 հոդվածով (արգելված տեղեկատվության տեղադրում ինտերնետ տեղեկատվական ռեսուրսում կամ հեռահաղորդակցական ցանցում, ինչպես նաև նման տեղեկատվության տեղադրումը չկանխելը):
«Նա ինքն իրեն վիրավորեց և դանակը նետեց ինձ վրա»
Սեպտեմբերի 19-ին ձերբակալվել է Աշխատողների ազատ արհմիությունների կոնֆեդերացիայի նախագահ Աֆիադին Մամեդովը։ Նա մեղադրվում է վնասվածք պատճառելու մեջ։ Վիրավորը հանրությանը հայտնի չէ։
«Երբ Աֆիադին Մամեդովը դուրս է եկել տնից՝ ընկերոջ հարսանիքին գնալու, բակում տեսել է քաղաքացիական հագուստով ոստիկաններին, ովքեր մի անգամ նրան ձերբակալել էին, և մտածել` ինչո՞ւ են նրանք այստեղ, գուցե եկել են իր հետևից: Երբ նա փորձել է շրջվել ու հեռանալ, հանկարծակի հարվածից ընկել է գետնին։ Նրա քթին էին հարվածել, իսկ վերնաշապիկն ամբողջությամբ արյան մեջ էր։ Երբ նա ուշքի է եկել հարվածից ու ոտքի կանգնել, տեսել է, որ ձեռքերն արդեն ձեռնաշղթաների մեջ են։ Նրա ձեռքերին ձեռնաշղթաներ կապելուց հետո ոստիկանները հեշտությամբ դանակը դրել են նրա ձեռքի մեջ և ստացել «մատնահետքերը»։
Դատարանում քննիչը հայտարարել է, որ Աֆիադդինը փողոցում հայհոյել է»,- գրել է ակտիվիստ Գուլնարա Մեհդիևան, ով ներկա է եղել դատական նիստին։
Աֆիադին Մամեդովի խոսքով՝ ինքը ոչ ոքի չի վիրավորել, տղամարդը, որին նա նույնիսկ չի ճանաչում, ինքն իրեն վերքեր է հասցրել և դանակը նետել նրա վրա։
Դատարանի որոշմամբ ակտիվիստի նկատմամբ սահմանվել է 4 ամսվա նախնական կալանք։
Աֆիադին Մամեդովը բազմիցս ենթարկվել է վարչական կալանքի։ Վերջին անգամ նա ձերբակալվել էր օգոստոսի 1-ին, միայն օգոստոսի 31-ին էր ազատ արձակվել։
Այս բոլոր ձերբակալություններից բացի, ըստ ՆԳՆ պաշտոնական տվյալների, ոստիկանության բաժին է հրավիրվել ավելի քան 10 մարդ՝ վերջին օրերին իրականացված ռազմական գործողությունների մասին «ապատեղեկատվություն տարածելու» համար։ «Նրանց հետ անցկացվել են կանխարգելիչ զրույցներ»,- ասվում է ՆԳՆ հաղորդագրության մեջ։
