Կրեմլի ներկայացուցիչը գոհ է, թե ինչպես է Հարավային Օսիան ծախսում ռուսական փողերը

Ռուսաստանի Դաշնության նախագահի օգնական Վլադիսլավ Սուրկովն այցելել է Ցխինվալ, որտեղ հանդիպել է հանրապետության ղեկավարների հետ և եղել մանկական հիվանդանոցի ու թատրոնի շենքերում, որոնք մոտ ժամանակներս շահագործման են հանձնվելու:

Հարավային Օսիայի նախագահ Լեոնիդ Թիբիլովի հետ հանդիպման ժամանակ Սուրկովն իր միանշանակ գոհունակությունն է հայտնել նրա քաղաքականության և գործողությունների վերաբերյալ:

«Ես տեսել եմ այն ժառանգությունը, որը ձեզ էր մնացել նախորդ իշխանություններից, ես վհատված էի այն անպատասխանատվությունից և ոչ պրոֆեսիոնալ մոտեցումից, որն այստեղ ծաղկում էր», — ասել է Սուրկովը՝ նկատի ունենալով Էդուարդ Կոկոյտիի նախագահության (2001-2011) ժամանակաշրջանը: Կոկոյտին իր թեկնածությունն է առաջադրել 2017թ-ի ապրիլի 9-ին կայանալիք նախագահական ընտրություններին:

Սուրկովի կարծիքով՝ այսօր իրավիճակը արմատապես փոխվել է, և Ռուսաստանում բավարարված են, որ Հարավային Օսիային տրամադրած միջոցները «հարկ եղած ձևով են ծախսվում և ուղղվում են մարդկան աջակցելուն և կենսամակարդակի բարելավմանը», և հանրապետության իշխանությունները «թույլ չեն տալիս մսխել փողերը»:

«Չնայած ծանր տնտեսական իրավիճակին (Ռուսաստանում – խմբ.)՝ Հարավային Օսիայի համար բացառություն է արվում, և հանրապետությանն ուղղված ռուսական ֆինանսական օգնությունն աճում է», — ասել է Վլադիսլավ Սուրկովը:

JAMnews-ի մեկնաբանությունը

• Շատ փորձագետների կարծիքով՝ Հարավային Օսիայի գործող նախագահ Լեոնիդ Թիբիլովի հասցեին հանրային գովասանքն ու քննադատությունն Էդուարդ Կոկոյտիի հասցեին նշանակում է, որ Կրեմլը 2017թ-ի ապրիլի 9-ին կայանալիք նախագահական ընտրություններին միանշանակ սատարում է Թիբիլովի թեկնածությանը: Գործող նախագահից բացի իրենց թեկնածություններն են մտադիր առաջադրել խորհրդարանի խոսնակ Անատոլի Բիբիլովն ու նախկին նախագահ Էդուարդ Կոկոյտին:

• Վլադիսլավ Սուրկովը ռուսական քաղաքականության վետերաններից մեկն է և, որոշ փորձագետների կարծիքով, պատկանում է Մոսկվայի ամենաազդեցիկ անձանց թվին: 2013թ-ին նա Ռուսաստանի Դաշնության նախագահի օգնական է նշանակվել և պատասխանատու է Աբխազիայի և Հարավային Օսիայի հետ փոխհարաբերությունների հարցերի համար՝ ներառյալ ֆինանսական օգնությունը: Փորձագետների մի մասի մոտ տարածված կարծիքի համաձայն՝ Սուրկովը նաև ոչ պաշտոնապես համակարգում է ռուսաստանյան քաղաքականությունն Ուկրաինայի, ինքնահռչակ ԴԺՀ և ԼԺՀ հանրապետությունների ուղղությամբ:

• Սուրկովը Եվրամիության կողմից ընդգրկվել է այն անձանց ցուցակ, որոնց մուտքը ԵՄ երկրներ արգելված է որպես Ուկրաինայում ճգնաժամի մասնակից քաղաքական գործչի:

Հոդվածում արտահայտած կարծիքները փոխանցում են հեղինակի տերմինաբանությունն ու հայացքները և պարտադիր չէ, որխմբագրության դիրքորոշումն արտացոլեն: