Հայաստան, կորոնավիրուս․ լրագրող և բազմազավակ մոր օրագիրը՝ մեկուսացման օրերի մասին
Կորոնավիրուսի տարածման դեմ պայքարի շրջանակներում Հայաստանում արտակարգ դրություն հաստատվեց մարտի 16-ին: Այդ օրվանից կառավարությունը հորդորեց քաղաքացիներին ինքնամեկուսանալ տներում՝ հնարավորինս կրճատելով շփումների քանակը:
Լրագրող Սառա Խոջոյանն այդ օրվանից աշխատում է տնից առցանց։ Նրա հետ տանն են նաև նրա երեխաները, քանի որ բոլոր դպրոցները փակ են, դասերն անցնում են հեռավար ռեժիմով։
Սառան այս օրերին իր ֆեյսբուքյան էջում վարում է «Աշխատող բազմազավակ մոր օրագիրը», որը ներկայացնում ենք կրճատումներով։
16.03.2020
Տանն եմ, հիմնականում՝ երեք երեխաների հետ, երբեմն մեր տուն են գալիս նաև եղբորս երկու աղջիկները։ Դժվար է, գոռգոռում եմ պարբերաբար, երբեմն, զարմանալի է, բայց փաստ, համբերությունս հաղթում է, ու երեխաներին հաշտեցնում եմ առանց գոռգոռալու։
Այսօր ներկայացում էին բեմադրել, չեմ կարողացել գրաֆիկս մաքրել ու ժամանակ հատկացնել՝ նայելու։ Խոստացել եմ վաղը կազմակերպել պրեմիերան։
Մարտի 12-ից գլուխս պարբերաբար ուժեղ ցավում է։ Այսօր նաև ջերմություն ունեի՝ սկզբում՝ 37.4։ Դեղ խմեցի։ Օրվա երկրորդ կեսին․․․ ջերմությունս դարձավ 38։ Խմեցի ուժեղ ցավազրկող, ցավերն անցան, կարողանում եմ նստել, գրել, մտածել երեխաների մասին։ Կոկորդս չի ցավում, չեմ հազում, շունչս պահում եմ առանց խնդիր 20+ վայրկյան․․․
Գրեթե համոզված եմ՝ կորոնավիրուս պոզիտիվ չեմ, ավելի չեմ ինքնամեկուսանում, քան մեր տունն է, թեկուզ՝ աշխատելու համար ստիպված եմ մեկուսանալ ննջասենյակում։ Բայց չեմ կարող միշտ անել դա՝ ճաշ եմ եփում, լվանում ափսեները, լվացք անում՝ գործին զուգահեռ․․․
Բլումբերգի համար օրվա մեջ շատ ակտիվ ռեժիմով նյութեր եմ գրում։
Ամենադժվարը՝ երեխաների տնայիններն են, անցել են հեռավար ուսուցման, Շուշանը առանց ինձ շատ է դժվարանում, չեմ ուզում նեղացնել կարանտինի այս խելագար օրերին, բայց չեմ էլ կարողանում ժամանակ հատկացնել: Աննայի հետ էլ պետք է տեսանյութեր նկարենք, Ավետի հետ էլ՝ պարզվում է: Երեխաների դասերը ընկնում են 4-րդ, անգամ 5-րդ պլան։
Վաղը Ավետիս՝ առաջնեկիս ծնունդն է, դառնում է 10 տարեկան, պետք է իր ուզած ձևով նշեինք: Հետաձգում ենք անհայտ ժամանակով, բայց իր ուզած տորթը պատվիրել եմ՝ հեռախոսով։
17.03.2020
Ավետի ծնունդը նշեցինք 10 հոգով` ամեն ինչ արտակարգ դրության պայմաններին համապատասխան։
Երբ Ավետով հղի էի, ուզում էի աղջիկ ունենալ, մեղքս ինչ թաքցնեմ, միշտ ուզել եմ աղջիկ ունենալ, բայց Ավետից ավելի լավ տղա չէի կարող ունենալ. նրբազգաց, բարի, քչով երջանիկ։
Այսօր առավոտյան լավ էի, հետո տաքությունս դարձավ 39.5, մի քանի դեղ խմեցի, ազնվամորիով թեյ, քրտնեցի, իջավ մինչև 38: Մի երկու ժամ լավ էի, հետո նորից սկսեցի մրսել, ստիպված շտապօգնություն կանչեցի։ Երիտասարդ բժիշկ էր, շատ սիրալիր ու կոմպետենտ, թոքերս լսեց, կոկորդս նայեց։ Խնդիր չկար, ասաց, որ մրսած եմ, պանիկայի մեջ չընկնեմ՝ կանցնի, սրսկեց։
Տաքությունս իջավ, ինչի շնորհիվ կարողացա մասնակցել Ավետի ծնունդին։ Ապրի շտապօգնության բժիշկը։
18.03.2020
Արդեն երրորդ օրն է՝ երեխաների հետ տանն եմ: Սոցցանցերում կատակում են, թե, իբր, 4 երեխաների հետ տանը մեկուսացված մայրը 3 օր անց գտել է կորոնավիրուսը բուժող դեղամիջոց: Ընկերներս ինձ են նշում այդ կատակների տակ:
Հիմա չգիտեմ՝ չորրորդ երեխան ունենա՞մ, թե՞ դեղամիջոցը գտնեմ:
23.03.2020
Մի քանի օր չեմ գրել, բայց, չեմ մահացել, լավ եմ, երեկ գիշեր նույնիսկ կոնֆետ էի ուզում, ուրեմն՝ լավանում եմ։ Իմ կյանքում երևի մի 10 անգամ է եղել, որ կոնֆետ չուզեմ։ Ճիշտ է, դեռ տաքություն ունեմ, բայց եթե ախորժակը հետ է գալիս, ուրեմն՝ հիվանդությունը գնում է։ Մնում է՝ մի քիչ քիչ ուտեմ, թե չէ վերջերս սոցցանցերում հետս ընկերացած դասարանցիներս նկարներս չեն լայքել։
Բայց կորոնավիրուսի տարածման վտանգը Հայաստանում մնում է: Ինձ, որպես տանից աշխատող մայրիկի, ցույց տվեցին լուրերով, սկայպով հարցազրույց արեցին, երեխաներն էլ նկարվեցին սիրով։ Հիմա բոլոր բարեկամներիս վերջապես կարող եմ հղում տալ, երբ կրկին հարցնեն, թե ինձ ինչու չեն տեսնում հեռուստացույցով։
Երբ գլխացավը գլխիցս ցվրվեց, ոնց երկնքում կուտակված ամպերն են ցրվում անձրևից հետո, ես պայծառ գլխով գործերս արեցի, գրեթե բոլոր գործերս, այնպես որ հպարտ եմ ինձնով։
Երեխաները մի քիչ դաս արեցին, գալիք շաբաթ արձակուրդ են, պիտի փորձենք ամեն բաց թողնվածը լրացնել՝ գործիս զուգահեռ, այնպես որ դժվարությունները շարունակվում են։ Դեռ գոռգոռում եմ, բայց, ինչպես միշտ, ամեն ինչ լավ է ավարտվում։
Երեխաները բեմադրեցին ներկայացումը, կոչվում էր «Չար արքայադուստրը»։ Սցենարը եղբորս աղջիկն է գրել, Շուշանը արքայադուստրն էր, մյուսները ուրիշ կարևոր դերեր էին խաղում, Աննան դեր չուներ ու շատ էր նեղացել։
Խոստանում եմ մյուս անգամ Աննայի մասին պատմել:
Ավետն այսօր ինձ ծաղիկ է նվիրել:
Հայաստանում արտակարգ դրությամբ պայմանավորված խիստ սահմանափակումները կշարունակվեն մինչև ապրիլի 12-ը: Այս պահի դրությամբ վարակվածների թիվը 663 է: Բուժվել է 33 մարդ, մահացել՝ 7-ը:
Սառան երեխաների հետ շարունակում է մեկուսացումը:
