Հայաստանի բուժաշխատողները կորոնավիրուսի երրորդ ալիք են կանխատեսում
Հունվարի երկրորդ կեսին Հայաստանում կորոնավիրուսային վարակի հերթական սրացումն է սպասվում՝ տոնական օրերին մարդկանց ակտիվ շփումների պատճառով։ Այսպիսին է առողջապահության նախարար Արսեն Թորոսյանի կանխատեսումը։
Այժմ «համեմատական կայունացում է դիտվում» վարակման նախորդ երկու պիկերից հետո՝ այս տարվա ամռանն ու աշնանը։ Ընդ որում, երկրորդ սրացման պատճառն արցախյան երկրորդ պատերազմն է եղել։
Երկար ժամանակ Հայաստանն աշխարհում տասներորդն էր մեկ միլիոն բնակչությանը բաժին ընկնող դեպքերի քանակով՝ շրջանցելով հարևան երկրներին։ Այժմ իրավիճակը փոխվել է։ Հայաստանն իջել է տասներեքերորդ հորիզոնական՝ առաջ թողնելով Վրաստանին, որն ութերորդն է։
Դեկտեմբերի 30-ին Հայաստանում գրանցվել է վարակման 582 նոր դեպք։ Ընդհանուր առմամբ, երկրում գրանցվել է վարակման 158 878 դեպք։ 141 844 մարդ ապաքինվել է, 2807 վարակվածների կյանքը փրկել չի հաջողվել։
- Երևան․ Ամանորն՝ առանց տոնածառերի և զարդարանքի։ Տեսանյութ
- Ճգնաժամը շարունակվում է․ ընդդիմության առաջնորդների հետ Հայաստանի վարչապետի հանդիպմանը «յուրաքանչյուրն իր կարծիքին է մնացել»
Ի՞նչ է ասում նախարարը
Ամփոփելով 2020 թ-ն՝ Արսեն Թորոսյանը հայտարարել է, որ տարին ավարտվում է հիվանդների բուժման համեմատաբար լավ արդյունքներով․
«Բայց մենք պատրաստ ենք նոր փորձությունների, այդ թվում՝ «երրորդ ալիքին», որի մասին անընդհատ խոսում են ողջ աշխարհում։ Ի տարբերություն մի շարք այլ պետությունների՝ մեզ մոտ այժմ այդ առումով իրավիճակը բավականին տանելի է։ Միաժամանակ մենք հաշվի ենք առնում, որ ձմեռվա շրջանն ավանդաբար բարդ է սուր շնչառական հիվանդությունների սրացման առումով»։
Երրորդ ալիքը, որն, ըստ բուժաշխատողների կանխատեսումների, ակնկալվում է հունվարի երկրորդ կեսին, երկրորդից ավելի «մեղմ» կլինի, այսինքն՝ հիվանդանալու ցուցանիշներն այնքան էլ բարձր չեն լինի։
«Որովհետև մենք պահպանում ենք սանիտարահամաճարակային ռեժիմը։ Արդյունքում՝ շատերն են հիվանդացել և բուժվել։ Այնպես որ, կորոնավիրուսը վերջերս մի քիչ հետ է քաշվում։ Սակայն գլոբալ առումով չի կարելի սա պնդել», — կարծում է նախարարը։
Արցախյան երկրորդ պատերազմի ժամանակ, նրա խոսքով, սանիտարական նորմեր պահպանելն անհնար էր, ինչը հանգեցրեց վարակման օրական հազարավոր դեպքերի։ Իսկ հետպատերազմյան փուլում, ասում է նախարարը, իրավիճակը որոշակիորեն բարելավվել է, շատ հիվանդանոցներ վերադառնում են իրենց բնականոն աշխատանքին, սակայն պատրաստ են երրորդ ալիքին․
«Մեզ մոտ բռնկումներ եղել են ամռանն ու աշնանը, և, ի տարբերություն մյուս երկրների, մենք համեմատաբար սահուն ենք անցնում սուր շնչառական հիվանդությունների համար ամենածանր փուլ՝ ձմեռ, երբ հիվանդությունները սովորաբար սրվում են»։
Այս առումով Հայաստանն այժմ դրական առումով տարբերվում է հարևան Վրաստանից, որտեղ սկզբից վարակվածները շատ չէին, այնուհետև մեծ աճ եղավ։ Այս իրավիճակն, ըստ Արսեն Թորոսյանի, պայմանավորված է իմունիտետի բացակայության պատճառով կորոնավիրուսով վարակման հակվածություն ունեցող մարդկանց թվի աճով։
Ի՞նչ են գրում սոցցանցերում
Ֆեյսբուքի հայկական տիրույթի օգտատերերը հիմնականում գոհ են 2020-ին առողջապահական համակարգի աշխատանքից։
Ներկայացնում ենք մի քանի մեկնաբանություն․
«Այս տարին բժիշկների համար նաև հերոսական պայքարի, անզիջում պայքարի տարի էր։ Մեր բուժաշխատողները նախարարի գլխավորությամբ աշխատում են շուրջօրյա։ Իսկ արցախյան պատերազմի ժամանակ մեր հերոս բժիշկներն առաջնագծում էին՝ հազարավոր կյանքեր փրկելով անհավանական բարդ պայմաններում»։
«Ամեն ինչ լավ է՝ բացառությամբ նրա, որ պատրաստվում եք ռուսական պատվաստանյութ բերել։ Եթե այն ներկրեք, մենք չենք պատվաստվելու։ Այն ավելի էժա՞ն է։ Միայն այն, որ պատվաստանյութը ռուսական է, արդեն վստահություն չի ներշնչում»։
«Բոլոր բժիշկները ողջ տարվա ընթացքում աշխատել են զօրուգիշեր։ Հիվանդանոցներում մարդիկ աշխատել են անհավանական ծանրաբեռնվածությամբ և հաջողել են՝ անկախ ամեն ինչից։ Շնորհակալություն նրանց դրա համար»։
