Կորոնավիրուս․ համավարակի էպիկենտրոնն ԱՄՆ-ն է։ Ինչու՞ և ի՞նչ է լինելու
Միացյալ Նահանգները բնակչության թվաքանակով աշխարհի երրորդ երկիրն է (330 մլն մարդ), այն զգալիորեն առաջ է անցել Չինաստանից և Իտալիայից կորոնավիրուսով վարակվածների թվով։
Ընդամենը մեկ շաբաթում ԱՄՆ–ում դեպքերի թիվն ավելացել է չորս անգամ։ Microsoft–ի հիմնադիր Բիլ Գեյթսը կանխատեսում է, որ վարակման գագաթնակետը լինելու է ապրիլի վերջին։
Ըստ մարտի 30–ի տվյալների՝ ԱՄՆ–ում վարակվածների թիվը հասել է 142,735–ի, մահացածներինը՝ 2,489–ի։
Ըստ CNN–ի տվյալների՝ երկուշաբթի օրը՝ մարտի 23–ին, ԱՄՆ–ում վարակից մահացել էր 414 մարդ։
Ընդամենը մեկ շաբաթ անց՝ մարտի 30–ին, մահացել է արդեն 2,485 մարդ, և Վայոմինգն ու Հավային միակ նահանգներն են, որոնք դեռ չեն հաղորդել մարդկանց մահվան մասին։
Կորոնավիրուսի հարցերով Սպիտակ տանը ստեղծված թիրախային խմբի անդամ Էնթոնի Ֆաուչին հայտարարել է․
«Հնարավոր է, որ ԱՄՆ–ում վարակված մարդկանց թիվը կարող է հասնել մեկ միլիոնի»։
- Կորոնավիրուսն Իրանում․ խոշորագույն բռնկումներից մեկն աշխարհում և իշխանությունների խաբեությունը
- Ռուսաստանը պանդեմիայի գագաթնակետին սպասելիս
Նախագահ Դոնալդ Թրամփը մարտի 29–ի ճեպազրույցի ժամանակ էլ ավելի ողբերգական կախատեսումներով է բնորոշել իրավիճակը․
«Եթե հաջողվի այնպես անել, որ [կորոնավիրուսի հետևանքով] մահվան դեպքերի քանակը չգերազանցի 100 հազարը կամ դրանից պակաս լինի, կարելի է ասել, որ մենք շատ լավ աշխատանք ենք արել»։
Ինչո՞ւ է ԱՄՆ–ում աղետալի իրավիճակ ստեղծվել։
Թույլ տրված սխալները
Վարակման կտրուկ աճն ԱՄՆ–ում գործող իշխանությունների թույլ տված մի շարք սխալների հետևանքն է։ Ամերիկյան համաճարակաբանները խոսում են, նախևառաջ, գլոբալ պատճառի մասին։
Համաճարակի նկատմամբ անլուրջ վերաբերմունք անգամ այն պահին, երբ այն համակել էր Չինաստանը։
Այս սխալի հետևանքը հիվանդանոցներում ամեն ինչի աղետալի պակասն է դարձել՝ դիմակների, բժիշկների համար պաշտպանիչ արտահագուստի, արհեստական շնչառության սարքերի, որոնք հիվանդության դեմ պայքարի գլխավոր միջոցն են։
Նյու–Յորքի բժիշկներ․ «Ամեն ինչի սուր պակաս կա»
Նյու–Յորքում գրանցվել է դեպքերի մեծ մասը։ Մարտի 30–ի առավոտվա դրությամբ՝ 59,513 հազար վարակված կա, 965 մարդ մահացել է՝ ըստ CNN–ի հաշվարկների։
«Մենք ամեն ինչի սուր պակաս ունենք», — այս խոսքերը պատկանում են Նյու Յորքի Լոնգ Այլենդի հիվանդանոցի անսեթեզիոլոգիայի բաժանմունքի բուժող բժշկին, որը չի ցանկացել նշել իր անունը։
«Չեմ կարծում, որ դա հիվանդանոցի մեղքն է, այն կրկին և կրկին հարցում է անում, սակայն ոչինչ չի ստանում», – ասել է նա CNN–ին։
Բժիշկը նկարագրել է, թե ինչպես են իրենք լվանում և կրկին օգտագործում պաշտպանիչ միջոցները, որոնք նախատեսված են մեկանգամյա օգտագործման համար։
Նա ասել է, որ հիվանդանոցներում արդեն բառացիորեն ախտահանող անձեռոցիկներ չկան։
Սակայն ամենամեծ խնդիրն այն է, որ արհեստական շնչառության սարքերի սուր պակաս կա, և բժիշկները սկսել են նարկոզի սարքն օգտագործել արհեստական շնչառության սարքի փոխարեն։
«Մեզ մոտ այնքան շատ են ծայրահեղ ծանր հիվանդները, որ մենք ի վիճակի չենք ինչ–որ բան անել սարքավորումների և նյութերի բացակայության պայմաններում», — ասել է բժիշկը։
Նյու Յորքի նահանգապետ Էնդրյու Քուոմոն բազմիցս հայտարարել է, որ կորոնավիրուսով վարակված հիվանդների բուժման համար նահանգին անհրաժեշտ է ոչ պակաս, քան արհեստական շննչառության 30 հազար սարք, սակայն առկա է այդ քանակի միայն մի փոքր մասը։
Նմանատիպ իրավիճակի մասին են խոսում նաև ԱՄՆ տարբեր նահանգների այլ հիվանդանոցների բժիշկները։
Ընդ որում, կորոնավիրուսի դեմ պայքարի՝ կենտրոնական կառավարության կողմից հատուկ նշանակված համակարգողը մինչև վերջին պահը հերքում էր դիմակների, պաշտպանիչ արտահագուստի և արհեստական շնչառության սարքերի պակասը երկրի հիվանդանոցներում։
Խոսքը նաև այն մասին է, որ, չնայած համաճարակի բռնկմանն, ԱՄՆ–ում նախկինի պես թեստավորվում են համեմատաբար ոչ մեծ թվով բնակիչներ։
Ձեռնարկվող միջոցները
- Երբ համաճարակի մասշտաբը գիտակցվեց՝ մեծ ուշացումով, ինչպես նշում են համաճարակաբաններն, ԱՄՆ իշխանությունները սկսեցին միջոցներ ձեռնարկել։
- Փակեցին սահմանները։
- Նահանգները մեկը մյուսի հետևից արտակարգ դրություն հայտարարեցին, ինչը թույլ է տալիս նահանգապետներին կոշտ կարանտին կիրառել և կտրուկ սահմանափակել քաղաքացիների տեղաշարժը։
- Նախագահ Թրամփը կոչ է արել խոշորագույն ավտոմոբիլային (Ford, General Motors) և այլ ընկերություներին անցնել արհեստական շնչառության սարքերի արտադրության։ Հակառակ դեպքում նա սպառնում է ստիպել նրանց «Ռազմական իրավիճակում արտադրական գործունեության մասին օրենքի» միջոցով։
- ԱՄՆ բժշկական քոլեջներում կարող են հայտարարվել վաղաժամկետ ավարտական քննություններ, որպեսզի շրջանավարտների օգնությամբ հնարավոր լինի լրացնել հիվանդանոցներում բժիշկների պակասը։
- ԱՄՆ ռազմածովային նավատորմը կորոնավիրուսից ամենաշատ տուժած ամերիկյան Նյու Յորք քաղաքի նավահանգիստ է ուղարկել լողացող հոսպիտալ։
Պանդեմիա և գործազրկություն
Ամերիկյան իշխանություններն ու բնակչությունը համավարակից ոչ պակաս վախենում են տնտեսական հետևանքներից՝ արտադրության, առևտրի անկումից, հետագա գործազրկությունից։
Տնտեսական ճգնաժամի կանխարգելման և բիզնեսին աջակցելու համար կառավարությունը պատմության մեջ աննախադեպ գումար է հատկացրել՝ 2 տրիլիոն դոլար։
Դրանցից 250 մլրդ դոլարը քաղաքացիներին և տնային տնտեսություններին ուղղված ուղիղ օգնությունն է։
Բիլ Գեյթսի կանխատեսումը
Բիլ Գեյթսի բարեգործական հիմնադրամը կորոնավիրուսի դեմ պայքարի համար նվիրաբերել է ավելի քան 100 մլն դոլար։ Microsoft–ի հիմնադիր Բիլ Գեյթսը կանխատեսում է, որ ԱՄՆ–ում վարակման գագաթնակետը լինելու է ապրիլի վերջին։
