Կորոնավիրուսով վարակման 26 նոր դեպք։ Արտակարգ դրության ռեժիմի առաջին օրը Հայաստանում
Հայաստանում արտակարգ դրության ռեժիմի առաջին օրն է, որը հայտարարվել է կորոնավիրուսի տարածումը կանխելու նպատակով։
Մարտի 17–ին հայտնի է դարձել, որ վարակման 26 նոր դեպք է հայտնաբերվել։ Օրվա առաջին կեսին հաղորդվում էր 12 նոր վարակվածների մասին, աշխատանքային օրվա ավարտին հայտարարվեց ևս ութ հոգու մասին, ավելի ուշ նորից աճեց թիվը՝ նոր վեց դեպքով։ Այս անձանց մեծ մասն արդեն մեկուսացված է եղել, քանի որ շփում է ունեցել ավելի վաղ հայտնաբերված հիվանդների հետ։
Վարակվածների ընդհանուր թիվը հասել է 78–ի։ Այդ թվում հաշվառված է նաև առաջին վարակվածը, որն արդեն ապաքինվել և դուրս է գրվել հիվանդանոցից։
Քանի որ հիվանդների թիվը շարունակում է աճել, Հայաստանում կիրառվում են սահմանափակումներ։ Մասնավորապես, հրապարակվել է այն երկրների ցանկը, որտեղից մարտի 17–ից արգելվում է մուտք գործել Հայաստան։
Բոլոր մանրամասները՝ Էջմիածնում տիրող իրավիճակի, սպիրտի գների և մթերքի առկայության, ինչպես նաև արտակարգ իրավիճակում լրատվամիջոցների աշխատանքի մասին։
• Կորոնավիրուս․ պանդեմիա է հայտարարվել։ Ի՞նչ է դա նշանակում, և ի՞նչ սպասել
• Կորոնավիրուսի համաճարակը Կովկասում․ փաստեր և թվեր տարածաշրջանի վերաբերյալ
Իրավիճակն Էջմիածնում
Էջմիածնում, որը Երևանից մոտ 20 կմ հեռավորության վրա է գտնվում, ամենածանր դրությունն է, քանի որ վարակվածների մեծ մասը հենց այս քաղաքից է։ Նոր վարակվածների թվում են այն անձինք, որոնք շփվել են Էջմիածնի վարակված առաջին քաղաքացու հետ։ Խոսքն Իտալիայից վերադարձած կնոջ մասին է, որը բազմամարդ միջոցառումների է մասնակցել ինքնամեկուսացման փոխարեն։
Կորոնավիրուսի տարածումն Էջմիածնում կանխելու համար լրացուցիչ միջոցներ են ձեռնարկվել, քաղաքը գրեթե փակ է։
Այն ունի 27 ելք, սակայն, ըստ կառավարության որոշման, այժմ մարդիկ կարող են օգտվել միայն երեքից։ Ընդ որում, բժիշկները չափում են քաղաքից մեկնող բոլոր քաղաքացիների ջերմությունը, նորմայից որևէ շեղման դեպքում նրանք ուղարկվում են հիվանդանոց կամ ինքնամեկուսանում են։
Մուտքերը, որոնցով քաղաք մտնելն արգելված է, պահպանվում են ոստիկանության կողմից։ Այդ շրջաններում տեղաշարժն արգելված է։
Ո՞վ չի կարող Հայաստան գալ
Հրապարակվել է 16 երկրների ցանկը, որտեղից մարդիկ չեն կարող Հայաստան գալ։ Դա Չինաստանն է, Հարավային Կորեան, Ճապոնիան, Իտալիան, Իսպանիան, Ֆրանսիան, Գերմանիան, Շվեյցարիան, Դանիան, Ավստրիան, Բելգիան, Նորվեգիան, Շվեդիան, Նիդերլանդները, Մեծ Բրիտանիան։
Սահմանափակումները վերաբերում են այն երկրներին, որտեղ առավել ծանր համաճարակային իրավիճակ է։ Դրանց վերջնական ցանկը որոշվել է փոխվարչապետ Տիգրան Ավինյանի կողմից, որն արտակարգ դրության ռեժիմում կատարում է նաև պարետի գործառույթները։
Հայաստանի քաղաքացիները, որոնք ցանկանում են հայրենիք վերադառնալ այդ երկրներից, ստիպված կլինեն 14-օրյա կարանտին անցնել։
Սահմանափակումները չեն վերաբերի բեռնափոխադրումներին։
Լրատվամիջոցների աշխատանքի մասին
Արտակարգ իրավիճակի պայմաններում Հայաստանի կառավարությունը հայտարարել է տեղեկությունների տարածման սահմանափակումների մասին։ Դրանք վերաբերում են բոլոր հրապարակումներին՝ ոչ միայն լրատվամիջոցներում, այլև սոցցանցերում։
Կորոնավիրուսով վարակման արդեն հայտնաբերված և նոր դեպքերի, մարդկանց առողջական վիճակի, վարակման աղբյուրների, վարակվածների թվի մասին ցանկացած հրապարակում պետք է կատարվի՝ հղումով պաշտոնական տեղեկություններին։ Սպասվում էր, որ այդ տեղեկությունները տրամադրվելու են պարետատան կողմից։ Մարտի 17–ին դրանք հայտնում էր նաև առողջապահության նախարարն ու նրա մամուլի քարտուղարը։
Սահմանափակման իմաստը դրանում է, որ լրատվամիջոցներն ու սոցցանցերի օգտատերերը զերծ մնան կորոնավիրուսից տուժածների մասին ագրեսիվ հայտարարություններից և խուճապ չսերմանեն։
«Չի կարելի նաև հրապարակել հիվանդների անունները։ Մարդու անձնական տվյալները հրապարակման ենթակա չեն անգամ նորմալ պայմաններում, առավելևս դա չի կարելի անել այժմ», — մարտի 17–ին հայտարարել է արդարադատության փոխնախարար Վահե Դանիելյանը։
Նա հաղորդել է նաև, որ հասարակությունում լարվածություն առաջացնող հայտարարությունների ու հրապարակումների համար վարչական պատասխանատվություն է նախատեսվում։
Թանկացման մասին
Հայաստանի վարչապետ Նիկոլ Փաշինյանը մարտի 17–ին ֆեյսբուքյան իր էջում ուղիղ միացման ժամանակ հայտարարել է, որ երկրում թանկացել է սպիրտը, սակայն պատճառը կորոնավիրուսը չէ․
«Ուզում եմ նշել, որ սպիրտի գների աճը կապված է Հարկային օրենսգրքում կատարած փոփոխությունների հետ, քանի որ փոխվել է սպիրտի «նվազագույն գին» հասկացությունն, ու դրա գնի աճը կապված է բացառապես դրա հետ»։
Մթերքի պակաս չկա
Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը մարդկանց կոչ է արել խուճապային գնումներ չկատարել։ Նա պաշտոնապես հայտարարել է, որ Հայաստանում մթերքի և ապրանքի պակաս և գնման սահմանափակում չկա․
«Այս պահին տագնապալի երևույթներ չկան։ Միակ խնդիրը խանութներում ապրանքի ամենօրյա ֆիզիկական ծավալի ապահովումն է, քանի որ մեկ օրվա ընթացքում հսկայական ծավալի գնումներ են կատարվում, որն աբսուրդի է հասնում։ Այս պահին պարզապես անհրաժեշտ է հասցնել պահեստից ապրանքը խանութ տեղափոխել։ Հնարավոր է, որ իրարանցման պատճառով ինչ–որ պահի դարակները դատարկվում են, սակայն կրկին լցվում են, անգամ ուշ ժամերի խնդիրներ չկան․ խանութների դարակաշարերը լիքն են»։
Ընդ որում, 30-40%–ով աճել է խոշոր սուպերմարկետների առևտրաշրջանառությունը և նվազել փոքր խանութներինը։
«Կոչ եմ անում չմոռանալ փոքր ու միջին բիզնեսի մասին։ Հասկանում եմ, որ սուպերմարկետներից գնումներ կատարելն ավելի հեշտ է, սակայն այսօր փոքր խանութներում կուտակված մեծ ծավալի մթերք կա, և զարմանալիորեն այդ խանութներն ապրանքի իրացման հետ կապված խնդիրներ ունեն», — հայտարարել է վարչապետը։
Կորոնավիրուսի 5000 նոր թեստ
Հայաստանը մինչև շաբաթվա վերջ կորոնավիրուսի ախտորոշման 5 հազար թեստ կստանա։
«Դա բավական է մեր աշխատանքները կատարելու համար, սակայն չի նշանակում, որ մենք չենք աշխատում նոր թեստեր ձեռք բերելու ուղղությամբ։ Աշխատանքները տարվում են ամենօրյա ռեժիմով։ Մշտական շփման մեջ ենք մեր արտասահմանյան գործընկերների հետ», — հայտարարել է առողջապահության փոխնախարար Լենա Նանուշյանը։
Խորհրդարանում արդեն առանց դիմակի ելույթ չեն ունենում
Ֆինանսավարկային և բյուջետային հարցերով խորհրդարանական հանձնաժողովի նիստին «Տնտեսական իրավունքի կենտրոնի» ղեկավար Մովսես Արիստակեսյանը ցանկացավ ելույթից առաջ հանել դիմակը, սակայն նրան թույլ չտվեցին։
Բժշկական դիմակը հանելու փորձը կասեցրեց հանձնաժողովի նախագահը՝ «Լուսավոր Հայաստան» կուսակցության պատգամավոր Մանե Թանդիլյանը, որը դիմակով էր․
«Հավատացեք, դիմակով նույնպես հարմար է խոսել, սեփական փորձից գիտեմ»։
