Կորոնավիրուսի հերթական ալիքը․ Հայաստանում կրկին աճում է վարակվածների թիվը

Հայաստանում սկսվել է կորոնավիրուսի հերթական ալիքը, բժիշկներն ահազանգում են․ հիվանդանոցները կրկին գերծանրաբեռնված են։ Մարտի 10-ին 4 285 թեստից 748-ի արդյունքները դրական են եղել։

Վարակաբանները զգուշացնում են, որ Հայաստանում համաճարակային իրավիճակը լարված է, և եթե ոչինչ չձեռնարկվի, ապա մեկ շաբաթից օրական վարակման դեպքերի թիվը կարող է հինգ անգամ ավելի լինել։

2020 թ․ մարտի 16-ից մինչև սեպտեմբերի 11-ը երկրում արտակարգ դրություն էր հայտարարվել։ Այնուհետև այն փոխարինվեց կարանտինով, որը տևեց մինչև հուլիսի 11-ը։

Ֆորմալ առումով՝ «դիմակային ռեժիմը» հանրապետությունում դեռ պահպանվում է, սակայն գործնականում ոչ բոլորն են այն կրում։

Մարտի 10-ի դրությամբ Հայաստանում գրանցվել է կորոնավիրուսով վարակման 176 286 դեպք։ Վերջին մեկ օրում չի հաջողվել փրկել երկու հիվանդի կյանք, ընդհանուր՝ 3 239-ի։ Ապաքինվել է 165 441 մարդ։ Համավարակի մեկնարկից ի վեր թեստերի ընդհանուր քանակը 761 945 է։

• Վրաստանն աշխարհում 15-րդ տեղում է մեկ միլիոն բնակչությանը բաժին ընկնող դեպքերի քանակով, Հայաստանը՝ 30-րդ, Ադրբեջանը՝ 80-րդ տեղում
• Կորոնավիրուս, հարազատների կորուստներն ու ակնկալիքները․ անցյալ տարին՝ Հայաստանի ծերանոցներում

Բժիշկների խորհուրդը՝ հետևել կանոններին

Առողջապահության նախարար Անահիտ Ավանեսյանը կարծում է, որ վարակման դեպքերն օրեցօր չեն շատանա, եթե պարզապես պահպանվեն հակահամաճարակային կանոնները։

Նա կրկին հիշեցրել է Առողջապահության համաշխարհային կազմակերպության առաջարկած կանխարգելիչ միջոցներին հետևելու անհրաժեշտության մասին։ Դա ձեռքերի ախտահանումն է, սոցիալական հեռավորության պահպանումն ու դիմակ կրելը․

«Պետք է ամեն ինչ անել, որպեսզի մեր հիվանդների թիվն ավել չլինի այն կարողություններից, որոնք որ մենք ունենք, և չունենանք պացիենտներ, որոնք հիվանդ կլինեն, տանը կմնան և հնարավորություն չեն ունենա հոսպիտալացվելու», — հայտարարել է նախարարը։

Նրա խոսքով՝ կորոնավիրուսով վարակվածներն այժմ բուժվում են ինը հիվանդանոցներում, որտեղ ընդամենը հարյուր ազատ հիվանդամահճակալ է մնացել։

Վարչապետ Նիկոլ Փաշինյանը նույնպես խոսել է վարակի պայմաններում կյանքի նոր կանոններին հետևելու անհրաժեշտության մասին, «որ լրացուցիչ սահմանափակումներ կիրառելու անհրաժեշտություն չլինի»։

Բժիշկներն իրավիճակը խիստ լարված են համարում

Եթե վերջին երկու շաբաթվա թեստերի արդյունքները համեմատենք նախորդ 14 օրվա տվյալների հետ, ապա ավելի քան 91% աճ կա։ Այս մասին հաղորդել է Հիվանդությունների վերահսկման և կանխարգելման ազգային կենտրոնի համաճարակաբանության բաժնի վարիչ Ռոմելա Աբովյանը․

«Ներկա պահին համաճարակային իրավիճակը կարելի է գնահատել խիստ լարված։ […] Ընդ որում, Հայաստանում արդեն վարակի վերարտադրողական ցուցանիշը բարձր է 1-ից, կազմում է 1.3: Դա նշանակում է, որ եթե մոտակա 7 օրերի ընթացքում որևէ միջոցառում չձեռնարկվի, և չբարձրացնենք զգոնությունը անվտանգության կանոնների նկատմամբ, կարող ենք ունենալ լրացուցիչ նոր 3700 դեպք»։

Վարակաբանի խոսքով՝ մանկապատանեկան տարիքի երեխաների շրջանում նույնպես կա դեպքերի կտրուկ աճ․

3-5 տարեկանների շրջանում՝ 1.17 անգամ,

6-17 տարեկանների շրջանում՝ 1.42 անգամ,

6-8 տարեկանների շրջանում՝  3.3 անգամ:

6772 հիվանդ այժմ հաշվառված է որես ակտիվ բուժում ստացող, նրանցից 901-ը՝ հիվանդանոցներում։

Դեռևս պատվաստվում են միայն բժիշկները

Զանգվածային պատվաստումը Հայաստանում դեռ չի սկսվել։ Դեռևս պատվաստվում են միայն բուժաշխատողները, որոնք աշխատում են կորոնավիրուսով վարակվածների բուժմամբ զբաղվող հիվանդանոցներում։

Տարեսկզբին Ռուսաստանը Հայաստանի առողջապահության նախարարությանը նվիրել է «Սպուտնիկ V»-ի 2000 չափաբաժին՝ 1000 հոգու պատվաստման համար․ պատվաստանյութը ներարկվում է երկու անգամ։

Հայ վարակաբանները վստահեցնում են, որ պատվաստումից հետո որևէ բարդություն կամ կողմնակի ազդեցություն դեռ չի հայտնաբերվել։

Առողջապահության նախարարի հրամանով՝ հաստատվել են ռիսկի խմբերը, որոնք պատվաստվելու են առաջին հերթին։ Մասնավորապես, դա տարեցների խնամքի կենտրոնների բնակիչներն են և դրանց աշխատակիցները, սոցիալական խնամքի կենտրոնների աշխատակիցները, 65 տարեկան և բարձր տարիքի անձինք, ինչպես նաև 16-64 տարեկան քրոնիկ հիվանդները։