Կոռուպցիայի առաջնորդները

Կոռուպցիան ազգայնականության և պոպուլիզմի տարածման աճի գլխավոր պատճառներից մեկն է, ասված է Transparency International միջազգային կազմակերպության նոր զեկույցում, որը նվիրված է Եվրոպայի և Կենտրոնական Ասիայի երկրներին:

Հարցման արդյունքների համաձայն, որին մասնակցել է 60 հազար մարդ նշված տարածաշրջանների 42 երկրներից, հարցվածներից յուրաքանչյուր երրորդը կոռուպցիան իր երկրի լրջագույն խնդիրներից է համարում: Մոլդովայում, Կոսովոյում և Իսպանիայում այդ կարծիքին է հարցվածների երկու երրորդը:

Հարցմանը մասնակցածների 53 տոկոսը դժգոհ է նրանից, թե ինչպես են իրենց կառավարությունները պայքարում այդ երևույթի դեմ: Սեփական քաղաքացիներից ամենախիստ գնահատականներն են ստացվել Ուկրաինայի (86% դժգոհ), Մոլդովայի (84% դժգոհ), Բոսնիա և Հերցեգովինայի (80% դժգոհ) և Իսպանիայի (80% դժգոհ) քաղաքացիների կողմից:

Միջինում յուրաքանչյուր երրորդ տնային տնտեսություն ստիպված է կաշառք տալ պետական ծառայությունից օգտվելու համար, սակայն այս տվյալները խիստ տարբերվում են՝ ըստ տարածաշրջանների. որքան այն դեպի արևելք է, այնքան ավելի վատ է վիճակը: ԵՄ անդամ-պետությունների շրջանում կոռումպացվածության ամենաբարձր ցուցանիշները Ռումինիայինն են (38%) և Լիտվայինը (24%): Մնացածներից առաջատարները Տաջիկստանն է (50%), Մոլդովան (42%), Ադրբեջանը, Ղրղզստանն ու Ուկրաինան (38-ական տոկոս):

Հետխորհրդային երկրների կոռումպացվածության ընդհանուր վարկանիշն այսպիսի տեսք ունի.

50% — Տաջիկստան,
42% — Մոլդովա
38% — Ղրղզստան
38% — Ադրբեջան
38% — Ուկրաինա
34% — Ալբանիա
34% — Ռուսաստան
29% — Ղազախստան
29% — Ռումինիա
27% — Բոսնիա և Հերցեգովինա
24% — Լիտվա
24% — Հայաստան
22% — Սերբիա
22% — Հունգարիա
20% — Բելառուս
18% — Ուզբեկստան
17% — Բուլղարիա
16% — Չեռնոգորիա
15% — Լատվիա
12% — Նախկին Հարավսլավիայի մաս կազմող Մակեդոնիա
12% — Սլովակիա
10% — Կոսովո
10% — Խորվաթիա
9% — Չեխիա
7% — Վրաստան
7% — Լեհաստան
5% — Էստոնիա
3% — Սլովենիա

«…Կոռումպացված էլիտաներին ու օլիգարխներին հեռացնելը բարդ է: Սակայն մենք տեսել ենք, որ դա հնարավոր է, երբ մարդիկ միավորվում են իրենց ղեկավարներից պահանջելու ավելի բարձր չափանիշներին հետևել, իսկ նրանց վերահսկելու կոչված դատական համակարգերից՝ ավելի շատ անկախություն», — պնդում է Transparency International-ի նախագահ Խոսե Յուգազը:

4 գլխավոր խորհուրդ, որն առաջարկում է Transparency International-ը կոռուպցիայի դեմ պայքարի համար.

·  լոբբիստների գործունեության թափանցիկ կանոններ,

·  դատական համակարգի անկախության ամրապնդում, դրա վրա գործադիր իշխանության ազդեցության կրճատում,

·  իրազեկիչների օրենսդրական պաշտպանություն,

·       կոռուպցիայի մասին ցանկացած հաղորդման վերաբերյալ հետևողական արձագանք:

Հրապարակվել է 23.11.2016