Ուկրաինայում արգելվել է լողալ Սև ծովում և խմել չֆիլտրված ջուր․ Կախովկա ՀԷԿ-ի պայթեցման հետևանքները
Կարելի՞ է լողալ Սև ծովում
Աշխարհը քննարկում է Կախովկա հիդրոէլեկտրակայանի ամբարտակի պայթելու հնարավոր հետևանքները, սակայն աղտոտվածության մակարդակը, որն առաջացրել է պայթյունը, դեռևս պարզ չէ։ Ուկրաինացի մասնագետներն ու երկրի իշխանություններն ակտիվորեն քննարկում են հնարավոր ռիսկերն ու նախազգուշական միջոցները։ Ահա որոշ հիմնական կետեր, որոնք նրանք ընդգծում են:
Ըստ News of Donbass-ի հրապարակման
Ի՞նչ է հայտնաբերվել ջրում
Ամբարտակի պայթեցման հետևանքով տեղի ունեցած ջրի աղտոտումը կարող է հանգեցնել լուրջ խնդիրների, այդ իսկ պատճառով ուկրաինական իշխանություններն ամեն օր ստուգում են ջրի որակը։
Դնեպրի ջուրը օգտագործման համար ոչ պիտանի է ճանաչվել։
Ուկրաինացիներին խորհուրդ է տրվում օգտագործել ջրի ախտահանման համար նախատեսված հաբեր, դրանք տեղական իշխանություններն են բաժանում, հաղորդում են, որ նշված դեղերի պակաս չկա։ Պայթեցումից հետո ջուրը լցվել է քաղաքներ և գյուղեր։
▇ Հեղեղվել են գերեզմանատներ, աղբավայրեր և այլ վտանգավոր օբյեկտներ։ Կենդանիներ են խեղդվել ջրի մեջ, հարյուրավոր զենքեր ու ականներ են եղել ջրի տակ։ Այդ ամենի մասնիկները կարող էին հայտնվել ջրհորներում և ստորերկրյա ջրերում:
Առայժմ ջրի նմուշներում լուրջ հիվանդությունների հարուցիչներ չեն հայտնաբերվել, սակայն մասնագետները կարծում են, որ, հաշվի առնելով աղետի մասշտաբները, իրավիճակը կարող է փոխվել։ Մինչ օրս հաղորդվել է երկաթի մակարդակի նկատելի ավելցուկի և ծովի ջրի աղիության նվազման մասին։
Ուկրաինայի առողջապահության նախարար Վիկտոր Լյաշկոն հայտարարել է, որ Դնեպրում ջրի աղտոտվածության մակարդակը տարբեր ցուցանիշների համաձայն 28 հազար անգամ գերազանցում է նորման։ «Հետևաբար, ձկնորսությունն արգելված է, պետք չէ խմել այդ ջուրը, տալ անասուններին և լողալ այդտեղ», — ասել է Լյաշկոն: Նրա խոսքով՝ լողալու համար պիտանի չէ ամբարտակից ներքև գտնվող ողջ ջրային տարածքը, այդ թվում՝ Սև ծովի ուկրաինական ափը։
▇ Հունիսի 19-ից Ուկրաինան պաշտոնապես արգելել է լողն ու ձկնորսությունն իր սևծովյան ափին։
Մասնագետներն ընդգծում են, որ լուրջ հիվանդությամբ հնարավոր է վարակվել ոչ միայն կեղտոտ ջուր կուլ տալով, այլև մաշկի վրա առկա կտրվածքների և քերծվածքների միջոցով։ Ուստի հատուկ ռիսկային խումբ են համարվում հեղեղումների գոտում աշխատող կամավորները։
Ինչպե՞ս պաշտպանել ինքդ քեզ
Ուկրաինայում խորհուրդ են տալիս չօգտագործել բաց ջրամբարների և հորերի հում՝ չֆիլտրված ջուր։ Տարբեր հիվանդությունների հարուցիչներից ազատվելու լավագույն միջոց են համարում ախտահանիչ հաբերը։ Գերատեսչությունն ընդգծում է, որ դրանք ոչնչացնում են վիրուսները, բակտերիաները, սնկերը և արդյունավետ միջոց են տիֆ, դիզենտերիա, խոլերա, պոլիոմիելիտ և այլ սուր աղիքային վարակներ առաջացնող միկրոօրգանիզմների դեմ։ Եթե ձեռքի տակ հաբեր չկան, ապա ջուրը կարելի է եռացնել։
«Ջուրը պետք է եռացնել երկար ժամանակ։ Այնպես չէ, որ ջուրը եռացել է ու վերջ։ Այն պետք է եռա առնվազն հինգ րոպե»,- News of Donbass-ի հետ զրույցում պարզաբանել է մանկաբույժ-նեոնատոլոգ Վիկտորյա Նեկրյաչը։
Նրա խոսքով՝ ամենադժվարը հեպատիտ Ա-ի հարուցիչը եռացնելով սպանելն է, ուստի տեղի բնակիչներին խորհուրդ է տվել պատվաստվել այդ հիվանդության դեմ։ Բժիշկները խորհուրդ են տալիս պատվաստվել նաև այլ լուրջ հիվանդությունների դեմ, ինչպիսին է օրինակ՝ պոլիոմելիտը։
«News of Donbass»-ի զրուցակիցները պատմել են այն հիվանդությունների ախտանիշների մասին, որոնք կարող են փոխանցվել աղտոտված ջրի միջոցով։ Ըստ բժիշկների՝ աղիքային վարակները կարող են կլինիկական դրսևորումներ ունենալ հենց հաջորդ օրը՝ կախված հարուցիչից։ Դրանք են՝ փսխում, որովայնի ցավ, փորլուծություն, ջերմություն, գլխապտույտ, թուլություն, գիտակցության կորուստ։ Առանձին դեպքերում հնարավոր են նաև ֆոտոֆոբիա և մաշկի չորություն։
