Հայաստանում կանայք 6 ամսով զինծառայության կկարողանան անցնել
Կանանց զինծառայություն Հայաստանում
Հայաստանում կանայք 6 ամսով զինվորական ծառայության անցնելու հնարավորություն կստանան։ Ապրիլի 21-ին կառավարությունը հավանության է արժանացրել որոշման նախագիծը, այն կներկայացվի Ազգային ժողովի քննարկմանը։
Պաշտպանության նախարար Սուրեն Պապիկյանը հույս ունի, որ խորհրդարանում օրենքի ընդունման գործընթացը հնարավոր կլինի կազմակերպել նախքան այս նստաշրջանի ավարտը, կանանց էլ կամավորության սկզբունքով կկարողանան ներգրավել արդեն ձմեռային զորակոչի ժամանակ։
Որոշման նախագծի մանրամասները, մեկնաբանություններ սոցցանցերից
Կամավո՞ր հիմունքներով, թե՞ պարտադիր
Պաշտպանության նախարար Սուրեն Պապիկյանի խոսքով՝ կանանց զինծառայությունը կամավոր հիմունքներով է։ Մյուս կողմից նկատում է՝ եթե քաղաքացին արդեն իսկ զորակոչվել է, սահմանվում է պարտադիր զինվորական ծառայության վեցամսյա ժամկետ։
Դիմում ներկայացրածները կարող են պարտադիր զինվորական ծառայությունից հրաժարվել մինչև զորակոչվելու օրը։
Զորակոչված կանանց ծառայությունը կազմակերպվելու է բացառապես ուսումնական զորամասերում՝ առանց վիճակահանության։
Նախարարի փոխանցմամբ՝ զինծառայության անցնելու համար դիմած քաղաքացիների վրա չեն տարածվելու՝
- ընտանեկան պայմաններից ելնելով տարեկետման,
- նույն պայմաններից ելնելով՝ պարտադիր զինվորական ծառայությունից վաղաժամկետ արձակման հիմքերը։
«Նման պայմանների հնարավոր առկայությունը ստուգվում է մինչև նրանց զորակոչվելը»,- պարզաբանել է նա։
Կկարողանան անցնել պայմանագրային ծառայության
Պաշտպանության նախարարի փոխանցմամբ՝ պարտադիր ծառայության 6-ամսյա ժամկետը լրանալուց հետո կանայք հնարավորություն են ունենալու դիմել «Պաշտպան հայրենյաց» ծրագրին և անցնել պայմանագրային ծառայության՝ 5 տարի ժամկետով։
Նրանք, ովքեր չեն ցանկանա շարունակել զինծառայությունը, կզորացրվեն և կստանան պատվովճար՝ ըստ իրենց ծառայած ամիսների։
«Նախատեսվում է սահմանել 6 ամիսը լրիվ ծառայելու դեպքում՝ 1 միլիոն դրամ, իսկ առողջական վիճակի պատճառով վաղաժամկետ զորացրվելու դեպքում նշված գումարը 6 ամսվա բաժանելու և փաստացի ծառայած ամիսների թվով բազմապատկելու արդյունքում ստացված չափով»,- հայտնել է Պապիկյանը։
«Պետք է դառնան զինվորական ծառայության լիարժեք մաս»
Կառավարության նիստում նման հայտարարություն է արել Հայաստանի վարչապետը։ Փաշինյանի խոսքով՝ պետք է փոխել այն ընկալումը, թե կանայք բանակում սպասարկող անձնակազմի ներկայացուցիչներ են։
Կարծում է՝ այս նախագծի ընդունումը ենթադրում է «հայկական բանակի և երկրի պատմության մեջ նոր էջ բացելու» հարցի քննարկում։
Վարչապետի գնահատմամբ՝ կանանց զինծառայության անցնելու նախագիծը «պրոֆեսիոնալ բանակին» ուղղված քայլ է, թեև առաջին հայացքից կարող է լինել հակառակ տպավորությունը։
«Դա չի լինելու զբոսանք զորամասում, դա լինելու է նորմալ զինվորական ծառայություն»,- հայտարարել է նա։
Փաշինյանի փոխանցմամբ՝ այն քաղաքացիները, որոնք 6-ամսյա ծառայությունից հետո կորոշեն զորացրվել, կհամալրեն զինված ուժերի պահեստազորը, ովքեր կանցնեն պայմանագրային ծառայության` կհամալրեն «գործող բանակը»։
Մեկնաբանություններ սոցցանցերից
«Աղջիկը գնում ա, ասում ա՝ պապ ջան, գնում եմ բանակ, հերն էլ ասում ա՝ ոչ մի բանակ, ես իմ աղջկան չեմ տալիս, իրանք էլ գալիս, փախցնում են։ Կամավոր-պարտադիրը ես տենց եմ հասկանում»։
«Մեր աղջիկներից շատ շատերը երազում էին ծառայության անցնել Ազգային բանակում։ Էս հնարավորությունը, հավատացած եղեք, ահագին բան է փոխելու։ Փոխելու է մեր մտածողությունը, փոխելու է մեր վերաբերմունքը մեր կանանց նկատմամբ։ Էս որոշմամբ մենք ապացուցելու ենք, որ փոքր լինելը դեռ տկարության նշան չի։ Ընդհակառակը, փոքրը պետականության գինն ու արժեքը ավելի խորն է ընկալում։ Մեր երկրի պես փոքր երկները նման լուծումների կարիքն ունեն»։
«Հիմա էլ կանանց ա ուզում վերացնի, որ սերունդ տվող էլ չունենանք»։
«Իսրայել» դառնալու ճանապարհին միայն սա՞ է պակասում, ա՜յ թերուսներ։ Դուք հազիվ սաղարթախիտ ծառերը կտրեք, տեղը ձողիկ տնկեք։ Հեռու քաշեք ձեր այդ օրենքը։ Ավելի լավ է դպրոցական համակարգը խելքի բերեք, որ դարձել է քաոսային միջավայր։ Թե բա, աղջիկ-բանակ»։
«Տղամարդիկ թող նստեն երեխա պահեն, կաֆեներում կապուչինո խմեն, կանայք ամեն ինչ կանեն, կարծես մեր երկրում պետք է մայրիշխանություն լինի, որ խելքի գան»։
«Ճիշտն այն կլինի, որ բոլոր չափահաս աղջիկների և կանանց համար անպայման առաջին բուժօգնության անվճար և պարտադիր դասընթացներ կազմակերպվեն, դրանով նրանք ավելի օգտակար կլինեն և՛ բանակի, և՛ թիկունքի համար»։
«Թող իրենց մայրերը, քույրերն ու կանայք գնան, հետո նոր՝ մենք»։
Հետևեք մեզ — Facebook | Youtube | Telegram
Կանանց զինծառայություն Հայաստանում
